تاجىكستاندا اۋديو-ۆيدەوونىمدەردى زاڭدىق تۇرعىدا رەتتەۋمەن اينالىساتىن "تاجىكفيلم" بلوگەرلەردىڭ Youtube-كە  سالعان ۆيدەوروليكتەرىنە باقىلاۋ ورناتۋدى كوزدەپ وتىر. سالىق ورگان وكىلدەرى وزگە ازاماتتار سياقتى ولار دا سالىق تولەۋى ءتيىس دەپ ەسەپتەيدى.

"تاجىكفيلم" باسشىلىعى Youtube جەلىسىنە رەسمي ءوتىنىش جىبەرىپ، تاجىك بلوگەرلەرىنىڭ ۆيدەوسىن ولاردىڭ رۇقساتىنسىز جاريالاماۋدى سۇراپ وتىر. "تاجىكفيلم" كومپانياسىنىڭ جاۋاپتى تۇلعالارى جەرگىلىكتى بلوگەرلەر جاساعان ۆيدەوكونتەنتتەردىڭ ساپاسىزدىعىن العا تارتادى. ال بيلىكتىڭ تالپىنىسىنا نارازى ۆيدەوبلوگەرلەر Youtube-تەگى كونتەنتتەردىڭ ساپاسىن باسقا جولدارمەن دە جاقسارتۋعا بولاتىنىن ايتىپ، بلوگەرلەر شىعارماشىلىعىن شەكتەمەۋ قاجەت دەيدى.

"تاجىكفيلم" مەملەكەتتىك كينوستۋدياسىنىڭ جەتەكشىسى نوسير راحموننىڭ ايتۋىنشا، تاجىكستان زاڭناماسىنا سايكەس اۋديو-ۆيدەوماتەريالداردى جاساپ شىعارۋ ءۇشىن ولاردىڭ اۆتورلارى رەسمي ورىنداردان رۇقسات سۇراۋى ءتيىس. راحمون ۆيدەوبلوگەرلەردىڭ جۇمىس ىستەۋىنە قارسى ەمەستىگىن، بىراق Youtube-كە سالىنعان ۆيدەوروليكتەردىڭ مازمۇنى مەن ساپاسىنا الاڭداپ وتىرعانىن جەتكىزدى.

- ءبىز اۋەلى ۆيدەوروليكتەردىڭ مازمۇنىن كورىپ شىعۋىمىز قاجەت. كەيبىر روليكتەردى قاراعان كەزدە ادامدار ۇيالىپ كەتەدى. Youtube-كە وزگە ەل قولدانۋشىلارى سالعان روليكتەردى قاراساڭىز، جانىڭ دەمالىپ قالادى. ال بىزدىكىلەردىڭ [كونتەنتتەرىنىڭ] ءبارى "كولحوز", - دەدى راحمون.

Youtube-ءتىڭ تاجىكستاندا وكىلدىگى جوق. نوسير راحموننىڭ ايتۋىنشا، ولار Youtube-ءتىڭ رەسەي جانە قازاقستانداعى وكىلدىكتەرىن تاۋىپ، ولارعا تاجىك بلوگەرلەرىنىڭ ۆيدەولارىن ارنايى رۇقساتسىز جاريالاماۋ تۋرالى رەسمي تۇردە ءوتىنىش جىبەرگەن.

سوڭعى جىلدارى Youtube-تەن ونداعان تاجىك ازاماتى پاراقشا اشىپ، ءجيى ۆيدەوماتەريالدار جاريالاپ كەلەدى. وندا ءارتۇرلى ماسەلەلەر قوزعالادى: جەرگىلىكتى نارىقتاعى كولىك، بازارداعى قوي نەمەسە تاجىكستاننىڭ ءارتۇرلى اۋداندارىنداعى باسپانا باعاسى جانە وزگە ماسەلەلەر.

ال تاجىكستاننىڭ سالىق كوميتەتىنىڭ وكىلى زاۆكيبەك شوديەن ەلدىڭ سالىق كودەكسىندە ۆيدەوبلوگەرلەردەن سالىق الۋ تۋرالى ارنايى باپ جوقتىعىن، بىراق ولار دا وزگە ازاماتتار سياقتى تابىسىنىڭ ءبىر بولىگىن مەملەكەتكە بەرۋ قاجەتتىگىن ايتتى.

"The Qazaq Times"