Photo: Uznews.uz; Aqparat jäne bwqaralıq kommunikaciyalar agenttiginiñ direktorı Komil Allamjonov

BAQ ökilderine tiisti qızmet körsetpegen özbek şeneunikteri jazalanatın boladı. Bwl turalı 5 naurızda ötken döñgelek üstelde Özbek Prezidenti Äkimşiligi janındağı Aqparat jäne bwqaralıq kommunikaciyalar agenttiginiñ direktorı Komil Allamjonov ayttı.

"Jurnalisterge tiisti qızmet körsetpey, olarğa qanday da bir kedergi jasağan şeneunikter jazağa tartılatın boladı", - dedi ol.

Sonday- aq, onıñ aytuınşa, özbek ministrlikteri men vedomstvolarınıñ baspasöz qızmeti dwrıs jwmıs istemeydi.

"Baspasöz hatşısınıñ lauazımı köptegen adamdardı qızıqtırmaydı.Sol sebepti, ministrlikter men vedomstvolardağı bos orındar az emes. Nelikten? Öytkeni, basşılar baspasöz qızmetimen sanaspaydı. Aqparattıq sayasattı jüzege asıruda baspasöz hatşılardıñ röli bayqalmaydı", - dep atap ötti mekeme basşısı.

Sonday-aq, Komil Allamjonov Aqparat jäne bwqaralıq kommunikaciyalar agenttiginiñ direktorı retinde, bwqaralıq aqparat qwraldarınıñ jwmısın rettep, olarğa «törtinşi bilik» märtebesin qaytaruğa uäde etti.

Aytqanday, körşi memlekettegi jağday qazaqstandıq BAQ ökilderine de tañsıq emes. Sebebi, elimizdegi memlekettik organdar men vedomstvolardan uaqıtılı aqparat alu qiın. Resmi türde hat joldap, jauabın alu üşin keminde bir apta kütu qajet.

Sonday-aq, ayta ketu kerek, jıldıñ basında QR Aqparat jäne baylanıs ministrligi is-şaralarğa BAQ ökilderin akkreditteu erejelerin özgertuge qatıstı zañ jobasın dayındağan edi. Jurnalisterdiñ pikirinşe, jobağa engiziletin tüzetuler Konstituciyağa jäne BAQ turalı zañğa qayşı jäne söz bostandığın şekteydi. Mäselen, jurnalister spikerlerge "ıñğaysız" swraqtar qoysa, akkreditaciyadan ayırılıp qaluı mümkin.

Sonımen birge, esteriñizde bolsa, osıdan biraz uaqıt bwrın ekonomika vice-ministri Serik Jwmanğarin jurnalisterdiñ tarifterdiñ arzandauına qatıstı saualına: «Sizder mına jerge menen tarifter jöninde swrauğa keldiñizder me? Mağan resmi türde keliñizder. Men sizderge tarifter jöninde basınan ayağına deyin aytıp beremin. Jınımdı keltirmeñizşi», - dep jauap bergen bolatın.

"The Qazaq Times"