Almatı qalasında Ğalım Jaylıbaydıñ «Swlubaydıñ äni» kitabınıñ twsaukeseri ötti. «Er Jänibek» halıqaralıq qoğamdıq qorınıñ qoldauımen jarıq körgen kitap qazaq, türik, orıs jäne ağılşın tilinde jarıq körgen.

«Swlubaydıñ äni» attı dastannıñ twsauın Halıq jazuşısı Qabdeş Jwmadilov, akademik, dintanuşı Äbsattar qajı Derbisäli, körnekti jazuşı Maral Isqaqbay, memlekettik sıyılıqtıñ iegeri Säbit Dosanov, Jazuşılar Odağınıñ törağası Wlıqbek Esdäulet, wyğır ädebietiniñ aqsaqalı Ahmetjan Äşiri, ardagerler keñesiniñ törağası Hamit Birjanovtar kesti.

Bwdan bölek şarağa qoğam qayratkerleri, körnekti aqın, jazuşılar, akademikater Baltaş Twrsınbay, Danday Isqaq, Hankeldi Äbjanov, Bibigül Imanğazina, Küläş Ahmetova, Islam Jemeney, Tınımbay Nwrmağanbetov, Beybit Qoyşıbay, Jaqau Däurenbek, Uälihan Qalijan, Temirhan Tebegenov, Nwrtileu Imanğali, Kenjehan Matjan, Jwmabay Bayahmet, Jädi Şäken, Almas Ahmetbek, Mağiza Qwnapiya sındı azamattar men Almatı äkiminiñ keñesşisi Mamay Ahlet jäne kitaphanalar jüyesiniñ qızmetkerleri, JOO-nıñ tülekteri qatıstı.

Ğalım Jaylıbay, aqın: «Swlubaydıñ äni» kitabınıñ jazıluında Qıtay qazaqtarınan jetip jatqan türli habarlar äser etken bolu kerek... Men endi ol jaqtı köp aralağan qazaqtıñ birimin. Swlubay degen aqın ötken. Ospan batırdıñ köterilisine qatısqan. 37 jasında opat bolğan. Sol kisiniñ:

« Basında mäuesi joq qu qayıñnıñ,

Jigitke paydası joq uayımnıñ.

San jerdiñ dämin tatıp, suın iştim,

Bilmeymin qayda aların qwdayımnıñ.

Qayqaya şapqan qarager,

Qayrılar ma eken qara jer» - degen äni bar. Sol qattı äser etti. Jalpı, men köp izdendim. Segiz bölimnen twratın poema jazıp şıqtım. Bwnıñ işinde köp dünie bar dep oylaymın.

Jürsin Erman, aqın: Bügin qazaqtıñ körnekti aqını Ğalım Jaylıbaydıñ «Swlubaydıñ äni» degen kitabınıñ twsauın keseyin dep twrmız. Ğalım kitap şığarmay jürgen adam emes. Soñğı jıldarı şığarmaları molınan jarıq körip jür. Mına kitaptıñ erekşeligi, bwl tört tilde jarıq körgen kitap. «Swlubaydıñ äni» degen dastanı qazaqşa, türkişe, orısşa, ağılşınşa basılıp, baspadan qanat qağıp wşıp, halıqtıñ qolına tiip jatır. Bwl dastannıñ taqırıbı da kürdeli. Qazir bizdiñ arğı bettegi qandastarımızdıñ basına kün tuıp twrğan kezde der kezinde jazılğan kitap. Qazaqtıñ arğı bette de biraz batırları bolğan. Keşegi Ospan batır, Zuqa batırlar Täuelsizdik üşin arparısqan. Mına Swlubay da batır, seri, sal, tağdırı şerli adam. Sol sebepti bwnı şerli dastan dep atauğa boladı. Sol Swlubaydıñ bizge jetken äniniñ negizinde aqınnıñ jüregine şoq bolıp tüsken. Bwl äli talay äñgimege arqau bolatın dastan. Jalpı, Ğalım dastan jazuğa beyimdelip jürgen ülken aqındarımızdıñ biri.

Jeñis Türkiya, «Er Jänibek» qorınıñ prezidenti: Bügin şığıp otırğan «Swlubaydıñ äni» kitabı ötken ğasırdıñ 1930-1940 jıldarı Qıtaydığı qazaq halqınıñ tağdırın büginmen wştastırğan keñ kölemde jazılğan ülken şığarma dep otırmız. Jalpı, bwl poema, tarihi roman emes. Sondıqtan onda adamnıñ sezimi, tabiğatı, erligi turalı tolıq bayandalğan dep ayta alamın. Qazaqi jüregi bar adamdarğa bwl öte tüsinikti, tıñ tuındı.

 

"The Qazaq Times"