تەرەزا مەي باس ۋازىرلىك ورنىن ساقتاپ قالدى

بريتانيانىڭ جوعارى بيلىگىندە ەلدىڭ پرەمەر-ءمينيسترىنىڭ قىزمەتىن جالعاستىرۋى مەن كەتۋى داۋىسقا سالىنعان بولاتىن. كونسەرۆاتيۆتىك پارتيانىڭ تومەنگى پالاتاسىنىڭ دەپۋتاتتارى باسىم كوپ داۋىسپەن تەرەزا مەيگە سەنىم ءبىلدىردى. 200 دەپۋتاتتىڭ داۋىس بەرىپ قولداۋ ناتيجەسىندە بريتانيانىڭ باس ءۋازىرى (پرەمەر-ءمينيسترى) مەي حانىم ءوز ورنىن ساقتاپ قالدى، ءارى پارتيانىڭ جەتەكشىلىك قىزمەتىن جالعاستىرا بەرمەك. ال، 117 دەپۋتات مەي حانىمعا قارسى داۋىس بەرگەن.

مەي سوزىندە: «قولداۋ كورسەتكەندەرىڭىزگە ريزاشىلىق بىلدىرەمىن. دەگەنمەن، ارىپتەستەرىمنىڭ كوبى ماعان قارسى داۋىس بەردى. مەن ولاردى تۇسىنۋگە تىرىسامىن»، – دەپ ماسەلەنى جىلى جاۋىپ قويدى.

بريتانيا بيلىگىندەگى بۇل جاعدايدان كەيىن تەرەزا مەيدىڭ الاڭسىز جۇمىس ىستەۋىنە ءبىر جىل ۋاقىت بار دەگەندى بىلدىرەدى. وعان دەيىن مەي حانىمعا سەنىمدىلىك تۋرالى ماسەلە كوتەرىلمەيدى، ءارى ونىڭ باسشىلىق ورنىنا ەشكىم دە تالاسا المايدى. بىراق، ساياسي ساراپشىلاردىڭ ايتۋىنشا، بۇل داۋىس بەرۋ قورىتىندىسى مەي حانىمنىڭ بەدەلىگە سوققى بولىپ ءتيدى دەپ قارايدى. سەبەبى، ونىڭ ارىپتەستەرىنىڭ 37 پايىزى ونىڭ وتستاۆكاعا كەتۋىن تالاپ ەتىپ وتىر.

 تەرەزا مەي 2016 جىلى ۇلىبريتانيانىڭ باس-ۋازىرلىك لاۋازىمىن قولىنا العان كەزدە، ەلدە ەۋروپا وداعىنان شىعۋ تۋرالى رەفەرەندۋم وتكىزگەن ەدى. رەفەرەندۋم ناتيجەسىنە ساي بريتانيا بيلىگى ەو-دان قول ءۇزۋ شارتتارىن جاساسۋى كەرەك بولعان. الايدا، بريتانيانىڭ ەو-دان شىعۋ شارتتارى تۋرالى ماسەلەگە كەلگەندە ەل پارلامەنتى بيلىكتەگى پارتيا الاتايداي ءبۇلىندى. ءتىپتى، پارتيا جەتەكشىسىن قىزمەتتەن كەتسىن دەگەندەر دە كوبەيدى. «كونسەرۆاتيۆتىك پارتيانىڭ جەتەكشىسىن الماستىرۋ، ءدال قازىرگى كەزدە ءبىزدىڭ ەلدىڭ بولاشاعىنا كەرى اسەرىن تيگىزەتىن ارەكەت. ءارى، ءبىزدى مۇلدە كەزىكپەگەن داعدارىستارعا اپارىپ سوعادى»، – دەدى مەي حانىم.

تەرەزا مەيدىڭ پىكىرىنشە، جاڭا ۇكىمەت باسشىسى كەلسە ول بريتانيانىڭ ەۋروپا وداعىنان قول ءۇزۋ ءىسىن كەيىنگە شەگەرۋى، ءتىپتى ودان باس تارتۋى مۇمكىن. بۇل اياقتالۋعا جاقىن قالعان برەكسيت پروتسەسىن قۇردىمعا كەتىرمەك. ال، بريتانيانىڭ ەۋروپا وداعىنان ءبىر جولا قول ۇزۋىنە نە بارى 4 اي شاماسىنداعى ۋاقىت قالدى.

ساياساتتانۋشىلاردىڭ پىكىرىنە سەنسەك، بۇل جولى تەرەزا مەيدى قولداۋشىلاردىڭ باسىم كوبى «برەكسيت پروتسەسىنىڭ توقتاپ قالۋىنان الاڭداۋشىلار». ءتىپتى ولاردىڭ بىرقاتارى تەرەزا مەيگە دەگەن سەنىمى كامىل بولماسا دا، ەو-دان قول ءىزۋ ءىسىنىڭ تەزىرەك اياقتالۋى ءۇشىن پرەمەر-ءمينيستردىڭ ورنىندا قالۋىنا داۋىس بەردى دەپ قارايدى.

ايتا كەتەيىك، تەرەزا مەي جەتەكشىلىك ەتەتىن كونسەرۆاتيۆتىك پارتيا ەل پارلامەنتىنىڭ باسىم كوپشىلىگىن، ياعني، 650 دەپۋتاتتىڭ 315-ءىن يەلەيدى. سوندىقتان دا، ەل زاڭىنا سايكەس، باس ءۋازىرى دە وسى پارتيانىڭ جەتەكشىسى بولۋى كەرەك.

 “The Qazaq Times”