Foto: https://tengrinews.kz

Şımkentte mektep oquşıları belgisiz iisten ulanıp, saldarınan 45 adam auruhanağa jetkizilgen.

Tötenşe jağday Intımaq aqşam audanındağı №54 mektepte orın alğan. Qalalıq bilim bölimi  taratqan habarlamada: «16:53-ter şamasında №54 mektepte 25 adam belgisiz iisten ulanıp qalğan. Balalardıñ bası aynalğan. Oqu ornında negizinen ekinşi auısımdağı  4-7 sınıp oquşıları bolğan. Oqiğa ornına TJD basşılıq qwramı men «InterGazOrtalıqAziya» mekemesiniñ arnayı brigadası,  SES, «KazGidroMedcentr» mamandarı keldi. Mektep ğimaratınan 100-ge tarta wstaz ben tehnikalıq qızmetkerler, 877 oquşı sırtqa şığarılıp, sabaq toqtatıldı. Jauaptı mamandar oqiğa ornında iisti tekserip, ğimarattı tolıqtay qarap şıqqan. Nätijesinde gazdıñ nemese basqa da zattıñ iisi anıqtalmağan. Mamandar sırttağı auada iistiñ boluı mümkin degen qortındı jasağan. Öytkeni mekteptiñ jıluı toqtatılğan. Al sınıptardağı terezeler aşıq bolğan»,– delingen.

Mälimetter boyınşa, toksikologiyalıq ortalıqqa barlığı 45 adam tüsken. Qazirgi uaqıtta därigerlik tekseru jürgizilip jatır. Alayda, oqiğa saldarı äli de anıqtalğan joq.

"The Qazaq Times"