Jansaya Adıhanova 1999 jıldıñ 30-jeltoqsanında Qarağandı oblısı, Jezqazğan qalasında düniege kelgen. Qayrat Adıhanov pen Zarema Orazqızınıñ otbasındağı üş qızdıñ kenjesi. Ayzada Töleuhan jäne Janbota Adıhanova esimdi äpkelerimen birge saz önerine qızığıp, qolına skripka alğan sätteri de boldı.  Mektepke 5 jasında barıp, 16 jasında tämamdadı.  Almatıdağı 172-şi mektep-gimnaziyanı «Altın belgimen» bitirdi.  Eñ alğaş 4-5 jasında äpkesi qıs mezgilindegi jay köñil köteru oyını esebinde kon'kimen jürudi üyretken. Al 9 jasında anası Almatıdağı  «Mega ortalıqtağı» üyirmedegi «densaulıq» tobına jazdırıp, Oksana Karidıñ qolına tabıstaydı. Ol jerde közge tüsken Jansayanı Elena Matyuh birden anasına aytıp sport tobına aldırdı.  Sodan beri 11 jıl  köleminde  mänerlep sırğanaumen şwğıldanıp keledi. Qazir Jansaya äl-Farabi atındağı QazWU-diñ  halıqaralıq qatınastar böliminde bilim alıp jatır.

Jansaya Adıhanova 28-şi bükilälemdik qısqı Universiada öner körsetti. Qısqa bağdarlamada 32.37, negizgi bağdarlamada  59.72 wpaylar jinap (jalpı 90.02 wpay) 22-orın aldı.

– Jansaya, negizgi bağdarlamadan keyingi nätijeni estigende köziñe kelip tığılğan jastı kördik. Quanıştıñ ba, joq älde ökiniştiñ jası ma?

– Ärine, ol ökinişten. İstep jürgen ädisterimniñ işinde köbisin jasağan joqpın. Men tek 50% ğana önerimdi mwz üstinde körsete aldım. Şını kerek, qobaljıdım. Keyinnen bapkerim ekeuimiz jibergen qatelikterdi taldap, keleşekke sabaq esebinde qabıldadıq.

– Sportşılardıñ köbisi «öz qabırğañda» yağni öz eliñde ötip jatqan jarısta, öz janküyerleriñniñ aldında öner körsetu qiınğa tüsedi» dep jatadı. Qazaqstandağı alğaşqı älemdik jarısıñ sağan qalay äser etti?.

– Ras, öz janküyerleriñniñ aldında öner körsetu – sağan artılğan ülken jük. Senimderine selkeu tüsirmey, sätti orındap şığuğa tırıstım. «Aqtay almay qalamın ba?» degen qorqınış basım boldı. Jalpı, janküyerleriñniñ bar ekenin sezinu – sportşınıñ eñ baqıttı säti dep esepteymin. Tilektestik bildirgen ärbir janğa raqmet aytamın!..

– Janküyerlerdiñ ıqılası erekşe boldı. İstegen är sätti ädisiñe qol şapalaqtasa, qwlağan sätiñde «qap!» dep jattı. Jalpı öziñizdiñ nätijeñizge köñiliñiz tola ma?.

– Joq. Äsirese, negizgi bağdarlamada özim oylağanday öner körsete almadım. Bwl men üşin ülken sabaq boldı. Kelesi jarıstarda barımdı salamın.

– Ayza Imanbek siyaqtı bolaşaqta öz bağdarlamaña qazaqtıñ küyin, bolmasa basqada äuenin qoyu josparda bar ma?.

– Negizi biıl qoymaq bolğanmın. Ayza qoyatın boldı, eger oğan men de qosılsam, bir äuenge, bolmasa wqsas küyge bilep ketetindey körindik. Bwyırtsa aldağı mausımda eki bağdarlamamamnıñ birine engizgim keledi.

– Bidegi ädisteriñ jıl sanap kürdelenip keledi. Quanıştımız!. Jattığularıñız qay jerde, qalay ötedi?.

– Kündelikti jattığamız. Key kezderi ğana bapkerimizdiñ rwqsatımen jeksenbi küni demalamız. Jattığuımızdı Almatıda jäne Ayza ekeumiz Sankt-Peterburgtağı «Zvezdnıy led» mektebinde ötkizemiz.

– Denis Ten kumiriñiz eken. Ten sizge nesimen wnaydı, qay ädisteri üşin bağalaysız, bolmasa azamattıq twrğıdan joğarı qoyasız ba?.

– Qazaqstandağı mänerlep sırğanau sportın biik deñgeyge kötergen adam esebinde-aq közdi jwmıp twrıp jaqsı köruge boladı. Denis Tendi sportşı esebinde de, adamgerşilik twrğıdan da kumir etuge layıqtı.

– Hobbilarıñızdıñ biri kitap oqu eken. Soñğı ret qanday kitap oqıdıñız, ol sizge qalay äser etti?.

– Detektiv janrın janım süyedi. Ol meyli kitap bolsın, kino bolsın, solardı oqu, köru qattı wnaydı. Al soñğı oqığan kitabım – Agata Kristidiñ «Ubiystva po alfavitu». Özime wnadı.

– Evgeniy Şalaev qanday bapker jäne osığan deyin sizge bi qoyıp berip jürgen Natal'ya Popova sizge nesimen erekşelendi?.

– Qazir Evgeniy Şalaevpen birge Qwralay Üzirova jattıqtıradı. Ekeui de bilikti mamandar. Olarmen jwmıs istegen wnaydı. Bwl birinşi jıl emes, men mänerlep sırğanau sportın tañdağan altı jıldıñ üş jılın osı kisilermen birge ötkizdim. Al Sankt-Peterburgta Oleg esimdi azamat qadağalaydı.

– Swhbatıñızğa raqmet!..

Serik QANTAY

«The Qazaq Times»