Foto: https://24.kz/media

Süriyada 300-ge tarta Qazaqstan azamattarı bar: olardıñ jartısı kämeletke tolmağan balalar. Bwl turalı «Jusan-2» operaciyasına qatıstı ötken baspasöz mäslihatında QR Wlttıq qauipsizdik komitetiniñ departament basşısı Baqıtbek Rahımberdiev mälimdedi.

Qazaqstan azamattarın qaytaru boyınşa jürgizilgen şaralarğa qatıstı B.Rahımberdiev: «Ekstradiciya, deportaciya mäselesi osı jılı tolığımen ayaqtaladı degen ümitimiz bar. Olardıñ basım köpşiligin elimizge alıp kelemiz dep josparlap otırmız. Bwl bağıttağı qiındıqtarğa toqtalsaq, Süriyanı birneşe qarulı toptar basıp alğan. Bir jerlerde ükimettiñ zañdarı orındalsa, al keybir öñirlerde zañnamalıq negiz saqtalmağan. Osı orayda bwl toptarmen kelisimge kelu men bizdiñ azamattardı sol jerden alıp şığu qiındıq tudıradı. Biz öz erkimen elge keletinderdi qaytaramız. Olardıñ köpşiligi Qazaqstanğa oraluğa şın nietterin bildirip otır. Kelemiz degen adamdardı 7-9 mamırda qaytardıq. Al endi qalğan adamdarmen qosımşa jwmıstar jürgiziledi», – dep habarladı.

Mälimdemede aytılğanday, Qazaqstanğa kelgennen keyin 16 er adam men 4 äyel terroristik is-äreketke qatısı bar degen küdikpen twtqındalğan. Olar qılmıstıq isterin tergeu orındarı boyınşa Nwr-Swltan, Atırau, Oral, Aqtöbe, Qarağandı jäne Şımkent qalalarına berildi. Qalğan 55 äyel balasımen birge Aqtau qalası mañındağı arnayı oñaltu ortalığına bir ay merzimge ornalastırılğan. Medicinalıq tekserister ötkizilip, karantin belgilendi. Osığan deyin, yağni qañtardağı mälimet boyınşa Süriyada kämeletke tolğan 380 jäne kämeletke tolmağan 500-ge tarta qazaqstandıq bolğan.

"The Qazaq Times"