«تار جول، تايعاق كەشۋ»: رەسەيدەگى حال-احۋال ناشارلادى

رەسەيدە زەينەت جاسىن ۇلعايتۋعا قارسى نارازىلىق اكتسياسى كۇننەن-كۇنگە ءورشىپ كەلەدى. رەسمي مالىمەتتەر بويىنشا، رەسەيدىڭ 33 قالاسىندا ءوتىپ جاتقان قارسىلىق اكتسيالارىندا پوليتسيا 900-گە جۋىق ادامدى ۇستاعان.  

تەرگەۋگە الىنعانداردىڭ باسىم بولىگى سانكت-پەتەربۋرگ، ماسكەۋ، ەكاتەرينبۋرگتەن. ماسكەۋدەگى پۋشكين الاڭىن قورشاۋعا العان جۇرت «اقشامىزدى قايتارىڭدار، جەمقورلار!»، «بۇل ناعىز توناۋ!» جانە «بيلىكتە رەفورما ورناسىن!» دەپ جازىلعان پلاكاتتاردى ۇستاپ، ايقايعا باسقان.

رەسەيدەگى سايتتاردىڭ مالىمەتى بويىنشا، قازىر نارازىلىق اكتسياسىنا شىققانداردىڭ جالپى سانى بەس مىڭنان اسىپ جىعىلادى. اشىنعان توپتىڭ جاڭا رەفورماعا قارسىلىعى سونشالىق، ولار ناقتى ناتيجەگە يە بولۋ ءۇشىن بارىنە دايىن. ءتىپتى، «تەاترالنايا» مەترو بەكەتىندە پوليتسيا شەرۋگە شىققانداردى سوققىعا جىققان.

رەسەيدەگى ادىلەتسىزدىككە قارسى بەلسەندى، وپپوزيتسيالىق ساياساتكەر الەكسەي ناۆالنىيدىڭ سەرىگى لەونيد ۆولكوۆ Twitter-دە: «شەرۋدەگىلەردىڭ سانى 80 مىڭعا دەيىن جەتەدى. سىزدەرگە ايتىلعان دەرەكتەر جالعان. ەگەر وسى ۋاقىتقا دەيىنگى شەرۋلەر مەن ونداعى زارداپ شەگۋشىلەردى ساناساق، نارازىلىق تىپتەن ۇلعايادى»، – دەيدى. بەلسەندىنىڭ بۇل پىكىرى «ەلدەگى قيسىق رەفورمالارعا تۇتاس حالىق قارسى بولعاندىقتان، مەملەكەت تىزە بۇككەنى دۇرىس» – دەگەنگە سايادى.

رەسەي ۇكىمەتى جوسپارلاعان جاڭا زاڭ بويىنشا ەرلەر 65 جاستا، ايەلدەر 60 جاستا زەينەتكە شىعۋى ءتيىس. الايدا، زەينەت جاسىنا قاتىستى جوسپار پىكىر قايشىلىعىنا اكەپ سوققان. بۇل رەفورما تۋرالى رەسمي اقپارات تاراعاننان كەيىن، بۇعان دەيىنگى استىرتىن ارەكەتتەرگە كوز جۇمىپ كەلگەن رەسەيلىكتەردىڭ شىدامى شەگىنە جەتتى. ارتى ۇمىتىلماس داۋعا اينالعان نارازىلىق شەرۋلەردىڭ سالدارىنان پرەزيدەنت ۆلاديمير پۋتينگە دەگەن حالىق سەنىمى ازايعان. الەۋمەتتىك زەرتتەۋ ۇيىمدارىنىڭ ساراپتاماسى بويىنشا، جىل سايىنعى كەلەڭسىز جايتتار مەن ولقىلىققا ۇشىرايتىن قۇبىلمالى باستامالاردان سوڭ ءپۋتيننىڭ رەيتينگىسى الدەقايدا تومەندەپ كەتتى.

بۇگىندە رەسەيدەگى حال-احۋال وتە مۇشكىل. اقش پەن ۇلىبريتانيا سالعان سۇراپىل سانكتسيالار ەكونوميكالىق دامۋعا توسقاۋىل بولسا، فرانتسيانىڭ رەسەي سپۋتنيگى جاساماق بولعان «ۇرلىق» جايلى مالىمەتى قوس بۇيىرىنەن قىسىپ تۇر. ونىڭ ۇستىنە، جاپپاي حالىق نارازىلىعى تاعى بار.

ەستەرىڭىزگە سالا كەتەيىك، 2017 جىلى ماسكەۋدە جيىرما مىڭعا جۋىق ادام جەمقورلىققا قارسى شەرۋگە شىققان بولاتىن. ادىلدىك ىزدەپ شىققان كەز كەلگەن شەرۋدىڭ مەملەكەت بيلىگى ءۇشىن جاقسىلىق اكەلمەيتىنىن بىلگەن ءتارتىپ ساقشىلارى 360-قا جۋىق ادامدى ءماجبۇرلى تۇردە الىپ كەتكەن. جىلى جابىلعان ارەكەت بيىل تاعى دا قايتالاندى. وسى ۋاقىتقا دەيىن جان-جاقتان كەلگەن اۋىر ايىپتارعا «پىسقىرىپ» تا قاراماۋعا تىرىسقان رەسەي بيلىگى بۇل جولى جاھاندىق ماسەلەدەن تىقىر تاياعانىن سەزە تۇسكەندەي.  ماسكەۋ ەندى زەينەتكەرلەر مۇڭىنا قۇلاق تۇرمەسە، جىلدان-جىلعا ارتقان حالىق نارازىلىعىنا توسقاۋىل بولۋ قيىنداي تۇسپەك.

"The Qazaq Times"