Lauazımın saqtap qalğan prem'er-ministr. Foto: REUTERS. .

Britaniyanıñ joğarı biliginde eldiñ prem'er-ministriniñ qızmetin jalğastıruı men ketui dauısqa salınğan bolatın. Konservativtik partiyanıñ tömengi palatasınıñ deputattarı basım köp dauıspen Tereza Meyge senim bildirdi. 200 deputattıñ dauıs berip qoldau nätijesinde Britaniyanıñ bas uäziri (prem'er-ministri) Mey hanım öz ornın saqtap qaldı, äri partiyanıñ jetekşilik qızmetin jalğastıra bermek. Al, 117 deputat Mey hanımğa qarsı dauıs bergen.

Mey sözinde: «Qoldau körsetkenderiñizge rizaşılıq bildiremin. Degenmen, äriptesterimniñ köbi mağan qarsı dauıs berdi. Men olardı tüsinuge tırısamın», – dep mäseleni jılı jauıp qoydı.

Britaniya biligindegi bwl jağdaydan keyin Tereza Meydiñ alañsız jwmıs isteuine bir jıl uaqıt bar degendi bildiredi. Oğan deyin Mey hanımğa senimdilik turalı mäsele köterilmeydi, äri onıñ basşılıq ornına eşkim de talasa almaydı. Biraq, sayasi sarapşılardıñ aytuınşa, bwl dauıs beru qorıtındısı Mey hanımnıñ bedelige soqqı bolıp tidi dep qaraydı. Sebebi, onıñ äriptesteriniñ 37 payızı onıñ otstavkağa ketuin talap etip otır.

 Tereza Mey 2016 jılı Wlıbritaniyanıñ bas-uäzirlik lauazımın qolına alğan kezde, elde Europa Odağınan şığu turalı referendum ötkizgen edi. Referendum nätijesine say Britaniya biligi EO-dan qol üzu şarttarın jasasuı kerek bolğan. Alayda, Britaniyanıñ EO-dan şığu şarttarı turalı mäselege kelgende el parlamenti biliktegi partiya alatayday bülindi. Tipti, partiya jetekşisin qızmetten ketsin degender de köbeydi. «Konservativtik partiyanıñ jetekşisin almastıru, däl qazirgi kezde bizdiñ eldiñ bolaşağına keri äserin tigizetin äreket. Äri, bizdi mülde kezikpegen dağdarıstarğa aparıp soğadı», – dedi Mey hanım.

Tereza Meydiñ pikirinşe, jaña ükimet basşısı kelse ol Britaniyanıñ Europa Odağınan qol üzu isin keyinge şegerui, tipti odan bas tartuı mümkin. Bwl ayaqtaluğa jaqın qalğan Breksit procesin qwrdımğa ketirmek. Al, Britaniyanıñ Europa Odağınan bir jola qol üzuine ne barı 4 ay şamasındağı uaqıt qaldı.

Sayasattanuşılardıñ pikirine sensek, bwl jolı Tereza Meydi qoldauşılardıñ basım köbi «Breksit procesiniñ toqtap qaluınan alañdauşılar». Tipti olardıñ birqatarı Tereza Meyge degen senimi kämil bolmasa da, EO-dan qol izu isiniñ tezirek ayaqtaluı üşin prem'er-ministrdiñ ornında qaluına dauıs berdi dep qaraydı.

Ayta keteyik, Tereza Mey jetekşilik etetin Konservativtik partiya el parlamentiniñ basım köpşiligin, yağni, 650 deputattıñ 315-in ieleydi. Sondıqtan da, el zañına säykes, bas uäziri de osı partiyanıñ jetekşisi boluı kerek.

 “The Qazaq Times”