پەتروپاۆل قالاسىندا قازاق كومپوزيتورى سەگىز سەرى باحرامۇلىنىڭ 200 جىلدىعىنا وراي، «ەر جانىبەك» حالىقارالىق قوعامدىق قورى مەن سولتۇستىك قازاقستان وبلىسى اكىمدىگىنىڭ ۇيىمداستىرۋىمەن دۇنيەجۇزى قازاق جاستارى اراسىندا شاعىن فۋتبولدان ءداستۇرلى ER JANIBEK CUP – 2018 ءتۋرنيرى ءوتتى.
جىل سايىن جالاۋى جەلبىرەيتىن تەڭبىل دوپ جارىسىنا بيىل فرانتسيا، تۇركيا، اۆستريا، دانيا، رەسەي، موڭعوليا، وزبەكستان، يران، قىرعىزستان ەلدەرىندە تۇراتىن قازاق جاستارىنان قۇرالعان قوماندالار، استانا، الماتى قالالارىنان جانە ەلىمىزدىڭ 4 وبلىسىنان جالپى سانى 25 كوماندا قاتىستى. قىزىلجار ولكەسىندەگى شارانىڭ اشىلۋ سالتاناتىندا حالىق كومپوزيتورلارىنىڭ كۇيى كۇمبىرلەپ، ءانى اۋەلەدى. جاسىل الاڭدا سپورتشىلار مەن جارىسقا جينالعان بارشا جۇرتشىلىق قازاقتىڭ ءبىرتۋار اقىنى، كومپوزيتور سەگىز سەرىنىڭ اندەرىن تىڭداپ، كەرەمەت كۇيگە بولەندى.
ەكى كۇن بويى «جاستار» ستاديونىندا وتكەن دوپ دوداسى تارتىستى باسەكەگە تولى بولدى. تەك اۋەسقوي قۇرامالاردان قۇرالعان 300-گە تارتا سپورتشى جاسىل الاڭدا ايانىپ قالمادى. 25 كوماندا ءوزارا 6 توپقا ءبولىنىپ سىنعا ءتۇستى. A توبىندا «ساۋىر – الماتى» (الماتى), «قورعان» (رەسەي), «استانا» (استانا), «دينامو» (سقو), B توبىندا «بوستاندىق»، «قايرات» (رەسەي، تۇمەن قالاسى), «الاش» (قىرعىزستان), «بارىس» (الماتى), C توبىندا «بايولكە» (موڭعوليا), «جاسىل ەل» (بقو), «نامىس» (رەسەي، ومبى), «بىرلىك كەرۋەن» (الماتى), D توبىندا «داستان» (يران), «تۇلپار» (پەتروپاۆل), «ءامىر» (رەسەي، ساراتوۆ), «قىزىلجار» (پەتروپاۆل), E توبىندا «ساۋىر – استانا» (استانا), «دوستىق» (قوستاناي), Parij kazakh sport (فرانتسيا), «قىزىلسۋ» (وزبەكستان) كوماندالارى ونەر كورسەتتى. ال F توبىندا FC Europe (اۆستريا، دانيا), «ش.ءۋاليحانوۆ ۋنيۆەرسيتەتى» (كوكشەتاۋ), «قاراعاندى» (قاراعاندى), «سقمۋ – ىلە» (پەتروپاۆل) جانە «تۇركيا – ستامبۋل» (تۇركيا) كوماندالارى ءوزارا مىقتىنى انىقتادى.
توپتىق كەزەڭدەگى تارتىستى ويىندار فۋتبول تاماشالاۋعا جينالعان جانكۇيەرلەرگە ەرەكشە اسەر سىيلادى. اسىرەسە، 25 كوماندانىڭ اراسىنان سۋىرىلىپ العا شىققان ۇزدىك 4 كوماندا اراسىنداعى كەزدەسۋلەر قىزىققا تولى بولدى. جۇلدەگە تالاس جولىندا ءار فۋتبولشى ءوز كومانداسىن العا جەتەلەۋگە تىرىسىپ باقتى. ناتيجەسىندە، الاڭ قوجايىندارى سانالعان پەتروپاۆلدىق «دينامو» الماتىلىق «بىرلىك كەرۋەن» قۇراماسىمەن كەزدەسىپ، 1-3 ەسەبىمەن جەڭىلىپ قالدى، ال كوكشەتاۋلىقتار الماتىنىڭ «ساۋىر» قۇراماسىنا 0-1 ەسەبىمەن ەسە جىبەردى.
فينالدىق كەزەڭگە الماتىلىق قوس كوماندا شىقتى. كۋبوكقا ءبىر اق ادىم قالعانىن سەزىنگەن ەكى كوماندانىڭ فۋتبولشىلارى دا ويىن باستالىسىمەن كومبيناتسيالىق ويىن ورنەگىن كورسەتىپ، شابۋىلدا شيراق، قورعانىستا ساق ويناۋعا تىرىستى. ساۋاتتى قورعانا ءجۇرىپ، قارسىلاس قاقپاسىنا جاۋاپسىز ءۇش گول سوققان «ساۋىر» كومانداسى كەزدەسۋ بارىسىندا جەڭىسكە جەتىپ، 1 ميلليون تەڭگەنى قانجىعاسىنا بايلادى. جارىس باستالعالى بەرى ۇزدىك ويىنىمەن ەرەكشەلەنگەن «بىرلىك كەرۋەن» كومانداسى ءجۇلدەلى 2-ورىندى ەنشىلەپ، 500 مىڭ تەڭگەنى ۇتىپ الدى. ال جۇلدەلى 3-ورىنعا يە بولعان كوكشەتاۋلىق «ش.ءۋاليحانوۆ» كومانداسى – 300 مىڭ، 4-ورىندى قاناعات تۇتقان «دينامو» كومانداسى 200 مىڭ تەڭگەنىڭ سەرتيفيكاتىنا يە بولدى.
ماراپاتتاۋ راسىمىندە «ەر جانىبەك» حالىقارالىق قوعامدىق قورىنىڭ توراعاسى جەڭىس تۇركيا ءسوز سويلەدى.
– «ەر جانىبەك قورى» 2006 جىلى قۇرىلعان بولاتىن. ونىڭ نەگىزگى ماقساتى دا، اتالعان جوباسى دا شەتەلدەگى جاستاردىڭ قازاقستانداعى جاستارمەن ارالاسۋى، بايلانىستا بولۋى. وسى ماقساتتا ءتورتىنشى رەت وتكىزىلىپ وتىرعان «ەر جانىبەك كۋبوگىنىڭ» پەتروپاۆل قالاسىندا وتۋىنە مۇرىندىق بولعان سولتۇستىك قازاقستان وبلىسىنىڭ اكىمىنە جانە اكىمشىلىككە العىسىمىزدى بىلدىرەمىن، – دەدى ول.
جارىستىڭ باس تورەشىسى قانات مۇحامەدجانوۆ تۋرنيردە ۇزدىك ويىنىمەن كوزگە تۇسكەن فۋتبولشىلاردى انىقتاپ، ولارعا ارنايى جۇلدە تاپسىردى. پەتروپاۆلدىق «دينامو» كومانداسىنىڭ ويىنشىسى رۋسلان كوپەەۆ – «ۇزدىك شابۋىلشى»، كوكشەتاۋلىق «ش.ءۋاليحانوۆ ۋنيۆەرسيتەتى» كومانداسىنىڭ قاقپاشىسى احمادەەۆ مۇحاماديا – «ۇزدىك قاقپاشى»، الماتىلىق «بىرلىك كەرۋەن» كومانداسىنىڭ ويىنشىسى ەركىن نۇرجانوۆ – «ۇزدىك قورعاۋشى»، الماتىلىق «ساۋىر» كومانداسىنىڭ فۋتبولشىسى قۋانىش سوۆەتوۆ «ۇزدىك سۇرمەرگەن» جۇلدەسىمەن ماراپاتتالدى. ال «استانانىڭ 20 جىلدىعى» جۇلدەسىن تۇركيانىڭ «تۇركيا – ستامبۋل» كومانداسى يەلەندى. «ۇلتتىق رۋح» جۇلدەسى اۆستريانىڭ ۆەنا قالاسىنان كەلگەن Europe كومانداسىنا بۇيىردى.
ەكى كۇن بويى قىزىلجار وڭىرىندە وتكەن دوپ دوداسى اياقتالعان سوڭ جارىسقا كەلگەن قاتىسۋشىلاردىڭ پىكىرىن بىلگەن بولاتىنبىز. دانيادان كەلگەن فۋتبولشى الپ سارا فۋتبول جارىسى جونىندە ءوز ويىمەن ءبولىستى.
– بۇل مەنىڭ قازاقستانعا العاش كەلۋىم. ماعان انام تاريحي وتانىم تۋرالى ءجيى ايتاتىن. بيىل مىنە، انامنىڭ تۋعان جەرىنە كەلىپ، فۋتبولدان سايىسقا قاتىسۋعا ءمۇمكىندىك الدىم. وتە قۋانىشتىمىن، – دەدى فۋتبولشى.
«تۇركيا – ستامبۋل» قۇراماسىنىڭ جاتتىقتىرۋشىسى ارعىنبەك گۇلەر دە جارىستىڭ جوعارى دەڭگەيدە وتكەنىن ايتا كەلە، شارانى ۇيىمداستىرۋشىلارعا العىسىن جەتكىزدى.
– ءبىز قازاقستان ەلىنە كەلىپ جوعارى دەڭگەيدە ۇيىمداستىرىلعان دوپ جارىسىنا قاتىسقانىمىزعا قۋانىشتىمىز. الەم ەلدەرىندەگى قازاقتار تاريحي وتانىنا كەلىپ، ءبىر-بىرىمەن تانىسىپ، ۇلكەن فۋتبول مەرەكەسىنە ورتاقتاسقانى قانداي كەرەمەت. بۇل ءۇردىس جىل سايىن جالعاسىن تابا بەرسىن. ءبىز دە جارىسقا قۋانا قاتىسا بەرەيىك، – دەدى باس باپكەر.
ءتۇيىن:
الەم ەلدەرىندە تۇراتىن قازاق جاستارىنىڭ باسىن قوسىپ، ولاردىڭ اراسىنداعى بايلانىستى نىعايتىپ، اتامەكەنگە، قازاقستانعا دەگەن سۇيىسپەنشىلىكتى ارتتىرۋ ماقساتىندا ۇيىمداستىرعان ER JANIBEK CUP – 2018 ءتۋرنيرى دە ءوز مارەسىنە جەتتى. سولتۇستىك قازاقستان جەرىندە وتكەن دوپ دوداسى جوعارى دەڭگەيدە وتكەنىن كورىپ، قۋانىشتان ءجۇزىمىز بال-بۇل جاينادى. بەرەكەسى مەن بىرلىگى جاراسقان عاجايىپ مەكەندە الەمنىڭ ءار قيىرىنان كەلىپ، يگى شاراعا ورتاقتاسقان قانداستارىمىز دا ريزا بولىپ تارقاستى. ءبىز دە قىزىلجار وڭىرىمەن قيماي قوشتاستىق.
ابىلايحان جۇماش
پەتروپاۆل قالاسى
ايقىن گازەتى
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
موڭعوليا استاناسىندا جاپپاي نارازىلىق شەرۋلەرى ءوتتى
ەكىباستۇزدا جىلۋ جەلىسىندەگى اقاۋعا "ستانتسيا قىزمەتكەرىنىڭ قاتەلىگى" سەبەپ بولعانى ايتىلدى
وزبەكستان پرەزيدەنتى جەلتوقساندا قىرعىزستانعا بارادى