Foto: 20minutes.fr

BWW-na qarastı Halıqaralıq Rahımşılıq Wyımı (Amnesty International) Myan'marda äreket etuşi «Rohindjanı qwtqaruşı Arakan äskeriniñ» (ARSA) qarulı tobınıñ 2017 jıldıñ tamız ayında wyımdastırğan qaqtığıs kezinde 100-ge juıq ündi azamatın öltirgenin mälimdedi. Bwl turalı halıqaralıq «20minutes.fr» aqparat agenttigi habarlaydı.

Rahımşılıq wyımı, Bangladeştegi bosqındar men Arakan ştatındağı twrğındarmen äñgimelesu barısında qolda etken mälimetterden jinaqtalğan bayandama wsındı. Bayandamada «Rohindjanı qwtqaruşı Arakan äskeriniñ» 2017 jılı wyımdastırğan qaqtığıs kezinde beybit twrğındarğa da şabuıl jasağanı anıqtaldı dep habarlandı.

Ayta ketu kerek, ötken jılı atalğan top bwdan bwrın da jasağan qaqtığıs äreketterin qaytalap, 20-dan astam policey bölimşesine şabuıl jasağan edi. Sol şabuıl äreketteriniñ artınşa orın alğan Myan'mar äskeri tarapınan jasalğan operaciyalarda arakandıq jüzdegen mwsılman qaza tauıp, şamamen 700 mıñ adam Bangladeşke bas sauğalağan edi. Halıqaralıq rahımşılıq wyımı öz mälimdemesi arqılı «Osı ayuani ärekette «Rohindjanı qwtqaruşı Arakan äskeri» qarulı tobınıñ müşeleri 20 er adam, 10 äyel jäne 23 balanı öltirdi dep ayıptap otır. Äri qoldarında osı ayıptauların däleldeytin  qwjattar da bar ekenin alğa tartuda. Wyımnıñ mälimetinde, qarulı toptıñ däl osı küni körşi eldimekende de şabuıl wyımdastırıp, barlığı 99 adamnıñ ölimine sebep bolğanı aytıldı.

Negizinde, Myan'mar mwsılmandarına qatıstı daulı mäseleniñ bas kötergeni bir bwl emes. Bwdan bwrın da, mwsılmandardıñ jappay quğın-sürginge wşırap nemese jazıqsız qısastıq körip jatqandarın jazğan edik. Halıqaralıq rahımşılıq wyımı öziniñ osı mälimdemesin jasay otırıp, endigi jerde bwl mäselege qatıstı naqtı qorıtındı şığaruğa tırısatındarın da habarladı.

Al, özderiniñ qwrılu maqsatın «Arakandıqtardı memlekettiñ zwlımdıq äreketterinen qorğau jäne qwtqaru» retinde tanıstırğan «Rohindjanı qwtqaruşı Arakan äskeri» qarulı tobı Halıqaralıq rahımşılıq wyımınıñ bwl mälimdemesin joqqa şığaruda.

“The Qazaq Times”