Foto: vsevesti24

Reseyde zeynet jasın wlğaytuğa qarsı narazılıq akciyası künnen-künge örşip keledi. Resmi mälimetter boyınşa, Reseydiñ 33 qalasında ötip jatqan qarsılıq akciyalarında policiya 900-ge juıq adamdı wstağan.  

Tergeuge alınğandardıñ basım böligi Sankt-Peterburg, Mäskeu, Ekaterinburgten. Mäskeudegi Puşkin alañın qorşauğa alğan jwrt «Aqşamızdı qaytarıñdar, jemqorlar!», «Bwl nağız tonau!» jäne «Bilikte reforma ornasın!» dep jazılğan plakattardı wstap, ayqayğa basqan.

Reseydegi sayttardıñ mälimeti boyınşa, qazir narazılıq akciyasına şıqqandardıñ jalpı sanı bes mıñnan asıp jığıladı. Aşınğan toptıñ jaña reformağa qarsılığı sonşalıq, olar naqtı nätijege ie bolu üşin bärine dayın. Tipti, «Teatral'naya» metro beketinde policiya şeruge şıqqandardı soqqığa jıqqan.

Reseydegi ädiletsizdikke qarsı belsendi, oppoziciyalıq sayasatker Aleksey Naval'nıydıñ serigi Leonid Volkov Twitter-de: «Şerudegilerdiñ sanı 80 mıñğa deyin jetedi. Sizderge aytılğan derekter jalğan. Eger osı uaqıtqa deyingi şeruler men ondağı zardap şeguşilerdi sanasaq, narazılıq tipten wlğayadı», – deydi. Belsendiniñ bwl pikiri «eldegi qisıq reformalarğa twtas halıq qarsı bolğandıqtan, memleket tize bükkeni dwrıs» – degenge sayadı.

Resey ükimeti josparlağan jaña zañ boyınşa erler 65 jasta, äyelder 60 jasta zeynetke şığuı tiis. Alayda, zeynet jasına qatıstı jospar pikir qayşılığına äkep soqqan. Bwl reforma turalı resmi aqparat tarağannan keyin, bwğan deyingi astırtın äreketterge köz jwmıp kelgen reseylikterdiñ şıdamı şegine jetti. Artı wmıtılmas dauğa aynalğan narazılıq şerulerdiñ saldarınan prezident Vladimir Putinge degen halıq senimi azayğan. Äleumettik zertteu wyımdarınıñ saraptaması boyınşa, jıl sayınğı keleñsiz jayttar men olqılıqqa wşıraytın qwbılmalı bastamalardan soñ Putinniñ reytingisi äldeqayda tömendep ketti.

Büginde Reseydegi hal-ahual öte müşkil. AQŞ pen Wlıbritaniya salğan swrapıl sankciyalar ekonomikalıq damuğa tosqauıl bolsa, Franciyanıñ Resey sputnigi jasamaq bolğan «wrlıq» jaylı mälimeti qos büyirinen qısıp twr. Onıñ üstine, jappay halıq narazılığı tağı bar.

Esteriñizge sala keteyik, 2017 jılı Mäskeude jiırma mıñğa juıq adam jemqorlıqqa qarsı şeruge şıqqan bolatın. Ädildik izdep şıqqan kez kelgen şerudiñ memleket biligi üşin jaqsılıq äkelmeytinin bilgen tärtip saqşıları 360-qa juıq adamdı mäjbürli türde alıp ketken. Jılı jabılğan äreket biıl tağı da qaytalandı. Osı uaqıtqa deyin jan-jaqtan kelgen auır ayıptarğa «pısqırıp» ta qaramauğa tırısqan Resey biligi bwl jolı jahandıq mäseleden tıqır tayağanın seze tüskendey.  Mäskeu endi zeynetkerler mwñına qwlaq türmese, jıldan-jılğa artqan halıq narazılığına tosqauıl bolu qiınday tüspek.

"The Qazaq Times"