V'etnamda narazılıq şaraları ötude. Foto: voa.

Aqparat közderiniñ mälimdeuinşe, Qıtay ükimeti köpten beri daulı teñiz aumağındağı tabiği gaz ben mwnay, tağı basqa resurstardı paydalanuğa şekteu qoyıp, V'etnam ekonomikasına qısım tüsirip kelgen. Tabiği gaz ben mwnayğa qajettilik V'etnam ekonomikalıq ösimine tikeley äser etedi. Qıtay tarabınıñ qısımı bwl eldiñ ekonomikalıq damuına ülken kedergi jasağan. V'etnamda Qıtay qısımına qarsı narazılıq akciyaları jiiley tüsti. Bwl turalı «Voice of America» aqparattıq agenttigi habarladı.

Ötken ayda Ispaniyanıñ Wlttıq mwnay kompaniyası V'etnam äldeqaşan maqwldağan Oñtüstik Qıtay teñizindegi mwnay bwrğılau jobasınan şeginip şıqtı. Halıqaralıq BAQ pen sayasi mäseleler jönindegi sarapşılar bwnıñ sebebi Qıtaydıñ aymaqta jasap otırğan qısımınan dep qaraydı.

V'etnam tarabı qazir atalğan teñizdiñ Ortalıq jağalau öñirinde ExxonMobil Oil kompaniyasımen tabiği gazdı barlau boyınşa qwnı 4,6 mlrd AQŞ dolları kölemindegi joba jasasıp otır.

Qıtay men V'etnam arasında teñizdegi ielik qwqıq dauı ötken ğasırdıñ 70 jıldarınan beri jalğasuda. Qıtay özinde saqtalğan tarihi jazba derekterdi alğa tarta otırıp, Oñtüstik Qıtay teñiziniñ barlıq ielik qwqığı özine tän dep qaraydı. Al, Hanoy biligi V'etnamnıñ atalğan teñizben şektesken şığıs jağalauı özine tän dep esepteydi. Eki el arasında 1974 jılı jäne 1988 jılı teñizdegi ielik qwqıq mäselesi qaqtığısqa wlasqan bolatın. Qıtay biliginiñ 2014 jılğı jariyalağan Oñtüstik Qıtay teñizi ielik qwqıq mäselesi boyınşa jariyalağan şeşimi, aymaqtağı şielenisti uşıqtırıp jibergen.

“The Qazaq Times”