Foto; Zrosports.kz

AIBA prezidenti boluğa ümitker atanğan qazaqstandıq ökil Serik
Qonaqbaevtıñ apellyaciyasın Lozannadağı Sporttıq arbitrajdı sotı qabıl
aldı. Qazaqstandıq ökil özin Halıqaralıq äuesqoy boks qauımdastığınıñ
prezidenttigine ümitker retinde tirkemey qoyğanı üşin arızdanğan edi.

Özin ümitker retinde tirkemey qoyğanı üşin Serik Qonaqbaev qalayda
saylauğa qatısuğa şeşim alğısı keledi. Eske salayıq, atalğan saylau 2-3
qaraşa künderi Mäskeu qalasında ötpek.

Resey boks federaciyasınıñ bas hatşısı Umar Kremlevtiñ aytuınşa,
Qonaqbaevtıñ prezident atanuğa eş mümkindigi joq.

«Qonaqbaevtıñ saylauğa qatısuına eşkim tıyım salğan joq. Tek ol özi
tiisti 20 dauıstı jinap ülgere almay qaldı. Taza zañdıq twrğıdan
qaraytın bolsaq onıñ eşqanday mümkindigi joq. Tipti saylauğa qatısqan
künniñ özinde prezident bola almaydı. Sebebi, Ğafur Rahimov köptegen
wlttıq federaciyalardıñ qoldauına ie» depti ol.

Eske sala ketsek, özbekstandıq Ğafur Rahimov qazirgi tañda AIBA
prezidenti boluğa jalğız kandidat. Ol qazir wyım basşısınıñ mindetin
uaqıtşa atqaruda. Bir qızığı, bwğan deyin Halıqaralıq olimpiada
komiteti Rahimovtı saylauğa tüspeuge şaqırğan. Eger özbekstandıq ökil
prezident atanatın bolsa onda HOK bokstı olimpiada oyındarınıñ
bağdarlamasınan alıp tastauı mümkin. AQŞ qarjı ministrliginiñ
şeteldik aktivterdi baqılau departamenti Rahimovtı sankciyalıq tizimge
qosuı da HOK şeşimine äser etse kerek. Sonday-aq AQŞ qarjı ministrligi
onıñ (Rahimovtıñ) dollar arqılı kez kelgen qarjılıq operaciyanı jüzege
asıruına tıyım salğan.

AIBA-nıñ bwrınğı basşısı Çing Kuo Vu 2017 jılı qaraşa ayınıñ
basında AIBA atqaruşı komitetiniñ şeşimimen qızmetten şettetilgen.

"The Qazaq Times"