جانسايا ادىحانوۆا 1999 جىلدىڭ 30-جەلتوقسانىندا قاراعاندى وبلىسى، جەزقازعان قالاسىندا دۇنيەگە كەلگەن. قايرات ادىحانوۆ پەن زارەما ورازقىزىنىڭ وتباسىنداعى ءۇش قىزدىڭ كەنجەسى. ايزادا تولەۋحان جانە جانبوتا ادىحانوۆا ەسىمدى اپكەلەرىمەن بىرگە ساز ونەرىنە قىزىعىپ، قولىنا سكريپكا العان ساتتەرى دە بولدى.  مەكتەپكە 5 جاسىندا بارىپ، 16 جاسىندا ءتامامدادى.  الماتىداعى 172-ءشى مەكتەپ-گيمنازيانى «التىن بەلگىمەن» ءبىتىردى.  ەڭ العاش 4-5 جاسىندا اپكەسى قىس مەزگىلىندەگى جاي كوڭىل كوتەرۋ ويىنى ەسەبىندە كونكيمەن ءجۇرۋدى ۇيرەتكەن. ال 9 جاسىندا اناسى الماتىداعى  «مەگا ورتالىقتاعى» ۇيىرمەدەگى «دەنساۋلىق» توبىنا جازدىرىپ، وكسانا كاريدىڭ قولىنا تابىستايدى. ول جەردە كوزگە تۇسكەن جانسايانى ەلەنا ماتيۋح بىردەن اناسىنا ايتىپ سپورت توبىنا الدىردى.  سودان بەرى 11 جىل  كولەمىندە  مانەرلەپ سىرعاناۋمەن شۇعىلدانىپ كەلەدى. قازىر جانسايا ءال-فارابي اتىنداعى قازۇۋ-ءدىڭ  حالىقارالىق قاتىناستار بولىمىندە ءبىلىم الىپ جاتىر.

جانسايا ادىحانوۆا 28-ءشى بۇكىلالەمدىك قىسقى ۋنيۆەرسيادا ونەر كورسەتتى. قىسقا باعدارلامادا 32.37, نەگىزگى باعدارلامادا  59.72 ۇپايلار جيناپ (جالپى 90.02 ۇپاي) 22-ورىن الدى.

– جانسايا، نەگىزگى باعدارلامادان كەيىنگى ناتيجەنى ەستىگەندە كوزىڭە كەلىپ تىعىلعان جاستى كوردىك. قۋانىشتىڭ با، جوق الدە وكىنىشتىڭ جاسى ما؟

– ارينە، ول وكىنىشتەن. ىستەپ جۇرگەن ادىستەرىمنىڭ ىشىندە كوبىسىن جاساعان جوقپىن. مەن تەك 50% عانا ونەرىمدى مۇز ۇستىندە كورسەتە الدىم. شىنى كەرەك، قوبالجىدىم. كەيىننەن باپكەرىم ەكەۋىمىز جىبەرگەن قاتەلىكتەردى تالداپ، كەلەشەككە ساباق ەسەبىندە قابىلدادىق.

– سپورتشىلاردىڭ كوبىسى «ءوز قابىرعاڭدا» ياعني ءوز ەلىڭدە ءوتىپ جاتقان جارىستا، ءوز جانكۇيەرلەرىڭنىڭ الدىندا ونەر كورسەتۋ قيىنعا تۇسەدى» دەپ جاتادى. قازاقستانداعى العاشقى الەمدىك جارىسىڭ ساعان قالاي اسەر ەتتى؟.

– راس، ءوز جانكۇيەرلەرىڭنىڭ الدىندا ونەر كورسەتۋ – ساعان ارتىلعان ۇلكەن جۇك. سەنىمدەرىنە سەلكەۋ تۇسىرمەي، ءساتتى ورىنداپ شىعۋعا تىرىستىم. «اقتاي الماي قالامىن با؟» دەگەن قورقىنىش باسىم بولدى. جالپى، جانكۇيەرلەرىڭنىڭ بار ەكەنىن سەزىنۋ – سپورتشىنىڭ ەڭ باقىتتى ءساتى دەپ ەسەپتەيمىن. تىلەكتەستىك بىلدىرگەن ءاربىر جانعا راقمەت ايتامىن!..

– جانكۇيەرلەردىڭ ىقىلاسى ەرەكشە بولدى. ىستەگەن ءار ءساتتى ادىسىڭە قول شاپالاقتاسا، قۇلاعان ساتىڭدە «قاپ!» دەپ جاتتى. جالپى ءوزىڭىزدىڭ ناتيجەڭىزگە كوڭىلىڭىز تولا ما؟.

– جوق. اسىرەسە، نەگىزگى باعدارلامادا ءوزىم ويلاعانداي ونەر كورسەتە المادىم. بۇل مەن ءۇشىن ۇلكەن ساباق بولدى. كەلەسى جارىستاردا بارىمدى سالامىن.

– ايزا يمانبەك سياقتى بولاشاقتا ءوز باعدارلاماڭا قازاقتىڭ كۇيىن، بولماسا باسقادا اۋەنىن قويۋ جوسپاردا بار ما؟.

– نەگىزى بيىل قويماق بولعانمىن. ايزا قوياتىن بولدى، ەگەر وعان مەن دە قوسىلسام، ءبىر اۋەنگە، بولماسا ۇقساس كۇيگە بيلەپ كەتەتىندەي كورىندىك. بۇيىرتسا الداعى ماۋسىمدا ەكى باعدارلامامامنىڭ بىرىنە ەنگىزگىم كەلەدى.

– بيدەگى ادىستەرىڭ جىل ساناپ كۇردەلەنىپ كەلەدى. قۋانىشتىمىز!. جاتتىعۋلارىڭىز قاي جەردە، قالاي وتەدى؟.

– كۇندەلىكتى جاتتىعامىز. كەي كەزدەرى عانا باپكەرىمىزدىڭ رۇقساتىمەن جەكسەنبى كۇنى دەمالامىز. جاتتىعۋىمىزدى الماتىدا جانە ايزا ەكەۋمىز سانكت-پەتەربۋرگتاعى «زۆەزدنىي لەد» مەكتەبىندە وتكىزەمىز.

– دەنيس تەن كۋميرىڭىز ەكەن. تەن سىزگە نەسىمەن ۇنايدى، قاي ادىستەرى ءۇشىن باعالايسىز، بولماسا ازاماتتىق تۇرعىدان جوعارى قوياسىز با؟.

– قازاقستانداعى مانەرلەپ سىرعاناۋ سپورتىن بيىك دەڭگەيگە كوتەرگەن ادام ەسەبىندە-اق كوزدى جۇمىپ تۇرىپ جاقسى كورۋگە بولادى. دەنيس تەندى سپورتشى ەسەبىندە دە، ادامگەرشىلىك تۇرعىدان دا كۋمير ەتۋگە لايىقتى.

– حوببيلارىڭىزدىڭ ءبىرى كىتاپ وقۋ ەكەن. سوڭعى رەت قانداي كىتاپ وقىدىڭىز، ول سىزگە قالاي اسەر ەتتى؟.

– دەتەكتيۆ جانرىن جانىم سۇيەدى. ول مەيلى كىتاپ بولسىن، كينو بولسىن، سولاردى وقۋ، كورۋ قاتتى ۇنايدى. ال سوڭعى وقىعان كىتابىم – اگاتا كريستيدىڭ «ۋبيستۆا پو الفاۆيتۋ». وزىمە ۇنادى.

– ەۆگەني شالاەۆ قانداي باپكەر جانە وسىعان دەيىن سىزگە بي قويىپ بەرىپ جۇرگەن ناتاليا پوپوۆا سىزگە نەسىمەن ەرەكشەلەندى؟.

– قازىر ەۆگەني شالاەۆپەن بىرگە قۇرالاي ءۇزىروۆا جاتتىقتىرادى. ەكەۋى دە بىلىكتى ماماندار. ولارمەن جۇمىس ىستەگەن ۇنايدى. بۇل ءبىرىنشى جىل ەمەس، مەن مانەرلەپ سىرعاناۋ سپورتىن تاڭداعان التى جىلدىڭ ءۇش جىلىن وسى كىسىلەرمەن بىرگە وتكىزدىم. ال سانكت-پەتەربۋرگتا ولەگ ەسىمدى ازامات قاداعالايدى.

– سۇحباتىڭىزعا راقمەت!..

سەرىك قانتاي

«The Qazaq Times»