F-35 jauıngerlik wşağı. Foto: VOA

Japoniyanıñ Nikkei News aqparattıq agenttiginiñ jeksenbi küngi habarında, AQŞ pen Japoniya bwrın soñdı bolmağan auqımdı izdestiru jäne qwtqaru jwmısına mol qarajat audara otırıp, apatqa wşırağan F-35 wşağınıñ qaldıqtarın izdestirmek. Odaqtas elder jauıngerlik wşağınıñ qaldıqtarın Resey men Qıtaydan bwrın tabuğa tırısuda.

Ötken aptada Japon teñizi jağalauında F-35 wşağı radardan joğalıp ketken bolatın. Äue küşteriniñ aybını sanalatın bwl wşaqtı izdestiruge P-8A patrul'dik wşağı, «Sterling» attı äskeri keme jäne  B-52 bombalauşı wşağı qatarlı birqatar ozıq äskeri tehnikalar tartılğan bolatın.

Qwlağan wşaqtıñ bölşekterin izdestiruge Resey men Qıtay da qıruar küş jigerin jwmsağan bolatın. Sebebi, F-35 jauıngerlik wşağınıñ qwpiyasın Resey men Qıtay qolğa tüsiretin bolsa üş eldiñ äue küşteriniñ teñgeriminde ülken özgerister boluı mümkin.

AQŞ F-35 jauıngerlik wşağın damıtu üşin wzaq jıldar men milliardtağan qarjı jwmsağan. Qazirgi kezde bwl wşaqtıñ keybir mümkindikteri özge eşbir wşaqtarda joq. Aytalıq, ol özine bağıttalğan zımırandardı qiratuğa, jıldam wşıp-qonuğa qabiletti. Sonday-aq, wşaq Qıtay men Reseydiñ zımıran jüyelerine qarsı küresuge de qabiletti. F-35 wşağın paydalanu qwqığına  AQŞ, Japoniya, Wlıbritaniya, Australiya, Türkiya qatarlı sanaulı elder ğana ie.

Mälimetterge qarağanda, Qıtay qorğanıs küşteri kiber-şabuıldar arqılı F-35 wşağın öndiruge qatıstı keybir sızbalardı qolğa tüsirgen. Eger, F-35 wşağınıñ bir nwsqasın qolğa tüsiretin bolsa bwl osı soğıs wşağın zertteu jwmısın nedäuir jeñildetpek. Bwl jäne Qıtay men AQŞ arasındağı äue küşteriniñ qazirgi ayırmaşılığın qısqartadı.

“The Qazaq Times”