شىمكەنتتە ۋلانعاندار سانى ارتتى

شىمكەنتتە مەكتەپ وقۋشىلارى بەلگىسىز يىستەن ۋلانىپ، سالدارىنان 45 ادام اۋرۋحاناعا جەتكىزىلگەن.

توتەنشە جاعداي ىنتىماق اقشام اۋدانىنداعى №54 مەكتەپتە ورىن العان. قالالىق ءبىلىم ءبولىمى  تاراتقان حابارلامادا: «16:53-تەر شاماسىندا №54 مەكتەپتە 25 ادام بەلگىسىز يىستەن ۋلانىپ قالعان. بالالاردىڭ باسى اينالعان. وقۋ ورنىندا نەگىزىنەن ەكىنشى اۋىسىمداعى  4-7 سىنىپ وقۋشىلارى بولعان. وقيعا ورنىنا تجد باسشىلىق قۇرامى مەن «ينتەرگازورتالىقازيا» مەكەمەسىنىڭ ارنايى بريگاداسى،  سەس، «كازگيدرومەدتسەنتر» ماماندارى كەلدى. مەكتەپ عيماراتىنان 100-گە تارتا ۇستاز بەن تەحنيكالىق قىزمەتكەرلەر، 877 وقۋشى سىرتقا شىعارىلىپ، ساباق توقتاتىلدى. جاۋاپتى ماماندار وقيعا ورنىندا ءيىستى تەكسەرىپ، عيماراتتى تولىقتاي قاراپ شىققان. ناتيجەسىندە گازدىڭ نەمەسە باسقا دا زاتتىڭ ءيىسى انىقتالماعان. ماماندار سىرتتاعى اۋادا ءيىستىڭ بولۋى مۇمكىن دەگەن قورتىندى جاساعان. ويتكەنى مەكتەپتىڭ جىلۋى توقتاتىلعان. ال سىنىپتارداعى تەرەزەلەر اشىق بولعان»،– دەلىنگەن.

مالىمەتتەر بويىنشا، توكسيكولوگيالىق ورتالىققا بارلىعى 45 ادام تۇسكەن. قازىرگى ۋاقىتتا دارىگەرلىك تەكسەرۋ جۇرگىزىلىپ جاتىر. الايدا، وقيعا سالدارى ءالى دە انىقتالعان جوق.

"The Qazaq Times"