ۋكراينا رەسەيدى حالىقارالىق سوتقا بەردى

ۋكراينا رەسەيدى حالىقارالىق سوتقا بەردى.

ەلدىڭ سىرتقى ىستەر مينيسترلىگى رەسەي 2018 جىلى قاراشادا قارا تەڭىزدە ۇستاعان تەڭىزشىلەردى بوساتۋ تالابىمەن تەڭىز قۇقىعى جونىندەگى حالىقارالىق سوتقا جۇگىندى. ۋكراينا پرەزيدەنتى پەتر پوروشەنكو ءوزىنىڭ فەيسبۋك پاراقشاسىندا: «جاقىن ارادا حالىقارالىق سوت ءادىل شەشىم شىعارىپ، رەسەي ۋكراين تەڭىزشىلەرىن بوساتادى دەگەن سەنىمدەمىز. رەسەيدىڭ تۇتقىندا ۇستاپ وتىرعانداردى بوساتۋعا ءالى دە مۇمكىندىگى بار. بولعان وقيعادان كەيىن سوت كرەمل حالىقارالىق قىلمىس جاسادى دەگەن شەشىم شىعارۋى ءتيىس»، – دەپ جازدى.

كيەۆتىڭ سوتقا ارىزدانۋىنا قاتىستى رەسەي ءسىم: «تەڭىز قۇقىعى بويىنشا حالىقارالىق سوتتىڭ قارا تەڭىزدەگى جاعدايدى قاراۋىنا ەش قۇزىرى جوق»، – دەگەن جاۋاپ قايتاردى.

25 قاراشادا رەسەي كەرش بۇعازىندا ۋكراينا اسكەري-تەڭىز كۇشتەرىنىڭ ءۇش كەمەسىن باسىپ الىپ، وق اتقان. ۋكراينا پرەزيدەنتى پەتر پوروشەنكو رەسەيدىڭ بۇل ارەكەتىن «باسقىنشىلىق» دەپ اتاپ، ولاردان ازوۆ تەڭىزىندە ۇستالعان ۋكراينا اسكەري كەمەلەرى مەن تەڭىزشىلەرىن دەرەۋ بوساتۋدى تالاپ ەتتى. ال ماسكەۋ ۋكرايندىق كەمەلەر رەسەي شەكاراسىن بۇزدى دەپ ايىپتادى. وسى جاعدايدان كەيىن، 20 جەلتوقساندا اقش تاراپى رەسەيدىڭ «اگرەسسيالىق ساياساتىنا» قارسى قارار قابىلداعان بولاتىن. كيەۆ پەن ماسكەۋ تەكەتىرەسىنە قاتىستى قابىلدانعان اقش سەناتىنىڭ رەزوليۋتسياسى حالىقارالىق دەڭگەيدە تانىلعان شەكارالار بويىنشا ەكى جاقتى كەلىسىمدەرگە قولداۋ كورسەتۋگە جانە كەرش بۇعازى مەن ازوۆ تەڭىزى ارقىلى كەمەلەردىڭ قاۋىپسىز ءوتۋىن قامتاماسىز ەتۋگە باعىتتالعان. سەناتورلار مۇنداي قادام «رەسەيدىڭ شامادان تىس اۋماقتىق قاقتىعىستارىنا تويتارىس بەرەدى» دەپ سانايدى. بۇعان قاتىستى سەنات كوميتەتىنىڭ توراعاسى رون دجونسون: «اقش پەن ءبىزدىڭ وداقتاستارىمىز كەرش بۇعازىنداعى رەسەيدىڭ اسكەري اگرەسسياسىنا تەز ارادا باتىل قادام جاساۋ ارقىلى جاۋاپ بەرەدى. حالىقارالىق تەڭىز وپەراتسياسىن جۇرگىزۋ قارا تەڭىزدەن ازوۆقا دەيىن قاۋىپسىزدىكتى قامتاماسىز ەتۋى ءتيىس»، – دەيدى.

«ۋكراينا – ەركىن الەمگە قارسى ۆلاديمير پۋتين باستاعان كۇرەس مايدانىنىڭ الدىڭعى قاتارىندا. ۋكراينا امەريكا نەمەسە ەۋروپاعا ولاردىڭ ورنىنا سوعىس جۇرگىزۋدى ەشقاشان سۇراعان ەمەس. ۋكرايندىقتار ءبىزدىڭ كومەككە مۇقتاج جانە وعان ابدەن لايىق»، – دەپ مالىمدەدى اقش قارۋلى كۇشتەر كوميتەتىنىڭ باسشىسى، سەناتور ينحوف. كەرش بۇعازىنداعى كەمەلەردى باسىپ الۋ، ونىڭ پىكىرىنشە، رەسەي – ۋكراينا قاقتىعىسىنىڭ قاۋىپتى ەسكالاتسياسى.

"The Qazaq Times"