Päkistan prem'er-ministri Trampqa hat jazıp qoldau swradı. Foto: The News International.

Päkistan prem'er-ministri Imran Han AQŞ prezidenti Donal'd Trampqa hat joldap, Auğanstan dağdarısın şeşuge qoldau körsetuin swradı. Bwl turalı Päkistan prem'eri BAQ ökilderimen kezdesui kezinde mälimdegen.

Bwğan deyin öñirdegi jağdayğa baylanıstı AQŞ ükimeti Päkistandı ayıptap, terrorlıq toptarğa qoldau körsetip otırğanın aytqan edi. Soğan qaramastan AQŞ-Päkistan arasında öñirdegi twraqtılıq pen qauipsizdikke baylanıstı ıntımaqtastıq ornatuğa degen talpınıstar da bolğan.

Imran Han Trampqa jazğan hatında Päkistan tarabı Auğanstanda 17 jılğa jalğasqan twraqsızdıqtı şeşuge  tırısatının, bwl bağıtta Qwrama Ştatpen ıntımaqtasuğa dayın ekenin, sonday-aq, AQŞ-tıñ qoldauına mwqtaj ekenin de aytqan.

Qazir Auğanstandağı jağday körşiles elder men aymaqtar üşin ülken ürey tuğızıp otır. 17 jıldan beri alasapıran bolıp jatqan Auğanstan degenmen, soñğı bir-eki jılda Orta Şığıstağı terrorizm jağdayında özgerister boldı. Süriya men Irak jerinde jeñilis tapqan DAIŞ küşteri twraqsızdıq jaylağan auğan jerine qaray ağıldı. Onıñ üstine, Auğanstandağı jerlik terrorlıq top Taliban wyımı da soñğı jıldarı belsendi şabuıldar jasauda.

Auğanstandı twtasımen twraqsızdıq jaylasa nemese terrorlıq wyımdardıñ baqılauına ötse, eñ aldımen Qıtaydıñ batıs öñirine, sosın Orta Aziya, Oñtüstik Aziya elderine qauip tönedi.

“The Qazaq Times”