Eki Koreya basşıları ekinşi ret jüzdesti. Foto: VOA NEWS.

Jwma küni Oñtüstik Koreya men Soltüstik Koreya liderleri ekinşi ret kezdesu ötkizgen bolatın. Oñtüstik Koreyanıñ aqparat qwraldarınıñ habarına qarağanda,  eki el basşısı jwma küni tüsten keyin (15 sağat 17 minut şamasında bastalğan) şekaradağı Panmınjom beketiniñ Soltüstik Koreya jağında bolğan.

Oñtüstik Koreya prezidentiniñ baspasöz qızmeti jäne kelissözge jauaptı lauazımdılardıñ jasağan mälimdemesinde, Mün Jayn men Kim Joñ Un «Panmınjom deklaraciyasınıñ» naqtı orındalu jäne Soltüstik Koreya men AQŞ arasındağı diplomatiyanı ilgeriletu turalı pikir almasqan.

Jeksenbi küni Oñtüstik Koreya prezidenti Mün Jayn (Moon Jae-in) kezdesudiñ nätijesi turalı bayandamasın jasadı. Ol bayandamasında AQŞ pen Soltüstik Koreya arasındağı kelissözdiñ qalpına keltirilui mümkin ekenin ayttı. Mün Jayn sözinde: «Meniñ bastı aytqım keletini, kez kelgen tüsinbestikti joyu üşin, eki tarap (AQŞ-Soltüstik Koreya) tikeley baylanısqa şığuı kerek. Aytalıq, jwmıs tobınıñ deñgeyinde kelissözder jürgizu jäne kün tärtibindegi özekti mäseleler boyınşa aldın ala talqılau qajet», – dedi.

Eki Koreya basşılarınıñ kezdesuine twspa-tws uaqıtta, The New York Times basılımı AQŞ prezidentiniñ mälimdemesin tarattı. Prezident Tramp öziniñ Wlttıq qauipsizdik jönindegi keñesşisi Jon Bolton men memlekettik hatşı Pompeo arasındağı pikir qayşılığın qamtığan birqatar mäselege tüsinik jasadı. Ol sözinde: «Aq üy äkimşiliginde Soltüstik Koreyağa bağıttalğan şaralarda pikir qayşılığı joq»,–  dedi.

Sonımen birge, Aq üydiñ baspasöz mälimdemeşisi jurnalisterge bergen jauabında, AQŞ pen Soltüstik Koreya basşılarınıñ kelissözi äli de ıqtimal küyde twr. Aq üydiñ avanstıq tobı osı üşin de Singapurğa baradı», – degen.

Oñtüstik Koreyanıñ lauazımdılarınıñ qarauınşa, AQŞ pen Soltüstik Koreya arasındağı kezdesudiñ mümkindigi tolıqtay joğalğan joq. Eki el arasında jaña bağıtta kelissöz üşin talpınıstar jalğasuda.

“The Qazaq Times”