Ukraina Reseydi halıqaralıq sotqa berdi

Ukraina Reseydi halıqaralıq sotqa berdi.

Eldiñ sırtqı ister ministrligi Resey 2018 jılı qaraşada Qara teñizde wstağan teñizşilerdi bosatu talabımen teñiz qwqığı jönindegi halıqaralıq sotqa jügindi. Ukraina prezidenti Petr Poroşenko öziniñ Feysbuk paraqşasında: «Jaqın arada halıqaralıq sot ädil şeşim şığarıp, Resey ukrain teñizşilerin bosatadı degen senimdemiz. Reseydiñ twtqında wstap otırğandardı bosatuğa äli de mümkindigi bar. Bolğan oqiğadan keyin sot Kreml' halıqaralıq qılmıs jasadı degen şeşim şığaruı tiis», – dep jazdı.

Kievtiñ sotqa arızdanuına qatıstı Resey SİM: «Teñiz qwqığı boyınşa halıqaralıq sottıñ Qara teñizdegi jağdaydı qarauına eş qwzırı joq», – degen jauap qaytardı.

25 qaraşada Resey Kerş bwğazında Ukraina äskeri-teñiz küşteriniñ üş kemesin basıp alıp, oq atqan. Ukraina prezidenti Petr Poroşenko Reseydiñ bwl äreketin «basqınşılıq» dep atap, olardan Azov teñizinde wstalğan Ukraina äskeri kemeleri men teñizşilerin dereu bosatudı talap etti. Al Mäskeu ukraindıq kemeler Resey şekarasın bwzdı dep ayıptadı. Osı jağdaydan keyin, 20 jeltoqsanda AQŞ tarapı Reseydiñ «agressiyalıq sayasatına» qarsı qarar qabıldağan bolatın. Kiev pen Mäskeu teketiresine qatıstı qabıldanğan AQŞ Senatınıñ rezolyuciyası halıqaralıq deñgeyde tanılğan şekaralar boyınşa eki jaqtı kelisimderge qoldau körsetuge jäne Kerş bwğazı men Azov teñizi arqılı kemelerdiñ qauipsiz ötuin qamtamasız etuge bağıttalğan. Senatorlar mwnday qadam «Reseydiñ şamadan tıs aumaqtıq qaqtığıstarına toytarıs beredi» dep sanaydı. Bwğan qatıstı Senat komitetiniñ törağası Ron Djonson: «AQŞ pen bizdiñ odaqtastarımız Kerş bwğazındağı Reseydiñ äskeri agressiyasına tez arada batıl qadam jasau arqılı jauap beredi. Halıqaralıq teñiz operaciyasın jürgizu Qara teñizden Azovqa deyin qauipsizdikti qamtamasız etui tiis», – deydi.

«Ukraina – erkin älemge qarsı Vladimir Putin bastağan küres maydanınıñ aldıñğı qatarında. Ukraina Amerika nemese Europağa olardıñ ornına soğıs jürgizudi eşqaşan swrağan emes. Ukraindıqtar bizdiñ kömekke mwqtaj jäne oğan äbden layıq», – dep mälimdedi AQŞ Qarulı Küşter komitetiniñ basşısı, senator Inhof. Kerş bwğazındağı kemelerdi basıp alu, onıñ pikirinşe, Resey – Ukraina qaqtığısınıñ qauipti eskalaciyası.

"The Qazaq Times"