Elorda törinde «Asqaqtay ber, Astana!» Türkistan oblısı önerpazdarınıñ Gala-koncerti ötti. Elbasınıñ «Bolaşaqqa bağdar: ruhani jañğıru» bağdarlamalıq maqalası men Astana qalasınıñ 20 jıldığına oray «Än men küy äldileydi Astananı» attı Türkistan oblısınıñ Astanadağı mädeni künderi ayasında wyımdastırılıp otır dep habarlaydı Oblıs äkiminiñ baspasöz qızmeti.

Twran eli önerpazdarınıñ önerin tamaşalauğa  QR Parlamenti mäjilisiniñ deputattarı men ziyalı qauım ökilderi jäne respublikalıq bwqaralıq aqparat qwraldarı qatıstı.

Türkistan oblısınıñ  halqın elimizdiñ elordası – Astana qalasınıñ 20 jıldıq mereytoyın sezindiru maqsatında «El jüregi - Astana» taqırıbında körmelik keşenniñ aşıluımen bastalıp, bügingi tañğa deyin 760 is-şara ötkizilgen bolatın.

Elorda qwrmetine oray oblıstıñ eldi mekenderinde  26 köşege «Astana» atauı berildi.  «Elordağa sıylıq» jobası boyınşa Türkistan oblısı tarapınan Astana qalasına tartu retinde Esil özeni boyında ortalıq sayabaq pen Ministrlikter üyi aralığına deyin 5,173 şaqırım velojol salınuda.

Koncert «Şarıqtay ber, Astana» teatrlandırılğan-horeografiyalıq kompoziciyasınan bastau alıp, dästürli änder şerui, qazaq jäne klassikalıq, Ş.Qaldayaqov  änderinen popurri, «Dala ruhı» kompoziciyasımen jalğasın taptı.

Koncertke oblıstan şıqqan estrada jwldızı, QR eñbek siñirgen qayratkeri Altınay Jorabaeva jäne QR Halıq ärtisi Nwrjamal Üsenbaeva, QR Mädeniet qayratkerleri Ürälhan Seyilbekova, Marat Orazmetov pen QR eñbek siñirgen ärtisi Säbiraş Äbdirayımova jäne Halıqaralıq bayqaulardıñ laureattarı Karina Najmeddinova,  Möldir Isaeva, Jadıra Abdullaeva, Nwrqanat Tapiev, Ayan Tölegen, Nematillo Zkrullaev, Bekzat Twrğınbek, Aqmaral Binazarova sındı sahna sañlaqtarımen qatar «Twmar» fol'klorlıq ansambli jäne «Qazına», «Şamsinur», «Farab» bi toptarı qatıstı.

“The Qazaq Times”