سۇرياداعى قازاقتار سانى ءمالىم بولدى

ءسۇريادا 300-گە تارتا قازاقستان ازاماتتارى بار: ولاردىڭ جارتىسى كامەلەتكە تولماعان بالالار. بۇل تۋرالى «جۋسان-2» وپەراتسياسىنا قاتىستى وتكەن ءباسپاسوز ءماسليحاتىندا قر ۇلتتىق قاۋىپسىزدىك كوميتەتىنىڭ دەپارتامەنت باسشىسى باقىتبەك راحىمبەرديەۆ مالىمدەدى.

قازاقستان ازاماتتارىن قايتارۋ بويىنشا جۇرگىزىلگەن شارالارعا قاتىستى ب.راحىمبەرديەۆ: «ەكستراديتسيا، دەپورتاتسيا ماسەلەسى وسى جىلى تولىعىمەن اياقتالادى دەگەن ءۇمىتىمىز بار. ولاردىڭ باسىم كوپشىلىگىن ەلىمىزگە الىپ كەلەمىز دەپ جوسپارلاپ وتىرمىز. بۇل باعىتتاعى قيىندىقتارعا توقتالساق، ءسۇريانى بىرنەشە قارۋلى توپتار باسىپ العان. ءبىر جەرلەردە ۇكىمەتتىڭ زاڭدارى ورىندالسا، ال كەيبىر وڭىرلەردە زاڭنامالىق نەگىز ساقتالماعان. وسى ورايدا بۇل توپتارمەن كەلىسىمگە كەلۋ مەن ءبىزدىڭ ازاماتتاردى سول جەردەن الىپ شىعۋ قيىندىق تۋدىرادى. ءبىز ءوز ەركىمەن ەلگە كەلەتىندەردى قايتارامىز. ولاردىڭ كوپشىلىگى قازاقستانعا ورالۋعا شىن نيەتتەرىن ءبىلدىرىپ وتىر. كەلەمىز دەگەن ادامداردى 7-9 مامىردا قايتاردىق. ال ەندى قالعان ادامدارمەن قوسىمشا جۇمىستار جۇرگىزىلەدى»، – دەپ حابارلادى.

مالىمدەمەدە ايتىلعانداي، قازاقستانعا كەلگەننەن كەيىن 16 ەر ادام مەن 4 ايەل تەرروريستىك ءىس-ارەكەتكە قاتىسى بار دەگەن كۇدىكپەن تۇتقىندالعان. ولار قىلمىستىق ىستەرىن تەرگەۋ ورىندارى بويىنشا نۇر-سۇلتان، اتىراۋ، ورال، اقتوبە، قاراعاندى جانە شىمكەنت قالالارىنا بەرىلدى. قالعان 55 ايەل بالاسىمەن بىرگە اقتاۋ قالاسى ماڭىنداعى ارنايى وڭالتۋ ورتالىعىنا ءبىر اي مەرزىمگە ورنالاستىرىلعان. مەديتسينالىق تەكسەرىستەر وتكىزىلىپ، كارانتين بەلگىلەندى. وسىعان دەيىن، ياعني قاڭتارداعى مالىمەت بويىنشا ءسۇريادا كامەلەتكە تولعان 380 جانە كامەلەتكە تولماعان 500-گە تارتا قازاقستاندىق بولعان.

"The Qazaq Times"