باق وكىلدەرىنىڭ قىزمەتىنە كەدەرگى كەلتىرگەن شەنەۋنىكتەر جازالاناتىن بولادى

باق وكىلدەرىنە ءتيىستى قىزمەت كورسەتپەگەن وزبەك شەنەۋنىكتەرى جازالاناتىن بولادى. بۇل تۋرالى 5 ناۋرىزدا وتكەن دوڭگەلەك ۇستەلدە وزبەك پرەزيدەنتى اكىمشىلىگى جانىنداعى اقپارات جانە بۇقارالىق كوممۋنيكاتسيالار اگەنتتىگىنىڭ ديرەكتورى كوميل اللامجونوۆ ايتتى.

"جۋرناليستەرگە ءتيىستى قىزمەت كورسەتپەي، ولارعا قانداي دا ءبىر كەدەرگى جاساعان شەنەۋنىكتەر جازاعا تارتىلاتىن بولادى", - دەدى ول.

سونداي- اق، ونىڭ ايتۋىنشا، وزبەك مينيسترلىكتەرى مەن ۆەدومستۆولارىنىڭ ءباسپاسوز قىزمەتى دۇرىس جۇمىس ىستەمەيدى.

ء"باسپاسوز حاتشىسىنىڭ لاۋازىمى كوپتەگەن ادامداردى قىزىقتىرمايدى.سول سەبەپتى، مينيسترلىكتەر مەن ۆەدومستۆولارداعى بوس ورىندار از ەمەس. نەلىكتەن؟ ويتكەنى، باسشىلار ءباسپاسوز قىزمەتىمەن ساناسپايدى. اقپاراتتىق ساياساتتى جۇزەگە اسىرۋدا ءباسپاسوز حاتشىلاردىڭ ءرولى بايقالمايدى", - دەپ اتاپ ءوتتى مەكەمە باسشىسى.

سونداي-اق، كوميل اللامجونوۆ اقپارات جانە بۇقارالىق كوممۋنيكاتسيالار اگەنتتىگىنىڭ ديرەكتورى رەتىندە، بۇقارالىق اقپارات قۇرالدارىنىڭ جۇمىسىن رەتتەپ، ولارعا «ءتورتىنشى بيلىك» مارتەبەسىن قايتارۋعا ۋادە ەتتى.

ايتقانداي، كورشى مەملەكەتتەگى جاعداي قازاقستاندىق باق وكىلدەرىنە دە تاڭسىق ەمەس. سەبەبى، ەلىمىزدەگى مەملەكەتتىك ورگاندار مەن ۆەدومستۆولاردان ۋاقىتىلى اقپارات الۋ قيىن. رەسمي تۇردە حات جولداپ، جاۋابىن الۋ ءۇشىن كەمىندە ءبىر اپتا كۇتۋ قاجەت.

سونداي-اق، ايتا كەتۋ كەرەك، جىلدىڭ باسىندا قر اقپارات جانە بايلانىس مينيسترلىگى ءىس-شارالارعا باق وكىلدەرىن اككرەديتتەۋ ەرەجەلەرىن وزگەرتۋگە قاتىستى زاڭ جوباسىن دايىنداعان ەدى. جۋرناليستەردىڭ پىكىرىنشە، جوباعا ەنگىزىلەتىن تۇزەتۋلەر كونستيتۋتسياعا جانە باق تۋرالى زاڭعا قايشى جانە ءسوز بوستاندىعىن شەكتەيدى. ماسەلەن، جۋرناليستەر سپيكەرلەرگە "ىڭعايسىز" سۇراقتار قويسا، اككرەديتاتسيادان ايىرىلىپ قالۋى مۇمكىن.

سونىمەن بىرگە، ەستەرىڭىزدە بولسا، وسىدان ءبىراز ۋاقىت بۇرىن ەكونوميكا ۆيتسە-ءمينيسترى سەرىك جۇمانعارين جۋرناليستەردىڭ تاريفتەردىڭ ارزانداۋىنا قاتىستى ساۋالىنا: «سىزدەر مىنا جەرگە مەنەن تاريفتەر جونىندە سۇراۋعا كەلدىڭىزدەر مە؟ ماعان رەسمي تۇردە كەلىڭىزدەر. مەن سىزدەرگە تاريفتەر جونىندە باسىنان اياعىنا دەيىن ايتىپ بەرەمىن. جىنىمدى كەلتىرمەڭىزشى»، - دەپ جاۋاپ بەرگەن بولاتىن.

"The Qazaq Times"