Foto: https://www.president.gov.ua

Ukraina prezidenti Vladimir Zelenskiy Reseydiñ agressiyalıq sayasatına qarsı sankciya engizgeni üşin AQŞ pen Europalıq odaqqa alğıs bildirdi. Bwl turalı Ukraina prezidentiniñ saytında jariyalandı.

Jaña prezidentti wlıqtau räsimine qatısuğa kelgen AQŞ ökilderimen ötken kezdesude Zelenskiy: «Donbass pen Qırımdağı Resey agressiyasına özimiz qarsı twra almaymız. Sondıqtan sizderdiñ kömekteriñiz kerek. Ukraina aumağınıñ twtastığın qalıpqa keltiru isinde köşbasşılıq tanıtıp, el işin reformalauda kömek körsetkenderiñiz üşin alğıs bildiremiz jäne Amerika tarabı Reseyge qarsı sankciyalardı küşeytudi jalğastırsa eken deymiz. AQŞ – Ukrainanıñ Resey agressiyasına qarsı twruda quattı äri iri seriktesteriniñ biri», – dep mälimdedi. Sonımen qatar, Ukrainanıñ jaña prezidenti elde aşıq, ädil jäne demokratiyalıq reforma jürgizuge äzir ekenin ayttı.

20 mamırda Zelenskiy Europa komissiyası törağasınıñ orınbasarı Maroş Şefçoviçpen kezdesken bolatın. Basqosu barısında ol kez kelgen sankciyalar Reseydiñ Donbasstağı äreketterinen zardap tartıp otırğan Ukraina üşin öte mañızdı ekendigin aytıp, Europa odağınıñ Reseyge sankciya arqılı qısım körsetui jalğasadı degen ümit bildirdi.

Ayta keteyik, 20 mamırda Ukraina halqınıñ aldında ant qabıldağan Vladimir Zelenskiy eldi Reseydiñ ozbır sayasatınan qorğap, Kiev pen Mäskeu qarım-qatınasın qayta qaraytının aytqan. «Biz biriguimiz kerek. Sol kezde ğana mıqtı bolamız. Älemdegi barlıq ukrainalıqtarğa aytarım – biz 65 millionbız. Sizder bizge kereksizder, mıqtı da quattı Ukrainanı qwruğa ärqaysıñız qajetsizder. Sizderge Ukraina azamattığın beruge uäde beremin. Bwl – bizdiñ wlttıq ideyamız», – dep mälimdedi Zelenskiy.

"The Qazaq Times"