8 tamız, senbi küni tüske qaray astanağa irgeles (Aqmola oblısına qaraytın) Talapker auılında biıl abaqtıda qaza tapqan azamattıq belsendi, marqwm Dulat Ağadildiñ ası ötti. Jiın barısınan habar taratıp jatqan BAQ jäne belsendilerdiñ mälimetine qarağanda, respublikanıñ är öñirinen äzirge eki jüzden artıq adam kelgen. Azattıqtıñ habarlauınşa, auıl sırtında policiya kölikteri men avtobustarı «saqaday say» twr.  

Ağadildiñ qaraşañırağınıñ aldına üş aqboz üy tigilip, dastarhan jayılğan, är üydiñ bosağasında tu köterilgen. Bastı banner men körneki plakattarda Qazaqstannıñ kartası, belsendiniñ sureti men «08.08.2020» degen jazu beynelengen.

Eske alıp, dwğa bağıştau şarasına jinalğandar aldında marqwmnıñ anası Gülbaraş Jolmwhanbetova, äyeli Gülnar Qasımhanova jäne belsendi Janat Nwrkişev Ağadil öliminiñ «erte ayaqtalğan» tergeui jöninde söz söylep, prokuraturağa jazılğan arızdı oqıp berdi, – dep habarlaydı Azattıq.

Aqpan-toqpanda azamattıq qoğamdı ayaqtan twrğızğan Ağadildiñ ruhına arnalğan asqa policiya ökilderi, Talapker auılınıñ äkimi men sanitar därigeri kelip eskertu jasamaq boldı. Biraq halıq narazılıq bildirgen soñ, olar eşnärse aytpastan keri bwrılıp, ketip qaldı.​ Asqa jinalğan jwrt marqwmnıñ beyit basına barıp dwğa bağıştadı. Jol-jönekey belsendiler şeruletip jürip ötti. Olar «Dulat Ağadil», «Dulat batır!» dep wrandasıp, «Meniñ atamekenim» änin birge şırqastı. Şeruşiler köşin eki qaptaldan arnayı jasaq erip jürdi. Sonday-aq Gülbaraş Jolmwhanbetovanıñ jiın ötip jatqan üyiniñ üstinde wşıp jürgen biliktiñ arnayı dron-kameraları jinalğandardı beynejazbağa tüsirip alğan. Aldağı uaqıtta eldiñ är öñirinen kelgen belsendilerdi policiyağa şaqıru-tergeu jürui de äbden mümkin. Sebebi qazaqstandıq qwqıq qorğauşılardıñ aytuınşa, elde asqa keluge niettengen 30-ğa tarta azamattı policiya wstap ne jolğa şığuına kedergi jasağan. Bügingi asqa qatısqandardı policiya wstağan joq. Dwğa bağıştağan soñ jinalğandar tarap ketken.

Dulat Ağadil biıl aqpan ayınıñ 24-i küni Qazaqstan policiyası alıp ketken soñ abaqtıda jwmbaq jağdayda qaza tapqan. Azamattıq qwqıq pen demokratiyalıq qwndılıqtardıñ orındaluın talap ete jürip köp ret qamalğan belsendi öliminiñ resmi sebebi «jürek qan tamırlarınıñ jetispeuşiligi» dep körsetildi. Degenmen köptegen belsendiler, jwrtşılıq jäne marqwmnıñ tuıstarı bwğan senbeydi.

Bıltır köktemnen beri jiilegen äleumettik narazılıqtardıñ bel ortasında jürgen belsendi ömiriniñ aqırına deyin äkimşilik jaza retinde keminde 60 kündey qamauda bolğan. Artında qalğan altı balası men jarına eriktiler, belsendiler ortadan jılu jiıp, belsendi irgetasın qalap ketken üydiñ qwrılısın ayaqtap bergen. Osığan oray, bügingi as bir jağınan köpşilikke rizaşılıq jiını retinde ötip jatır. As turalı habar tarağalı beri eldiñ är aymağınan kelem degen nietti belsendilerge kedergi köbeyip, bilik qısımı artqan. Osı sebepti de qıstıñ ayazında Ağadildiñ aqtıq saparına qatısqan mıñdağan adamnıñ qarası aytarlıqtay az bolsa kerek.

Auıl sırtında twrğan policiya jasauılı men biıl mamır ayında ğana tağayındalğan Talapker auıldıq okruginiñ äkimi Asqar Jaqsıgeldinov qalay äreket etetini turalı habarlaytın bolamız.

Marqwmnıñ qazasın aşıq äri ädil tergeudi talap etken AQŞ memlekettik departamenti, Wlıbritaniyanıñ Qazaqstandağı elşiligi men EQIW qwramındağı  Demokratiyalıq instituttar jäne adam qwqıqtarı jönindegi byuro basşılığı, azamattıq qoğamnıñ talabına qaramastan, Qazaqstan biligi eldi dürliktirgen isti bir toqsanğa sozbay 29 mamır küni toqtatqan. Qwzırlı organnıñ qorıtındısı boyınşa, Ağadildiñ  qazasına eşkim jauaptı emes körinedi. Alayda mwnımen kelispeytinder köp.

(aqparat tolıqtırıldı)

"The Qazaq Times"