Petropavl qalasında qazaq kompozitorı Segiz seri Bahramwlınıñ 200 jıldığına oray, «Er Jänibek» halıqaralıq qoğamdıq qorı men Soltüstik Qazaqstan oblısı äkimdiginiñ wyımdastıruımen düniejüzi qazaq jastarı arasında şağın futboldan dästürli ER JANIBEK CUP – 2018 turniri ötti.

Jıl sayın jalauı jelbireytin teñbil dop jarısına biıl Franciya, Türkiya, Avstriya, Daniya, Resey, Moñğoliya, Özbek­stan, Iran, Qırğızstan elderinde twratın qazaq jastarınan qwralğan qomandalar, Astana, Almatı qalalarınan jäne elimizdiñ 4 oblısınan jalpı sanı 25 komanda qatıstı. Qızıljar ölkesindegi şaranıñ aşılu saltanatında halıq kompozi­torlarınıñ küyi kümbirlep, äni äueledi. Jasıl alañda sportşılar men jarısqa jinalğan barşa jwrtşılıq qazaqtıñ birtuar aqını, kompozitor Segiz Seriniñ änderin tıñdap, keremet küyge bölendi.

Eki kün boyı «Jastar» stadionında ötken dop dodası tartıstı bäsekege tolı boldı. Tek äuesqoy qwramalardan qwralğan 300-ge tarta sportşı jasıl alañda ayanıp qalmadı. 25 komanda özara 6 topqa bölinip sınğa tüsti. A tobında «Sauır – Almatı» (Almatı), «Qorğan» (Resey), «Astana» (Astana), «Dinamo» (SQO), B tobında «Bos­tandıq», «Qayrat» (Resey, Tümen qalası), «Alaş» (Qırğızstan), «Barıs» (Almatı), C tobında «Bayölke» (Moñğo­liya), «Jasıl el» (BQO), «Namıs» (Resey, Ombı), «Birlik Keruen» (Almatı), D to­bın­da «Dastan» (Iran), «Twlpar» (Pet­ropavl), «Ämir» (Resey, Saratov), «Qızıljar» (Petropavl), E tobında «Sauır – Astana» (Astana), «Dostıq» (Qostanay), Parij kazakh sport (Franciya), «Qızılsu» (Özbekstan) komandaları öner körsetti. Al F tobında FC Europe (Avstriya, Daniya), «Ş.Uälihanov universiteti» (Kökşetau), «Qarağandı» (Qarağandı), «SQMU – İle» (Petropavl) jäne «Türkiya – Stambul» (Türkiya) komandaları özara mıqtını anıqtadı.

Toptıq kezeñdegi tartıstı oyındar futbol tamaşalauğa jinalğan janküyer­lerge erekşe äser sıyladı. Äsirese, 25 komandanıñ arasınan suırılıp alğa şıqqan üzdik 4 komanda arasındağı kezdesuler qızıqqa tolı boldı. Jüldege talas jolında är futbolşı öz komandasın alğa jeteleuge tırısıp baqtı. Nätije­sinde, alañ qo­jayındarı sanalğan petro­pavldıq «Dinamo» almatılıq «Birlik Keruen» qwra­ma­sımen kezdesip, 1-3 esebimen jeñilip qaldı, al kökşetaulıqtar Alma­tınıñ «Sauır» qwramasına 0-1 esebimen ese jiberdi.

Finaldıq kezeñge almatılıq qos ko­manda şıqtı. Kubokqa bir aq adım qalğa­nın sezingen eki komandanıñ futbol­şıları da oyın bastalısımen kombina­ciyalıq oyın örnegin körsetip, şabuılda şiraq, qorğanısta saq oynauğa tırıstı. Sauattı qorğana jürip, qarsılas qaqpasına jauapsız üş gol soqqan «Sauır» komandası kezdesu barısında jeñiske jetip, 1 mil­lion teñgeni qanjığasına bayladı. Jarıs bastalğalı beri üzdik oyınımen erek­şe­lengen «Birlik Keruen» komandası jül­deli 2-orındı enşilep, 500 mıñ teñgeni wtıp aldı. Al jüldeli 3-orınğa ie bolğan kök­şetaulıq «Ş.Uälihanov» komandası – 300 mıñ, 4-orındı qanağat twtqan «Dina­mo» komandası 200 mıñ teñgeniñ sertifikatına ie boldı.

Marapattau räsiminde «Er Jänibek» halıqaralıq qoğamdıq qorınıñ törağası Jeñis Türkiya söz söyledi.
– «Er Jänibek qorı» 2006 jılı qwrıl­ğan bolatın. Onıñ negizgi maqsatı da, atal­ğan jobası da şeteldegi jastardıñ Qa­zaq­standağı jastarmen aralasuı, bay­lanısta boluı. Osı maqsatta törtinşi ret ötkizilip otırğan «Er Jänibek kubogınıñ» Petro­pavl qalasında ötuine mwrındıq bolğan Soltüstik Qazaqstan oblısınıñ äkimine jäne äkimşilikke alğısımızdı bildiremin, – dedi ol.
Jarıstıñ bas töreşisi Qanat Mwhamed­janov turnirde üzdik oyınımen közge tüsken futbolşılardı anıqtap, olarğa arnayı jülde tapsırdı. Petropavldıq «Dinamo» komandasınıñ oyınşısı Ruslan Köpeev – «Üzdik şabuılşı», kökşetaulıq «Ş.Uälihanov universiteti» komandasınıñ qaqpaşısı Ahmadeev Mwhamadiya – «Üzdik qaqpaşı», almatılıq «Birlik Keruen» komandasınıñ oyınşısı Erkin Nwrjanov – «Üzdik qorğauşı», alma­tılıq «Sauır» komandasınıñ futbol­şısı Quanış Sovetov «Üzdik swrmergen» jüldesimen marapattaldı. Al «Astananıñ 20 jıldığı» jüldesin Türkiyanıñ «Türkiya – Stambul» komandası ielendi. «Wlttıq ruh» jüldesi Avstriyanıñ Vena qalasınan kelgen Europe komandasına bwyırdı.

Eki kün boyı Qızıljar öñirinde ötken dop dodası ayaqtalğan soñ jarısqa kelgen qatısuşılardıñ pikirin bilgen bola­tınbız. Daniyadan kelgen futbolşı Alp Sara futbol jarısı jöninde öz oyımen bölisti.
– Bwl meniñ Qazaqstanğa alğaş keluim. Mağan anam tarihi Otanım turalı jii aytatın. Biıl mine, anamnıñ tuğan jerine kelip, futboldan sayısqa qatısuğa müm­kindik aldım. Öte quanıştımın, – dedi futbolşı.
«Türkiya – Stambul» qwramasınıñ jattıqtıruşısı Arğınbek Güler de jarıstıñ joğarı deñgeyde ötkenin ayta kele, şaranı wyımdastıruşılarğa alğı­sın jetkizdi.
– Biz Qazaqstan eline kelip joğarı deñ­geyde wyımdastırılğan dop jarısına qatısqanımızğa quanıştımız. Älem elderindegi qazaqtar tarihi otanına kelip, bir-birimen tanısıp, ülken futbol mereke­sine ortaqtasqanı qanday keremet. Bwl ürdis jıl sayın jalğasın taba bersin. Biz de ja­rıs­qa quana qatısa bereyik, – dedi bas bapker.

Tüyin:
Älem elderinde twratın qazaq jastarınıñ basın qosıp, olardıñ arasındağı baylanıstı nığaytıp, atamekenge, Qazaqstanğa degen süyispenşilikti arttıru maqsatında wyımdastırğan ER JANIBEK CUP – 2018 turniri de öz märesine jetti. Soltüstik Qazaqstan jerinde ötken dop dodası joğarı deñgeyde ötkenin körip, quanıştan jüzimiz bal-bwl jaynadı. Berekesi men birligi jarasqan ğajayıp mekende älemniñ är qiırınan kelip, igi şarağa ortaqtasqan qandastarımız da riza bolıp tarqastı. Biz de Qızıljar öñirimen qimay qoştastıq.

Abılayhan JWMAŞ

Petropavl qalası

Ayqın gazeti

“The Qazaq Times”