Mıqtıbek Äbdildaev. foto: sputnik.kg

Qırğızstan Joğarğı Keneşiniñ kezekti parlament jiınında «Bir bol» frakciyasınıñ deputatı Mıqtıbek Äbdildaev 2020 jıldıñ birinşi qañtarınan bastap jwmısın bastaytın alqabiler sotı turalı taqırıp köterdi.

Joğarğı Keneş otırısında söz alğan deputat sot qızmetkerleriniñ qalay tañdalatındığı, jwmıstıñ qalay jürgiziletini men olardı kim oqıtatındığı turalı taqırıptı qozğadı.

Qırğızstan Joğarğı sotınıñ basşısı Gülbar Qalieva: «Eñ alğaş bizge ğimarat kerek. Osığan baylanıstı 2019 jılı jaña orınnıñ qwrılısı bastaladı dep josparlanuda. Sonday-aq, biz sot qızmetkerlerin oqıtuğa mindetti emespiz.  Jergilikti bilik orındarı mamandardıñ tizimin jasap şığaradı» dep, kesip aytıp sot turalı zañnıñ qabıldanıp qoyğandığın jetkizdi.

Alayda, Qalievanıñ jalpılama jauabı qanağattandırmağandıqtan, deputat Äbdildaev sınnıñ astına aldı.

«Qalieva ärbir bölimge naqtı jauap bere almadı. Mwnday mardımsız äñgimeni 10 sınıp oquşısı da ayta aldı. Men qanday da bir şaralardıñ ötetindigin, bwl şaralardı qarjılandırudı, sot mamandarın qalay tañdap alu men olardı oqıtu turalı naqtı jauap alğım kelgen. Bwdan keyin ğana jaña ğimaratqa dayındıq pen qabıldanğan zañ turalı şeşimge jauap alu közdeldi» dep, sot orındarınıñ äli de bolsa naqtı jauaptan jaltaratındığın tilge tiek etti.

Esteriñizge sala keteyik, soñğı uaqıtta Qırğızstan biligi sot qızmetkerleriniñ salğırttığına qattı narazı. Bilimsiz kadrlerdiñ kesirinen talay ükim qate şığarıldı. Osığan baylanıstı 2020 jıldan bastap sot qızmetine jañadan mamandardı tañdap alu qarastırılıp otır.

"The Qazaq Times"