Bügin advokattar Ayman Umarova, Bauırjan Azanov jäne qwqıq qorğauşı Evgeniy Jovtistiñ qatısuımen baspasöz mäjilisi ötti. Spikerler advokattardıñ, äsirese täuelsiz qorğauşılardıñ organdar tarapınan qısımğa wşırauı men qwqığınıñ bwzıluı jöninde ayttı.

Juırda üstinen «jalğan aqparat taratu» babı boyınşa is qozğalğan advokat Bauırjan Azanov öziniñ tek qana zañ şeñberinde jäne jäbirlenuşiniñ qwqığın qorğau bağıtında jwmıs istegenin, öz isinde eş qılmıstıq qwramnıñ joğın aytadı. Özine qatıstı qılmıstıq isti Oñtüstik Qazaqstan oblısında jeti jastağı balağa qatıstı zorlıq äreketterin äşkerelegeni üşin qozğağanına senimdi.

Jii qwqığınıñ bwzıluına wşırap jürgen advokattardıñ biri Ayman Umarova da onsız da zañ şeñberinde qorğauşılardıñ qwqığı öte tar ekenin, endigi bar qwqıtarınıñ şektelui jiilegenine narazı. Öziniñ atı men tegin qate jazıp, qasaqana kelemejdeuge barğan prokuratura ökilderin sotqa bergenin aytadı.

Qwqıqqorğauşı Evgeniy Jovtis ta organdar tarapınan qudalauğa wşırap, türli isterge tartılatın advokattardıñ täuelsiz, belsendi qorğauşılar ekenin eske salıp, onı qasaqana qudalau retinde qarauğa bolatının mälimdedi.

Ayman Umarova qılmıstıq is boyınşa äriptesi Bauırjan Azanovqa qorğauşı bolğanın, endigi sotqa dayındıq bastalğanın aytadı.

Däl qazir astanalıq jäne almatılıq qwqıqqorğauşılar men belsendiler advokat Bauırjan Azanovtı qoldap qol jinap jatır.

Qwqıq qorğauşı Diana Okremovanıñ aytuınşa, Qazaqstan prezidenti Nwrswltan Nazarbaev pen Bas prokurordıñ atına arnalğan ündeuge astanalıqtar qol qoyıp jatır. Ündeudi qoldağandardıñ deni - qala twrğındarı men belsendiler.

Advokattı qoldap qol jinauşılardıñ sözinşe, "Azanov zardap şekken balağa öz qarjısına, tegin qızmet körsetken. Azamattıq belsendiligi üşin onı qılmıstıq jauapkerşilikke tartuğa bolmaydı".

Esteriñizge sala keteyik biıl 13 naurız küni Sarıağaş audanındağı Abay auılında twratın Şaripa Batırbekova jeti jastağı jienin bıltır tamızdan beri joğarğı sınıp oquşıları birneşe märte "wrıp, zorlağanı" turalı jergilikti policiyağa der kezinde şağımdanğanımen, tek üşinşi ret barğanda ğana arızın qabıldağanın aytqan. Bwl habar äleumettik jelige keñ tarap, jergilikti BAQ-tıñ nazarına ilinip, qoğamnıñ aşu-ızasın tudırğan.

“The Qazaq Times”