2018 jıldıñ 13-15 şilde künderi,  Petropavl qalasında, Segiz seri Bahramwlınıñ 200 jıldığına arnalğan «Er Jänibek» halıqaralıq qoğamdıq qorı men Soltüstik Qazaqstan oblısınıñ äkimdiginiñ wyımdastıruında, düniejüzi qazaq jastarı arasında şağın futboldan dästürli «ER JANIBEK CUP-2018» turniri ötti. 

Turinerdiñ aşılu saltanatına Soltüstik Qazaqstan oblısı äkiminiñ orınbasarı Jandarbek Däuren men «Er Jänibek» halıqaralıq qoğamdıq qorınıñ törağası Jeñis Türkiya, qoğam qayratkeri Baltaş Twrsınbay, ğalım, wstaz Küläş Ahmet qatarlı kisiler Segiz seriniñ öneri men ömirinen sır şertip, törtkül dünieden jinalğan qazaq jastarına qazaq elinen ruhani azıq alıp qaytuğa, bir-birimen dostasıp qaytuğa şaqırsa, Soltüstik Qazaqstan oblısınıñ önerpazdarı Segiz seriniñ änderinen tamıljıta saldı.

Türkiyadağı qazaq jastarınıñ komadaların bastap kelgen qandasımız Arğınbek Öner «Men Türkiya, Franciya, Avstriya, Daniya qazaqtarınan köp-köp sälem alıp keldim. Qabıl alıñızdar. Şetelde jürgennen keyin Otanımız - Qazaqstan bizdi şaqırıp,  qol sözğannan keyin elge qaray jügire kelemiz ğoy. Biz jastarğa Qazaqstan degen otanımız, Elimiz bar degennen artıq baqıt joq dep oylaymın. Sondıqtan Otanımızdıñ törinde bärimizdiñ basımızdı qosqandarıñızğa köp-köp raqmet aytamın», dep wyımdastıruşılarğa alğısın bildirdi.

«ER JANIBEK CUP-2018» turnirin wyımdastırğan «Er Jänibek» halıqaralı qoğamdıq qorınıñ törağası Jeñis Türkiya  «Soltüstik öñirden köptegen wlı twlğalar şıqqan. Säkender şıqqan, Qojabergen jırau, Segiz seriler şıqqan. Segiz seriniñ 200 jıldığına oray  Älemniñ är bwrışındağı qazaq jastarın bir-birimen tanıssın, Qazaq elimen, Qazaqtıñ jerimen tanısıp, täuelsiz azamat ekendikterin sezinsin dep jinadıq. Osımen 4-şı jıl ötken turnirge Franciya, Avstriya, Daniya, Italiya, Türkiya, Qıtay, Resey, Moñğoliya, Iran, Özbekstan jäne Qırğızstandağı etnikalıq qazaq jastarı men Qazaqstannıñ qalaları men oblıstarınan jalpı 25 futbol komandası qatıstı. Qazaqtıñ är oblısınan şıqqan äygili twlğalar jeterlik, bwdan keyingi jıldarı özge oblıstardıñ äkimşilikteri birge jwmıs jasaymız dese basqa oblıstarda da ötkizip, sol oblıstarımız ben twlğalarımızdı düniejüzi qazaq jastarına tanıstıruğa dayınbız. Bwl retki ötken şarağa qatısqan jastarda qazaq jeriniñ soltüstigimen tanısıp qaytsa, Soltüstik jwrtı da qazaq bauırların körip quanıp qaldı», - dep şaranıñ bastı maqsatın aytıp ötti.

Jarıs qorıtındısı boyınşa, İ-orındı (1 000 000 teñge qarjılay jülde) Almatı qalasınan «Sauır» komandası, İİ-orındı (500 000 teñge qarjılay jülde)  «Birlik Keruen» (Almatı), İİİ-orındı (300 000 teñge qarjılay jülde)  Ş.Uälihanov atındağı Kökşetau Memlekettik Universiteti, al törtinşi orındı (200 000 teñge qarjılay jülde) petropavldıq «Dinamo» komandası iemdendi. Olardıñ işinde, «Üzdik şabuılşı» retinde — Ruslan Köpeev (Dinamo, Petropavl), "Üzdik qaqpaşı" — Mwhamadiya Ahmadeev (Ş.Uälihanov atındağı KMU), "Üzdik qorğauşı" — Erkin Nwrjanov (Birlik Keruen, Almatı), «Swrmergen» (Bombardir) üzdigi retinde — Quanış Sovetov (19-dop, Sauır, Almatı) anıqtaldı. Al, «Astananıñ 20 jıldığı» nominaciyası boyınşa — Istambwl, Türkiya jeñiske jetse, «Wlttıq ruhtı» — "FC Europe" komandası (Avstriya, Vena) qanjığağa bayladı.

Älemniñ är elinen kelgen jastar Soltüstiktiñ körkem täbiğatına qızığıp, tipti arasında «Qızıljarğa köşip kelgim keledi» degenderi de tabıldı. «Er Jänibek» qorı wyımdastırğan turnirge osımen törtınşi ret qatısıqanı da, birinşi ret kelip otırğandar da bar eken. Osı 25 komandanıñ biri M. Qozıbaev atında Soltüstik Qazaqstan universietiniñ Dayındıq böliminde oqitın şetelden kelgen qazaq jastarınan qwralıptı. Dayındıq bölimdegi Moñğoliya men QHR-nan kelgen studentter turnirdiñ ekinşi küni joğarğı oqu orına tüsu üşin emtihan tapsırıp jattı. Bwl komandanıñ jigitteri atalğan univeritetke oquğa tüsip, osı qalada qalıp, ata-ana, tuıs-tuğandarın köşirip äkelmek nietteri barın jetkizdi.

Şetelden kelgen biraz jastar quanıştı köñil küylerin bildirip, öz oy pikirlerin aytıp jattı. Sonıñ biri daniyalıq bauırımz Amir Egimbet «Bwl turnirge birinşi ret qatısıp otırmın. Qazaqstanğa bwğan deyin üş ret kelgenmin. Turnir mağan qattı wnadı. Basqa elderden kelgen dostarımızben tanısıp jatırmız. Venadan kelgen 4 balamen birge eki daniyalıq jigit Europa komandası retinde qatısıp otırmız. Daniyada 8,9 otbası qazaq barmız. Ayt merekelerinde, toy-tomalaqta bas qosıp twramız. Otbasımızda ata-anamız basqa tilde söyleuge jol bermeydi, sondıqtan bizge basqa qazaq balalarımen söylesuge eşqanday qiındıq tumaydı. Qazir Daniyada studentpin, Qazaqstanğa kelsem oquımdı bitirgennen keyin keletin şığarmın» - dese, Avstriyanıñ Vena qalasınan kelgen Erjwma attı jigit «Biz Auropa komandası retinde qatısıp otırmız. Venadan 4 bala keldik. Mwnda qazaq qandastarımızben basımız qosılıp quanıp jatırmız. Osınday şaralardıñ bolğanı bizge öte qajet. Astana, Petropavl qalaları öte wnap jatır. Osı şaranı wyımdastırğan «Er Jänibek» qorına raqmet!» degen alğısın jetkizdi.

Irannan köşip kelip Almatı oblısında twrıp jatqan qandasımız Janpeyis Rezo «Biz bwl jarısqa osımen 3- ret qatısıp otırmız. Reseydiñ bir qalasında qazaq bar ma desem? Bwl  jolı 4 qalasında qazaq barın bildim, Avstriyada qazaqtar twratının bildim. Sol siyaqtı qatısqan sayın köptegen dos tauıp ketemiz. Bärimiz qazaq bolğan soñ bir-birimizben tez til tabısıp jatamız. Osı orayda basımızdı qosıp jatqan «Er Jänibek» qorına raqmetimdi aytqım keledi. Soltüstik Qazaqstanğa kelip, täbiğatın körip quanıp qaldıq. Jılda kelip twrsam, mümkin bolsa osı jerge köşip kelsem degen oyım bar. Mwnda qazaqtar az twradı eken. Biz Qazaqstanğa Irannan 20 mıñday qazaq köşip kelgenbiz. Kelgen 20 mıñ qazaq ösip, 100 mıñ qazaqqa jettik. Bizde erte üylenedi. Mwndağı dostarımnıñ keybiriniñ 3,4 balası bar. Men de ötken aptada üylendim. Toyımdı ötkize sala, Qızıljarğa kelip twrmın. Bolaşaqta osı qalanıñ twrğını bolıp, osında ösip-önsek degen nietim bar», - dep aqtarıldı.

Rezonıñ  osı sözi qazağın kütip jatqan keñ baytaq dalanıñ şetine ornalasqan, körşimiz kigizgen eski şekpenin äli şeşpey Petropavl atalıp jürgen qalağa düniejüzi qazaq jastarınıñ basın qosudağı maqsattıñ orındalğanın bildirse kerek. Düyim jwrttı jinağan jinalıstıñ tüyini de osı bolmaq.

Jebeu.kz

“The Qazaq Times”