F-35 جاۋىنگەرلىك ۇشاعى. فوتو: VOA

جاپونيانىڭ Nikkei News اقپاراتتىق اگەنتتىگىنىڭ جەكسەنبى كۇنگى حابارىندا، اقش پەن جاپونيا بۇرىن سوڭدى بولماعان اۋقىمدى ىزدەستىرۋ جانە قۇتقارۋ جۇمىسىنا مول قاراجات اۋدارا وتىرىپ، اپاتقا ۇشىراعان F-35 ۇشاعىنىڭ قالدىقتارىن ىزدەستىرمەك. وداقتاس ەلدەر جاۋىنگەرلىك ۇشاعىنىڭ قالدىقتارىن رەسەي مەن قىتايدان بۇرىن تابۋعا تىرىسۋدا.

وتكەن اپتادا جاپون تەڭىزى جاعالاۋىندا F-35 ۇشاعى راداردان جوعالىپ كەتكەن بولاتىن. اۋە كۇشتەرىنىڭ ايبىنى سانالاتىن بۇل ۇشاقتى ىزدەستىرۋگە P-8A پاترۋلدىك ۇشاعى، «Sterling» اتتى اسكەري كەمە جانە  B-52 بومبالاۋشى ۇشاعى قاتارلى بىرقاتار وزىق اسكەري تەحنيكالار تارتىلعان بولاتىن.

قۇلاعان ۇشاقتىڭ بولشەكتەرىن ىزدەستىرۋگە رەسەي مەن قىتاي دا قىرۋار كۇش جىگەرىن جۇمساعان بولاتىن. سەبەبى، F-35 جاۋىنگەرلىك ۇشاعىنىڭ قۇپياسىن رەسەي مەن قىتاي قولعا تۇسىرەتىن بولسا ءۇش ەلدىڭ اۋە كۇشتەرىنىڭ تەڭگەرىمىندە ۇلكەن وزگەرىستەر بولۋى مۇمكىن.

اقش F-35 جاۋىنگەرلىك ۇشاعىن دامىتۋ ءۇشىن ۇزاق جىلدار مەن ميللياردتاعان قارجى جۇمساعان. قازىرگى كەزدە بۇل ۇشاقتىڭ كەيبىر مۇمكىندىكتەرى وزگە ەشبىر ۇشاقتاردا جوق. ايتالىق، ول وزىنە باعىتتالعان زىمىرانداردى قيراتۋعا، جىلدام ۇشىپ-قونۋعا قابىلەتتى. سونداي-اق، ۇشاق قىتاي مەن رەسەيدىڭ زىمىران جۇيەلەرىنە قارسى كۇرەسۋگە دە قابىلەتتى. F-35 ۇشاعىن پايدالانۋ قۇقىعىنا  اقش، جاپونيا، ۇلىبريتانيا، اۋستراليا، تۇركيا قاتارلى ساناۋلى ەلدەر عانا يە.

مالىمەتتەرگە قاراعاندا، قىتاي قورعانىس كۇشتەرى كيبەر-شابۋىلدار ارقىلى F-35 ۇشاعىن وندىرۋگە قاتىستى كەيبىر سىزبالاردى قولعا تۇسىرگەن. ەگەر، F-35 ۇشاعىنىڭ ءبىر نۇسقاسىن قولعا تۇسىرەتىن بولسا بۇل وسى سوعىس ۇشاعىن زەرتتەۋ جۇمىسىن نەداۋىر جەڭىلدەتپەك. بۇل جانە قىتاي مەن اقش اراسىنداعى اۋە كۇشتەرىنىڭ قازىرگى ايىرماشىلىعىن قىسقارتادى.

“The Qazaq Times”