Täjikstanda audio-videoönimderdi zañdıq twrğıda retteumen aynalısatın "Täjikfil'm" blogerlerdiñ Youtube-ke  salğan videorolikterine baqılau ornatudı közdep otır. Salıq organ ökilderi özge azamattar siyaqtı olar da salıq töleui tiis dep esepteydi.

"Täjikfil'm" basşılığı Youtube jelisine resmi ötiniş jiberip, täjik blogerleriniñ videosın olardıñ rwqsatınsız jariyalamaudı swrap otır. "Täjikfil'm" kompaniyasınıñ jauaptı twlğaları jergilikti blogerler jasağan videokontentterdiñ sapasızdığın alğa tartadı. Al biliktiñ talpınısına narazı videoblogerler Youtube-tegi kontentterdiñ sapasın basqa joldarmen de jaqsartuğa bolatının aytıp, blogerler şığarmaşılığın şektemeu qajet deydi.

"Täjikfil'm" memlekettik kinostudiyasınıñ jetekşisi Nosir Rahmonnıñ aytuınşa, Täjikstan zañnamasına säykes audio-videomaterialdardı jasap şığaru üşin olardıñ avtorları resmi orındardan rwqsat swrauı tiis. Rahmon videoblogerlerdiñ jwmıs isteuine qarsı emestigin, biraq Youtube-ke salınğan videorolikterdiñ mazmwnı men sapasına alañdap otırğanın jetkizdi.

- Biz äueli videorolikterdiñ mazmwnın körip şığuımız qajet. Keybir rolikterdi qarağan kezde adamdar wyalıp ketedi. Youtube-ke özge el qoldanuşıları salğan rolikterdi qarasañız, janıñ demalıp qaladı. Al bizdikilerdiñ [kontentteriniñ] bäri "kolhoz", - dedi Rahmon.

Youtube-tiñ Täjikstanda ökildigi joq. Nosir Rahmonnıñ aytuınşa, olar Youtube-tiñ Resey jäne Qazaqstandağı ökildikterin tauıp, olarğa täjik blogerleriniñ videoların arnayı rwqsatsız jariyalamau turalı resmi türde ötiniş jibergen.

Soñğı jıldarı Youtube-ten ondağan täjik azamatı paraqşa aşıp, jii videomaterialdar jariyalap keledi. Onda ärtürli mäseleler qozğaladı: jergilikti narıqtağı kölik, bazardağı qoy nemese Täjikstannıñ ärtürli audandarındağı baspana bağası jäne özge mäseleler.

Al Täjikstannıñ salıq komitetiniñ ökili Zavkibek Şodien eldiñ salıq kodeksinde videoblogerlerden salıq alu turalı arnayı bap joqtığın, biraq olar da özge azamattar siyaqtı tabısınıñ bir böligin memleketke beru qajettigin ayttı.

"The Qazaq Times"