مىقتىبەك ابدىلداەۆ. فوتو: sputnik.kg

قىرعىزستان جوعارعى كەنەشىنىڭ كەزەكتى پارلامەنت جيىنىندا «ءبىر بول» فراكتسياسىنىڭ دەپۋتاتى مىقتىبەك ابدىلداەۆ 2020 جىلدىڭ ءبىرىنشى قاڭتارىنان باستاپ جۇمىسىن باستايتىن القابيلەر سوتى تۋرالى تاقىرىپ كوتەردى.

جوعارعى كەنەش وتىرىسىندا ءسوز العان دەپۋتات سوت قىزمەتكەرلەرىنىڭ قالاي تاڭدالاتىندىعى، جۇمىستىڭ قالاي جۇرگىزىلەتىنى مەن ولاردى كىم وقىتاتىندىعى تۋرالى تاقىرىپتى قوزعادى.

قىرعىزستان جوعارعى سوتىنىڭ باسشىسى گۇلبار قاليەۆا: «ەڭ العاش بىزگە عيمارات كەرەك. وسىعان بايلانىستى 2019 جىلى جاڭا ورىننىڭ قۇرىلىسى باستالادى دەپ جوسپارلانۋدا. سونداي-اق، ءبىز سوت قىزمەتكەرلەرىن وقىتۋعا مىندەتتى ەمەسپىز.  جەرگىلىكتى بيلىك ورىندارى مامانداردىڭ ءتىزىمىن جاساپ شىعارادى» دەپ، كەسىپ ايتىپ سوت تۋرالى زاڭنىڭ قابىلدانىپ قويعاندىعىن جەتكىزدى.

الايدا، قاليەۆانىڭ جالپىلاما جاۋابى قاناعاتتاندىرماعاندىقتان، دەپۋتات ابدىلداەۆ سىننىڭ استىنا الدى.

«قاليەۆا ءاربىر بولىمگە ناقتى جاۋاپ بەرە المادى. مۇنداي ماردىمسىز اڭگىمەنى 10 سىنىپ وقۋشىسى دا ايتا الدى. مەن قانداي دا ءبىر شارالاردىڭ وتەتىندىگىن، بۇل شارالاردى قارجىلاندىرۋدى، سوت ماماندارىن قالاي تاڭداپ الۋ مەن ولاردى وقىتۋ تۋرالى ناقتى جاۋاپ العىم كەلگەن. بۇدان كەيىن عانا جاڭا عيماراتقا دايىندىق پەن قابىلدانعان زاڭ تۋرالى شەشىمگە جاۋاپ الۋ كوزدەلدى» دەپ، سوت ورىندارىنىڭ ءالى دە بولسا ناقتى جاۋاپتان جالتاراتىندىعىن تىلگە تيەك ەتتى.

ەستەرىڭىزگە سالا كەتەيىك، سوڭعى ۋاقىتتا قىرعىزستان بيلىگى سوت قىزمەتكەرلەرىنىڭ سالعىرتتىعىنا قاتتى نارازى. ءبىلىمسىز كادرلەردىڭ كەسىرىنەن تالاي ۇكىم قاتە شىعارىلدى. وسىعان بايلانىستى 2020 جىلدان باستاپ سوت قىزمەتىنە جاڭادان مامانداردى تاڭداپ الۋ قاراستىرىلىپ وتىر.

"The Qazaq Times"