Himiyalıq qaruğa qarsı wyımnıñ qwqığı keñeytildi. Foto: Anadolu Agency,.

Euroodaqqa müşe elderdiñ SİM basşıları himiyalıq qaru şığarğan jäne qoldanğan jeke nemese resmi taraptarğa qarsı jasalğan sankciyanı qoldadı. EO şeşiminde: «Endi EO qay wlttıq ökili nemese qay jerde bolsın, himiyalıq qaru şığarğan nemese qoldanğan jeke jäne resmi taraptarğa qarsı sankciya sala aladı», – delingen. Bwl turalı europalıq aqparat agenttikteri jarısa habarladı.

Himiyalıq qaru qoldanuğa qarsı sankciyanı maqwldağan sammit bolsa Himiyalıq qarudı taratpau wyımnıñ şwğıl sessiyasınan keyin ötkizilgen bolatın.

Himiyalıq qaruğa qarsı jaña sankciya wsınısın Wlıbritaniya men Franciya alğa qoyğan. Olar bwl wsınıstı Reseydiñ bwrınğı barlau qızmetkeri Sergey Skripaldıñ ulanuı jäne Süriyadağı himiyalıq qaru qoldanu isinen keyin alğa tarttı.

Sankciya talaptarında himiyalıq qaru qoldanuğa qatısı bar kez-kelgen jeke jäne wyımnıñ EO şekarasına kiruine şekteu qoyıladı, sonday-aq, qarjıların bwğattaydı. Mälimdemege säykes, bwnday şaralar himiyalıq qarudı şığarğandarğa, qoldanğandarğa jäne oğan qoldau körsetkenderge, sonday-aq, qarjılay kömek körsetkenderge qoldanıladı.

Tağı bir ayta keteri, bwdan keyin Himiyalıq qaruğa qarsı wyım himiyalıq qarudıñ qoldanılğanı turalı däleldeumen qatar onı kimniñ qoldanğanın aytuğa da qwqılı bolatın boldı. Aşalap aytqanda, atalğan wyım himqaru qoldanğan eldi nemese jekelerdi ayıptay aladı.

Bwl wyımnıñ qwqıqtarı men mümkindikteri turalı reformalar jasau wsınısın Wlıbritaniya tarabı ortağa salğan bolatın. Atalğan wyımnıñ qwqıqtarınıñ keñeye tüsuine EO-ğa müşe 82 el qoldau körsetip, 24 el qarsı dauıs bergen. Qarsı dauıs bergenderdiñ aldınğı kezeginde Resey, Süriya jäne Iran elderi twrdı.

Tamızda Skripal isine baylanıstı AQŞ Reseyge jaña sankciya engizgen bolatın. Bwl sankciyağa himqaru şığaru jäne qoldanuğa mümkindik beretin zattar men qızmetter de kirgen edi. Sonımen birge, eger Mäskeu tarabı himiyalıq qaru turalı wstanımdarın jañartpasa, Uaşington üş aydan keyin ekinşi raund sankciyanı iske qosatının mälimdegen.

“The Qazaq Times”