Photo: Bnews.kz

Keşe ğana Mäskeude Halıqaralıq äuesqoy boks qauımdastığınıñ (AIBA) kongresi ötip, wyımnıñ jaña prezidenti saylandı. Prezidenttikke kandidat bolğan Özbekstan eliniñ ökili Ğafur Rahimov öziniñ bäsekelesi qazaqstandıq Serik Qonaqbaevtan ozıp, köp dauıs jinadı.

Kongreske qatısqan 134 delegattıñ 86-sı öz dauıstarın AIBA-nıñ uaqıtşa prezidenti Ğafur Rahimovqa bergen. Endi onıñ ökilettiligi 2022 jılı ayaqtalmaq. Bwğan deyin Halıqaralıq olimpiada komiteti Rahimovtıñ AIBA basşısı bolıp saylanuına qarsılıq bildirgen. Eger Özbekstan ökili saylanar bolsa, onda bokstıñ olimpiada bağdarlamasınan alınıp tastaluı mümkin ekenin de eskertken. Biraq kongreste söz alğan Rahimov öziniñ basşı bolıp kelgeli birqatar irgeli ister atqarğanın, qauımdastıqtıñ endigi kezekte ädil jwmıs isteytinin ayttı.

«Men basşılıqqa kelgen kezde AIBA-nıñ 40 mln dollarğa juıq qarızı boldı. Kreditorlar jan-jaqtan qıspaqqa alıp, qarızdarın öteudi swrap jattı. Biz birqatar kelissözder jürgizu arqılı ol qarızdardıñ biraz böliginen qwtıldıq. Endi qalğan böligin demeuşilik kelisimşarttar arqılı retteymiz» degen bolatın.

Öz kezeginde Serik Qonaqbaev ta saylau qorıtındısına qatıstı oyın bildirgen.

«Men ärine nätijeniñ bwlay bolğanına tañğaldım. Degenmen men sportta qala beremin jäne bokstıñ bolaşağı üşin küresimdi jalğastıramın. Älemdegi barlıq boksşılardıñ olimpiadadağı bolaşağı üşin qoldan kelgendi jasaymın. Bwl eşteñeniñ soñı emes. Tek bası ğana. Biz küresti toqtatpaymız. Tek birinşi raund ğana ayaqtaldı, alda äli ekinşisi bar. Meni qoldağandarğa alğıs aytamın. Äsirese, qazaqstandıqtarğa. Biz birge bokstı qaytadan wlı sportqa aynaldıramız» degen ol.

Osığan oray qoğamda bokstıñ aldağı tağdırına qatıstı köptegen pikirler tuındauda. Qazir ras, äuesqoyğa qarağanda käsipqoy bokstıñ qızığı basım bolıp bara jatqanday. Köptegen boksşılar käsipqoy kar'era bastap, ataq pen aqşanı sol jaqtan izdeuge köşken. Bälkim, bokstıñ bolaşağı sol ma eken? Degenmen äuesqoy bokstıñ da özindik izi, özindik stili öşpeuge tiis qoy. Basqa, basqa äuesqoy boks Qazaqstan üşin erekşe ornı bar sport. Sondıqtan sport sarapşılarımen pikirlesip, kökeydegi saualdardı qoyğan edik.

Belgili sport şoluışısı Bek Töleudiñ aytuınşa, Rahimov Resey qoldauınıñ arqasında jeñip şıqqan.

«Osı töñirekte köp äñgime aytılıp jür, naqtısın uaqıt körsetedi. Bwl endi sayasi teketireske alıp keletin siyaqtı. Rahimovtı Resey aşıq türde qoldap otır. Al AQŞ oğan qarsı. Meniñşe, boks Tokio Olimpiadasında mindetti türde boladı. Qonaqbaev osı uaqıtqa deyin talay lauazımdı qızmetter atqardı. Biraq aşılıp söylep, bireudi qoldap nemese sın aytıp jatqanın körgen emespin. Birneşe jıl Mäjiliste de deputat boldı ğoy. Aziya boksın da basqardı. Menedjer retinde tolıqqandı körsete almay jürgenin ğana bilemin, basqa eşteñe ayta almaymın. Alda älem men Aziya çempionatı bar. Sol jarıstarda köremiz. Onsızda 8 salmaqqa deyin azayıp qalğan boksta beldesu basu bolsa jaramas.

Öz basım şlem kise de, 1996-2008 jılğa deyingi bokstı joğarı bağalaymın. Londondı Serik Säpiev üşin kördim. Al Rionı tiip-qaşıp qaradım. Sebebi, bwrınğıday ekran aldında körermendi wstap otıratınday bokstıñ qızığı azayıp baradı. Oğan birinşi kezekte AIBA-nıñ bwrınğı prezidenti jäne onıñ komandası kinäli dep oylaymın» deydi ol.

Tanımal sport kommentatorı Rauan Oqas ta Seriktiñ basşı bolıp kelui bäribir tabısqa jetelemes edi dep oylaydı. Sondıqtan äri biznesmen, äri wyımdastıruşılıq qabiletke ie Rahimovtıñ saylanuı ädilettirek.

«Rahimovtıñ keluimen äuesqoy boks Olimpiada bağdarlamasınan alınıp tastaladı degen qañqu sözder dep oylaymın. Boks ketse, Olimpiada oyındarınıñ qızığı qalmaydı. Bwğan jol joq, alıp tastar bolsa nege dopingi uşığıp twrğan auır atletikanı alıp tastamaydı? Ädiletsizdikter tek boksta ğana emes, küreste bar. Onda küresti alıp tastasın. Rahimov kerisinşe AIBA-dağı bılıqtardı retteydi. Onıñ bedeli mıqtı, sözi ötimdi, aqşası bar. Rahimov uaqıtşa Prezident bolğan kezinde AIBA-nıñ 40 millionday qarızın jauıp berdi» deydi ol.

Kommentatordıñ pikirinşe, Rahimovtıñ bilik basına kelui – özbekterdi wşpaqqa şığara qoymaydı.

«Serik mırzanıñ äleueti anau aytarlıqtay emes. Özindik şeşim qabıldaydı degenge senbeymin, ol kisiniñ artında basqa azamattar twr. Al Rahimov tek boksqa ğana emes, küres, basqa da sportqa äser etip jürgen azamat. Ol basşı bolğan soñ, özbek boksşıları atoy saladı degen jansaq pikir. Kerisinşe ädiletti boladı. Bwrınıraq sırttay äser etken bolsa, işte jürip äser etu öte qiın.

Äuesqoy bokstıñ äleuetin arttırıp twrğan Olimpiada oyındarı. Kerisinşe, Qazaqstanda äli äuesqoy boksqa qızığadı. Käsipqoydı onşa bile bermeydi, beldikterdi ajırata almaydı. Beldigi barlardıñ barlığın çempion dep qabıldaydı» deydi Rauan Oqas.

Mäskeude ötken kongreste 2022 jılğı Tokio olimpiadasında oynatılatın jaña salmaq kategoriyaları belgilendi. Sonımen Tokioda erler – 8, äyelder – 5 salmaq kategoriyası boyınşa sınğa tüsedi.

Erlerdiñ salmağı: 57, 63, 69, 75, 81, 91, 91+

Olimpiada oyındarına barlığı 214 boksşı qatısadı.

Äyelderdiñ salmağı: 51, 57, 60, 69, 75

Olimpiada oyındarına barlığı 72 äyel boksşı qatısadı.

Sonday-aq olimpiada oyındarına käsipqoy boksşılardıñ da qatısu limiti bekitildi. Ol boyınşa olimpiadağa qatısuğa ümitker boksşı käsipqoy kar'erasında 15 jekpe-jekten kem kezdesu ötkizbegen boluı tiis. Sonday-aq boksşılar WSB jobası arqılı da joldama aladı.

"The Qazaq Times"