Özbekstannıñ eks-hanşayımı Gülnara Kärimova.

Stokgol'mde Özbekstan eks-prezidenti Islam Kärimovtıñ qızı, eks-hanşayım Gülnara Kärimova isine qatıstı sot otırısı bastaldı.

Qırküyek ayınıñ 4-i küni Şveciyanıñ Stokgol'm qalasında Gülnara Kärimovağa 350 million dollar para berdi degen ayıppen wstalğan «Telia» telekommunikaciyalıq kompaniyasınıñ eks-basşıları Lars Nyuberg, Tero Kivisaari jäne Uli Tuimanıñ sot otırısı bolıp ötti. Sot şeşimi boyınşa, prokurorlar men qorğauşılardıñ ükim aldındağı soñğı jarıs sözi jeltoqsan ayınıñ 11-i men 14-i künderi aralığında ötedi. Al ükim 2019 jıldıñ qañtar nemese aqpan ayında şığarıladı.

2015 jılı Şveciya, Şveycariya jäne AQŞ-ta Gülnara Kärimovanıñ üstinen qılmıstıq is qozğalğan. Oğan «bes birdey telekommunikaciyalıq kompaniyadan bir milliard dollar köleminde para aldı» - degen ayıp tağılğan. Bwnımen qatar Özbekstanda äkesi Islam Kärimovtıñ qazasınan keyin oğan 53 million dollar köleminde qarjı jımqırdı, salıqtan jaltardı, ofşor kompaniyalardıñ qwjattarın jasırdı, asa iri kölemde para aldı jäne wyımdasqan qılmıstıq top qwrıp, bopsalaumen aynalıstı degen ayıp tağılıp, Taşkent qalasınıñ sotı bes jılğa bas bostandığınan ayırğan.

Tergeu jwmıstarı barısında Gülnara Kärimova jımqırdı delingen qarjınıñ basım köpşiligi Şveycariyadan tabılğan. Atap aytqanda Şveycariya qwzırlı organdarı Gülnara Kärimovağa tiesili 800 million dollar qarjını bwğattağan. Qazirgi tañda däl osı 800 million dollar üşin Özbekstan, AQŞ, Şveciya jäne Şveycariya arasında talas jürude. Joğarıda atalğan tört taraptıñ törteui de atalmış qarjınıñ özine tiesili böligin alıp qaluğa tırısıp bağuda. Şilde ayınıñ 31-i küni Şveycariyanıñ Federaldı sotı Gülnara Kärimovanıñ 800 million dollar qarjını eşkimge bermey bwğattap tastauğa baylanıstı bergen apellyaciyadıq arızın qanağattandırmadı.

"The Qazaq Times"