فوتو: 20minutes.fr

بۇۇ-نا قاراستى حالىقارالىق راحىمشىلىق ۇيىمى (Amnesty International) ميانماردا ارەكەت ەتۋشى «روحيندجانى قۇتقارۋشى اراكان اسكەرىنىڭ» (ARSA) قارۋلى توبىنىڭ 2017 جىلدىڭ تامىز ايىندا ۇيىمداستىرعان قاقتىعىس كەزىندە 100-گە جۋىق ءۇندى ازاماتىن ولتىرگەنىن مالىمدەدى. بۇل تۋرالى حالىقارالىق «20minutes.fr» اقپارات اگەنتتىگى حابارلايدى.

راحىمشىلىق ۇيىمى، بانگلادەشتەگى بوسقىندار مەن اراكان شتاتىنداعى تۇرعىندارمەن اڭگىمەلەسۋ بارىسىندا قولدا ەتكەن مالىمەتتەردەن جيناقتالعان بايانداما ۇسىندى. باياندامادا «روحيندجانى قۇتقارۋشى اراكان اسكەرىنىڭ» 2017 جىلى ۇيىمداستىرعان قاقتىعىس كەزىندە بەيبىت تۇرعىندارعا دا شابۋىل جاساعانى انىقتالدى دەپ حابارلاندى.

ايتا كەتۋ كەرەك، وتكەن جىلى اتالعان توپ بۇدان بۇرىن دا جاساعان قاقتىعىس ارەكەتتەرىن قايتالاپ، 20-دان استام پوليتسەي بولىمشەسىنە شابۋىل جاساعان ەدى. سول شابۋىل ارەكەتتەرىنىڭ ارتىنشا ورىن العان ميانمار اسكەرى تاراپىنان جاسالعان وپەراتسيالاردا اراكاندىق جۇزدەگەن مۇسىلمان قازا تاۋىپ، شامامەن 700 مىڭ ادام بانگلادەشكە باس ساۋعالاعان ەدى. حالىقارالىق راحىمشىلىق ۇيىمى ءوز مالىمدەمەسى ارقىلى «وسى ايۋاني ارەكەتتە «روحيندجانى قۇتقارۋشى اراكان اسكەرى» قارۋلى توبىنىڭ مۇشەلەرى 20 ەر ادام، 10 ايەل جانە 23 بالانى ءولتىردى دەپ ايىپتاپ وتىر. ءارى قولدارىندا وسى ايىپتاۋلارىن دالەلدەيتىن  قۇجاتتار دا بار ەكەنىن العا تارتۋدا. ۇيىمنىڭ مالىمەتىندە، قارۋلى توپتىڭ ءدال وسى كۇنى كورشى ەلدىمەكەندە دە شابۋىل ۇيىمداستىرىپ، بارلىعى 99 ادامنىڭ ولىمىنە سەبەپ بولعانى ايتىلدى.

نەگىزىندە، ميانمار مۇسىلماندارىنا قاتىستى داۋلى ماسەلەنىڭ باس كوتەرگەنى ءبىر بۇل ەمەس. بۇدان بۇرىن دا، مۇسىلمانداردىڭ جاپپاي قۋعىن-سۇرگىنگە ۇشىراپ نەمەسە جازىقسىز قىساستىق كورىپ جاتقاندارىن جازعان ەدىك. حالىقارالىق راحىمشىلىق ۇيىمى ءوزىنىڭ وسى مالىمدەمەسىن جاساي وتىرىپ، ەندىگى جەردە بۇل ماسەلەگە قاتىستى ناقتى قورىتىندى شىعارۋعا تىرىساتىندارىن دا حابارلادى.

ال، وزدەرىنىڭ قۇرىلۋ ماقساتىن «اراكاندىقتاردى مەملەكەتتىڭ زۇلىمدىق ارەكەتتەرىنەن قورعاۋ جانە قۇتقارۋ» رەتىندە تانىستىرعان «روحيندجانى قۇتقارۋشى اراكان اسكەرى» قارۋلى توبى حالىقارالىق راحىمشىلىق ۇيىمىنىڭ بۇل مالىمدەمەسىن جوققا شىعارۋدا.

“The Qazaq Times”