فوتو: https://www.president.gov.ua

ۋكراينا پرەزيدەنتى ۆلاديمير زەلەنسكي رەسەيدىڭ اگرەسسيالىق ساياساتىنا قارسى سانكتسيا ەنگىزگەنى ءۇشىن اقش پەن ەۋروپالىق وداققا العىس ءبىلدىردى. بۇل تۋرالى ۋكراينا پرەزيدەنتىنىڭ سايتىندا جاريالاندى.

جاڭا پرەزيدەنتتى ۇلىقتاۋ راسىمىنە قاتىسۋعا كەلگەن اقش وكىلدەرىمەن وتكەن كەزدەسۋدە زەلەنسكي: «دونباسس پەن قىرىمداعى رەسەي اگرەسسياسىنا ءوزىمىز قارسى تۇرا المايمىز. سوندىقتان سىزدەردىڭ كومەكتەرىڭىز كەرەك. ۋكراينا اۋماعىنىڭ تۇتاستىعىن قالىپقا كەلتىرۋ ىسىندە كوشباسشىلىق تانىتىپ، ەل ءىشىن رەفورمالاۋدا كومەك كورسەتكەندەرىڭىز ءۇشىن العىس بىلدىرەمىز جانە امەريكا تارابى رەسەيگە قارسى سانكتسيالاردى كۇشەيتۋدى جالعاستىرسا ەكەن دەيمىز. اقش – ۋكراينانىڭ رەسەي اگرەسسياسىنا قارسى تۇرۋدا قۋاتتى ءارى ءىرى سەرىكتەستەرىنىڭ ءبىرى»، – دەپ مالىمدەدى. سونىمەن قاتار، ۋكراينانىڭ جاڭا پرەزيدەنتى ەلدە اشىق، ءادىل جانە دەموكراتيالىق رەفورما جۇرگىزۋگە ءازىر ەكەنىن ايتتى.

20 مامىردا زەلەنسكي ەۋروپا كوميسسياسى توراعاسىنىڭ ورىنباسارى ماروش شەفچوۆيچپەن كەزدەسكەن بولاتىن. باسقوسۋ بارىسىندا ول كەز كەلگەن سانكتسيالار رەسەيدىڭ دونباسستاعى ارەكەتتەرىنەن زارداپ تارتىپ وتىرعان ۋكراينا ءۇشىن وتە ماڭىزدى ەكەندىگىن ايتىپ، ەۋروپا وداعىنىڭ رەسەيگە سانكتسيا ارقىلى قىسىم كورسەتۋى جالعاسادى دەگەن ءۇمىت ءبىلدىردى.

ايتا كەتەيىك، 20 مامىردا ۋكراينا حالقىنىڭ الدىندا انت قابىلداعان ۆلاديمير زەلەنسكي ەلدى رەسەيدىڭ وزبىر ساياساتىنان قورعاپ، كيەۆ پەن ماسكەۋ قارىم-قاتىناسىن قايتا قارايتىنىن ايتقان. «ءبىز بىرىگۋىمىز كەرەك. سول كەزدە عانا مىقتى بولامىز. الەمدەگى بارلىق ۋكراينالىقتارعا ايتارىم – ءبىز 65 ميلليونبىز. سىزدەر بىزگە كەرەكسىزدەر، مىقتى دا قۋاتتى ۋكراينانى قۇرۋعا ارقايسىڭىز قاجەتسىزدەر. سىزدەرگە ۋكراينا ازاماتتىعىن بەرۋگە ۋادە بەرەمىن. بۇل – ءبىزدىڭ ۇلتتىق يدەيامىز»، – دەپ مالىمدەدى زەلەنسكي.

"The Qazaq Times"