رەسەي، يران جانە ءسۇريا حيميالىق قارۋدى تاراتپاۋ ۇيىمىنا قارسى شىقتى

ەۋرووداققا مۇشە ەلدەردىڭ ءسىم باسشىلارى حيميالىق قارۋ شىعارعان جانە قولدانعان جەكە نەمەسە رەسمي تاراپتارعا قارسى جاسالعان سانكتسيانى قولدادى. ەو شەشىمىندە: «ەندى ەو قاي ۇلتتىق وكىلى نەمەسە قاي جەردە بولسىن، حيميالىق قارۋ شىعارعان نەمەسە قولدانعان جەكە جانە رەسمي تاراپتارعا قارسى سانكتسيا سالا الادى»، – دەلىنگەن. بۇل تۋرالى ەۋروپالىق اقپارات اگەنتتىكتەرى جارىسا حابارلادى.

حيميالىق قارۋ قولدانۋعا قارسى سانكتسيانى ماقۇلداعان سامميت بولسا حيميالىق قارۋدى تاراتپاۋ ۇيىمنىڭ شۇعىل سەسسياسىنان كەيىن وتكىزىلگەن بولاتىن.

حيميالىق قارۋعا قارسى جاڭا سانكتسيا ۇسىنىسىن ۇلىبريتانيا مەن فرانتسيا العا قويعان. ولار بۇل ۇسىنىستى رەسەيدىڭ بۇرىنعى بارلاۋ قىزمەتكەرى سەرگەي سكريپالدىڭ ۋلانۋى جانە سۇرياداعى حيميالىق قارۋ قولدانۋ ىسىنەن كەيىن العا تارتتى.

سانكتسيا تالاپتارىندا حيميالىق قارۋ قولدانۋعا قاتىسى بار كەز-كەلگەن جەكە جانە ۇيىمنىڭ ەو شەكاراسىنا كىرۋىنە شەكتەۋ قويىلادى، سونداي-اق، قارجىلارىن بۇعاتتايدى. مالىمدەمەگە سايكەس، بۇنداي شارالار حيميالىق قارۋدى شىعارعاندارعا، قولدانعاندارعا جانە وعان قولداۋ كورسەتكەندەرگە، سونداي-اق، قارجىلاي كومەك كورسەتكەندەرگە قولدانىلادى.

تاعى ءبىر ايتا كەتەرى، بۇدان كەيىن حيميالىق قارۋعا قارسى ۇيىم حيميالىق قارۋدىڭ قولدانىلعانى تۋرالى دالەلدەۋمەن قاتار ونى كىمنىڭ قولدانعانىن ايتۋعا دا قۇقىلى بولاتىن بولدى. اشالاپ ايتقاندا، اتالعان ۇيىم حيمقارۋ قولدانعان ەلدى نەمەسە جەكەلەردى ايىپتاي الادى.

بۇل ۇيىمنىڭ قۇقىقتارى مەن مۇمكىندىكتەرى تۋرالى رەفورمالار جاساۋ ۇسىنىسىن ۇلىبريتانيا تارابى ورتاعا سالعان بولاتىن. اتالعان ۇيىمنىڭ قۇقىقتارىنىڭ كەڭەيە تۇسۋىنە ەو-عا مۇشە 82 ەل قولداۋ كورسەتىپ، 24 ەل قارسى داۋىس بەرگەن. قارسى داۋىس بەرگەندەردىڭ الدىنعى كەزەگىندە رەسەي، ءسۇريا جانە يران ەلدەرى تۇردى.

تامىزدا سكريپال ىسىنە بايلانىستى اقش رەسەيگە جاڭا سانكتسيا ەنگىزگەن بولاتىن. بۇل سانكتسياعا حيمقارۋ شىعارۋ جانە قولدانۋعا مۇمكىندىك بەرەتىن زاتتار مەن قىزمەتتەر دە كىرگەن ەدى. سونىمەن بىرگە، ەگەر ماسكەۋ تارابى حيميالىق قارۋ تۋرالى ۇستانىمدارىن جاڭارتپاسا، ۋاشينگتون ءۇش ايدان كەيىن ەكىنشى راۋند سانكتسيانى ىسكە قوساتىنىن مالىمدەگەن.

“The Qazaq Times”