كەشە عانا ماسكەۋدە حالىقارالىق اۋەسقوي بوكس قاۋىمداستىعىنىڭ (AIBA) كونگرەسى ءوتىپ، ۇيىمنىڭ جاڭا پرەزيدەنتى سايلاندى. پرەزيدەنتتىككە كانديدات بولعان وزبەكستان ەلىنىڭ وكىلى عافۋر راحيموۆ ءوزىنىڭ باسەكەلەسى قازاقستاندىق سەرىك قوناقباەۆتان وزىپ، كوپ داۋىس جينادى.

كونگرەسكە قاتىسقان 134 دەلەگاتتىڭ 86-سى ءوز داۋىستارىن AIBA-نىڭ ۋاقىتشا پرەزيدەنتى عافۋر راحيموۆقا بەرگەن. ەندى ونىڭ وكىلەتتىلىگى 2022 جىلى اياقتالماق. بۇعان دەيىن حالىقارالىق وليمپيادا كوميتەتى راحيموۆتىڭ AIBA باسشىسى بولىپ سايلانۋىنا قارسىلىق بىلدىرگەن. ەگەر وزبەكستان وكىلى سايلانار بولسا، وندا بوكستىڭ وليمپيادا باعدارلاماسىنان الىنىپ تاستالۋى مۇمكىن ەكەنىن دە ەسكەرتكەن. بىراق كونگرەستە ءسوز العان راحيموۆ ءوزىنىڭ باسشى بولىپ كەلگەلى بىرقاتار ىرگەلى ىستەر اتقارعانىن، قاۋىمداستىقتىڭ ەندىگى كەزەكتە ءادىل جۇمىس ىستەيتىنىن ايتتى.

«مەن باسشىلىققا كەلگەن كەزدە AIBA-نىڭ 40 ملن دوللارعا جۋىق قارىزى بولدى. كرەديتورلار جان-جاقتان قىسپاققا الىپ، قارىزدارىن وتەۋدى سۇراپ جاتتى. ءبىز بىرقاتار كەلىسسوزدەر جۇرگىزۋ ارقىلى ول قارىزداردىڭ ءبىراز بولىگىنەن قۇتىلدىق. ەندى قالعان بولىگىن دەمەۋشىلىك كەلىسىمشارتتار ارقىلى رەتتەيمىز» دەگەن بولاتىن.

ءوز كەزەگىندە سەرىك قوناقباەۆ تا سايلاۋ قورىتىندىسىنا قاتىستى ويىن بىلدىرگەن.

«مەن ارينە ناتيجەنىڭ بۇلاي بولعانىنا تاڭعالدىم. دەگەنمەن مەن سپورتتا قالا بەرەمىن جانە بوكستىڭ بولاشاعى ءۇشىن كۇرەسىمدى جالعاستىرامىن. الەمدەگى بارلىق بوكسشىلاردىڭ وليمپياداداعى بولاشاعى ءۇشىن قولدان كەلگەندى جاسايمىن. بۇل ەشتەڭەنىڭ سوڭى ەمەس. تەك باسى عانا. ءبىز كۇرەستى توقتاتپايمىز. تەك ءبىرىنشى راۋند عانا اياقتالدى، الدا ءالى ەكىنشىسى بار. مەنى قولداعاندارعا العىس ايتامىن. اسىرەسە، قازاقستاندىقتارعا. ءبىز بىرگە بوكستى قايتادان ۇلى سپورتقا اينالدىرامىز» دەگەن ول.

وسىعان وراي قوعامدا بوكستىڭ الداعى تاعدىرىنا قاتىستى كوپتەگەن پىكىرلەر تۋىنداۋدا. قازىر راس، اۋەسقويعا قاراعاندا كاسىپقوي بوكستىڭ قىزىعى باسىم بولىپ بارا جاتقانداي. كوپتەگەن بوكسشىلار كاسىپقوي كارەرا باستاپ، اتاق پەن اقشانى سول جاقتان ىزدەۋگە كوشكەن. بالكىم، بوكستىڭ بولاشاعى سول ما ەكەن؟ دەگەنمەن اۋەسقوي بوكستىڭ دا وزىندىك ءىزى، وزىندىك ءستيلى وشپەۋگە ءتيىس قوي. باسقا، باسقا اۋەسقوي بوكس قازاقستان ءۇشىن ەرەكشە ورنى بار سپورت. سوندىقتان سپورت ساراپشىلارىمەن پىكىرلەسىپ، كوكەيدەگى ساۋالداردى قويعان ەدىك.

بەلگىلى سپورت شولۋىشىسى بەك تولەۋدىڭ ايتۋىنشا، راحيموۆ رەسەي قولداۋىنىڭ ارقاسىندا جەڭىپ شىققان.

«وسى توڭىرەكتە كوپ اڭگىمە ايتىلىپ ءجۇر، ناقتىسىن ۋاقىت كورسەتەدى. بۇل ەندى ساياسي تەكەتىرەسكە الىپ كەلەتىن سياقتى. راحيموۆتى رەسەي اشىق تۇردە قولداپ وتىر. ال اقش وعان قارسى. مەنىڭشە، بوكس توكيو وليمپياداسىندا مىندەتتى تۇردە بولادى. قوناقباەۆ وسى ۋاقىتقا دەيىن تالاي لاۋازىمدى قىزمەتتەر اتقاردى. بىراق اشىلىپ سويلەپ، بىرەۋدى قولداپ نەمەسە سىن ايتىپ جاتقانىن كورگەن ەمەسپىن. بىرنەشە جىل ماجىلىستە دە دەپۋتات بولدى عوي. ازيا بوكسىن دا باسقاردى. مەنەدجەر رەتىندە تولىققاندى كورسەتە الماي جۇرگەنىن عانا بىلەمىن، باسقا ەشتەڭە ايتا المايمىن. الدا الەم مەن ازيا چەمپيوناتى بار. سول جارىستاردا كورەمىز. ونسىزدا 8 سالماققا دەيىن ازايىپ قالعان بوكستا بەلدەسۋ باسۋ بولسا جاراماس.

ءوز باسىم شلەم كيسە دە، 1996-2008 جىلعا دەيىنگى بوكستى جوعارى باعالايمىن. لوندوندى سەرىك ساپيەۆ ءۇشىن كوردىم. ال ريونى ءتيىپ-قاشىپ قارادىم. سەبەبى، بۇرىنعىداي ەكران الدىندا كورەرمەندى ۇستاپ وتىراتىنداي بوكستىڭ قىزىعى ازايىپ بارادى. وعان ءبىرىنشى كەزەكتە AIBA-نىڭ بۇرىنعى پرەزيدەنتى جانە ونىڭ كومانداسى كىنالى دەپ ويلايمىن» دەيدى ول.

تانىمال سپورت كوممەنتاتورى راۋان وقاس تا سەرىكتىڭ باسشى بولىپ كەلۋى ءبارىبىر تابىسقا جەتەلەمەس ەدى دەپ ويلايدى. سوندىقتان ءارى بيزنەسمەن، ءارى ۇيىمداستىرۋشىلىق قابىلەتكە يە راحيموۆتىڭ سايلانۋى ادىلەتتىرەك.

«راحيموۆتىڭ كەلۋىمەن اۋەسقوي بوكس وليمپيادا باعدارلاماسىنان الىنىپ تاستالادى دەگەن قاڭقۋ سوزدەر دەپ ويلايمىن. بوكس كەتسە، وليمپيادا ويىندارىنىڭ قىزىعى قالمايدى. بۇعان جول جوق، الىپ تاستار بولسا نەگە دوپينگى ۋشىعىپ تۇرعان اۋىر اتلەتيكانى الىپ تاستامايدى؟ ادىلەتسىزدىكتەر تەك بوكستا عانا ەمەس، كۇرەستە بار. وندا كۇرەستى الىپ تاستاسىن. راحيموۆ كەرىسىنشە ايبا-داعى بىلىقتاردى رەتتەيدى. ونىڭ بەدەلى مىقتى، ءسوزى ءوتىمدى، اقشاسى بار. راحيموۆ ۋاقىتشا پرەزيدەنت بولعان كەزىندە ايبا-نىڭ 40 ميلليونداي قارىزىن جاۋىپ بەردى» دەيدى ول.

كوممەنتاتوردىڭ پىكىرىنشە، راحيموۆتىڭ بيلىك باسىنا كەلۋى – وزبەكتەردى ۇشپاققا شىعارا قويمايدى.

«سەرىك مىرزانىڭ الەۋەتى اناۋ ايتارلىقتاي ەمەس. وزىندىك شەشىم قابىلدايدى دەگەنگە سەنبەيمىن، ول كىسىنىڭ ارتىندا باسقا ازاماتتار تۇر. ال راحيموۆ تەك بوكسقا عانا ەمەس، كۇرەس، باسقا دا سپورتقا اسەر ەتىپ جۇرگەن ازامات. ول باسشى بولعان سوڭ، وزبەك بوكسشىلارى اتوي سالادى دەگەن جانساق پىكىر. كەرىسىنشە ادىلەتتى بولادى. بۇرىنىراق سىرتتاي اسەر ەتكەن بولسا، ىشتە ءجۇرىپ اسەر ەتۋ وتە قيىن.

اۋەسقوي بوكستىڭ الەۋەتىن ارتتىرىپ تۇرعان وليمپيادا ويىندارى. كەرىسىنشە، قازاقستاندا ءالى اۋەسقوي بوكسقا قىزىعادى. كاسىپقويدى ونشا بىلە بەرمەيدى، بەلدىكتەردى اجىراتا المايدى. بەلدىگى بارلاردىڭ بارلىعىن چەمپيون دەپ قابىلدايدى» دەيدى راۋان وقاس.

ماسكەۋدە وتكەن كونگرەستە 2022 جىلعى توكيو وليمپياداسىندا ويناتىلاتىن جاڭا سالماق كاتەگوريالارى بەلگىلەندى. سونىمەن توكيودا ەرلەر – 8, ايەلدەر – 5 سالماق كاتەگورياسى بويىنشا سىنعا تۇسەدى.

ەرلەردىڭ سالماعى: 57, 63, 69, 75, 81, 91, 91+

وليمپيادا ويىندارىنا بارلىعى 214 بوكسشى قاتىسادى.

ايەلدەردىڭ سالماعى: 51, 57, 60, 69, 75

وليمپيادا ويىندارىنا بارلىعى 72 ايەل بوكسشى قاتىسادى.

سونداي-اق وليمپيادا ويىندارىنا كاسىپقوي بوكسشىلاردىڭ دا قاتىسۋ ءليميتى بەكىتىلدى. ول بويىنشا وليمپياداعا قاتىسۋعا ۇمىتكەر بوكسشى كاسىپقوي كارەراسىندا 15 جەكپە-جەكتەن كەم كەزدەسۋ وتكىزبەگەن بولۋى ءتيىس. سونداي-اق بوكسشىلار WSB جوباسى ارقىلى دا جولداما الادى.

"The Qazaq Times"