«Eks-deputat Omurbek Babanovqa qatıstı is jabıluı tiis», - dep mälimdedi Qırğızstannıñ eks-prezidenti Almazbek Atambaev 10 jeltoqsanda «Aprel'» telekanalına bergen swqbatında.

Onıñ sözinşe, Omurbek Babanovtıñ On-Adırdegi sözderi köp adamnıñ aşuın tuğızğan. «Eger emociyasız qaraytın bolsaq, qılmıstıq is wltarazdıq boyınşa qozğaldı. Biraq analiz jasağan sarapşılar onıñ sözderiniñ wltarazdıq tuğızbaytının äri emociyasız aytılğanın anıqtadı», - dep atap ötken ol.

Atambaevtıñ aytuınşa, Babanov Qırğızstanda birlik pen kelisim bärinen joğarı ekenin körsetken. «Ol birlik üşin mandatın keri qaytarıp, eldi tastap ketti. Sosın oğan tağı bir qılmıstıq is qozğaldı. Biraq Qanat Isaev (parlament deputatı) isinde Babanovtıñ eş qatısı joq»,- dedi eks-prezident.

Eks-prezident naurız ayında oğan parlament deputatı Ruslan Kazakbaevtıñ kelgenin bayandadı. «Ol Qanat Isaevtiñ isine qatıstı saraptama jürgizildi, bwl iske Babanovtıñ eş qatısı joq dedi. Kazakbaevtıñ közinşe, men WQMK eks-basşısı Abdil Segizbaevqa telefon şaldım. Men Abdilge saraptama qorıtındısı şıqqanın, Babanovtıñ bwl iske qatısı bolmasa, oğan qarsı isti jabu kerektigin ayttım. Ol mağan "bayke, bwl is sozılıp jatır" dedi. Men onda Ruslandı qabıldauın ötindim. Şın mäninde Babanov isi jabıluı tiis. Şınına kelse, Babanovqa rahmet aytuımız kerek. Bir jıl ötti, ol birnärse dedi me? Ol birlik pen tınıştıqtı bwzu üşin qadam jasadı ma? Ol meniñ sözderime, Sooronbay Jeenbekovtiñ sözderine senip qaldı, aldanıp qaldı. Sol üşin de özimdi ıñğaysız sezinemin», - dedi Atambaev.

2017 jılı ötken prezident saylauına ümitker retinde qatısqan Omurbek Babanovqa «wltarazdıq tuğızatın mälimdeme jasadı» jäne «Konstituciya qwrılımın küştep özgertuge jariya türde şaqırdı» degen eki birdey ayıp tağılğan.Prezident saylauı öte salısımen Omurbek Babanov sayasi mansabın ayaqtağanın mälimdep, elden ketti.

"The Qazaq Times"