ەكى كورەيا باسشىلارىنىڭ قايتالاي كەزدەسۋى اقش-سولتۇستىك كورەيا كەلىسسوزىنە جول اشتى

جۇما كۇنى وڭتۇستىك كورەيا مەن سولتۇستىك كورەيا ليدەرلەرى ەكىنشى رەت كەزدەسۋ وتكىزگەن بولاتىن. وڭتۇستىك كورەيانىڭ اقپارات قۇرالدارىنىڭ حابارىنا قاراعاندا،  ەكى ەل باسشىسى جۇما كۇنى تۇستەن كەيىن (15 ساعات 17 مينۋت شاماسىندا باستالعان) شەكاراداعى پانمىنجوم بەكەتىنىڭ سولتۇستىك كورەيا جاعىندا بولعان.

وڭتۇستىك كورەيا پرەزيدەنتىنىڭ ءباسپاسوز قىزمەتى جانە كەلىسسوزگە جاۋاپتى لاۋازىمدىلاردىڭ جاساعان مالىمدەمەسىندە، ءمۇن جاين مەن كيم جوڭ ۋن «پانمىنجوم دەكلاراتسياسىنىڭ» ناقتى ورىندالۋ جانە سولتۇستىك كورەيا مەن اقش اراسىنداعى ديپلوماتيانى ىلگەرىلەتۋ تۋرالى پىكىر الماسقان.

جەكسەنبى كۇنى وڭتۇستىك كورەيا پرەزيدەنتى ءمۇن جاين (Moon Jae-in) كەزدەسۋدىڭ ناتيجەسى تۋرالى بايانداماسىن جاسادى. ول بايانداماسىندا اقش پەن سولتۇستىك كورەيا اراسىنداعى كەلىسسوزدىڭ قالپىنا كەلتىرىلۋى مۇمكىن ەكەنىن ايتتى. ءمۇن جاين سوزىندە: «مەنىڭ باستى ايتقىم كەلەتىنى، كەز كەلگەن تۇسىنبەستىكتى جويۋ ءۇشىن، ەكى تاراپ (اقش-سولتۇستىك كورەيا) تىكەلەي بايلانىسقا شىعۋى كەرەك. ايتالىق، جۇمىس توبىنىڭ دەڭگەيىندە كەلىسسوزدەر جۇرگىزۋ جانە كۇن تارتىبىندەگى وزەكتى ماسەلەلەر بويىنشا الدىن الا تالقىلاۋ قاجەت»، – دەدى.

ەكى كورەيا باسشىلارىنىڭ كەزدەسۋىنە تۇسپا-تۇس ۋاقىتتا، The New York Times باسىلىمى اقش پرەزيدەنتىنىڭ مالىمدەمەسىن تاراتتى. پرەزيدەنت ترامپ ءوزىنىڭ ۇلتتىق قاۋىپسىزدىك جونىندەگى كەڭەسشىسى جون بولتون مەن مەملەكەتتىك حاتشى پومپەو اراسىنداعى پىكىر قايشىلىعىن قامتىعان بىرقاتار ماسەلەگە تۇسىنىك جاسادى. ول سوزىندە: «اق ءۇي اكىمشىلىگىندە سولتۇستىك كورەياعا باعىتتالعان شارالاردا پىكىر قايشىلىعى جوق»،–  دەدى.

سونىمەن بىرگە، اق ءۇيدىڭ ءباسپاسوز مالىمدەمەشىسى جۋرناليستەرگە بەرگەن جاۋابىندا، اقش پەن سولتۇستىك كورەيا باسشىلارىنىڭ كەلىسسوزى ءالى دە ىقتيمال كۇيدە تۇر. اق ءۇيدىڭ اۆانستىق توبى وسى ءۇشىن دە سينگاپۋرعا بارادى»، – دەگەن.

وڭتۇستىك كورەيانىڭ لاۋازىمدىلارىنىڭ قاراۋىنشا، اقش پەن سولتۇستىك كورەيا اراسىنداعى كەزدەسۋدىڭ مۇمكىندىگى تولىقتاي جوعالعان جوق. ەكى ەل اراسىندا جاڭا باعىتتا كەلىسسوز ءۇشىن تالپىنىستار جالعاسۋدا.

“The Qazaq Times”