Memleket basşısı saltanattı is-şarağa qatısuşılardı Almatıdağı ğalamat sport merekesiniñ bastaluımen qwttıqtadı. Bwl turalı Aqordanıñ resmi saytı habarladı. 

– Bwl stadionda jer şarındağı jetekşi joğarı oqu orındarınıñ jüzdegen ökilderi jinalıp otır. Sizderdiñ aralarıñızda bolaşaq olimpiadaşılar men älemdik sayıstardıñ jeñimpazdarı bar. Sonday-aq, öziniñ mansabın keleşekte ekonomikamen, sayasatpen, biznespen baylanıstıratındar da joq emes, – dedi Qazaqstan Prezidenti.

Almatı arenadağı aşılu saltanatınan körinis.

Nwrswltan Nazarbaev täuelsizdiktiñ alğaşqı künderinen bastap elimizdiñ wstanımı birlik pen ıntımaqtastıq ornatu, qauipsiz bolaşaqqa wmtılıs bolğanın atap ötti.

Almatı arenadağı aşılu saltanatınan körinis.

– Sport, ğılım jäne mädeniet arqılı biz barlıq qwrlıqqa tınıştıq pen toleranttı damudıñ qazaqstandıq formulasın jetkizgimiz keledi. Sol üşin wyımdastıru jwmıstarı kün sayın qarqın alıp, osı Mwz sarayı men bwl oyındardıñ basqa da nısandarı zor ıqılaspen salındı, – dedi Memleket basşısı.

Sonday-aq, Qazaqstan Prezidenti Universiada qalanıñ sport infraqwrılımın damıtudıñ özindik lokomotivine aynalğanın atap ötti.

– Almatı qazirdiñ özinde dausız rekordtar körsetip otır. Qısqı Universiadalar tarihında alğaş ret mwnda Atletter qalaşığı salındı. Bwl jobağa jwmsalğan investiciya qazaqstandıqtardıñ igiligine qızmet etetin boladı. Arenalar köpşilikti bwqaralıq sportqa tartatın ortalıqqa aynaladı. Atletter qalaşığı 1700-den astam otbasığa arnalğan qoljetimdi äleumettik twrğın üyi bar jaña şağın audandı qwraydı. Universiada älemniñ 80 memleketinde 43 telearna arqılı körsetiledi. Onıñ auditoriyası bir milliardtan astam adamdı qamtidı. Universiadanıñ qanatın keñge jayğanın, öziniñ bastaluınıñ tarihi sätine dayın ekenin körip otırmız, – dedi Nwrswltan Nazarbaev.

Sonday-aq, Memleket basşısı Universiada ötip jatqan orınnıñ biregeyligine nazar audardı.

– Almatı – 1000 jıldıq tarihı bar qala, Qazaqstannıñ jaña däuiri bastau alğan altın besik. Bwl – qarqındı damıp kele jatqan, zamanaui qala, iskerlik ortalığı jäne el ekonomikasınıñ qozğauşı küşi. Jastar qalası. Studentter qalası. Qazaqstannıñ joğarı oqu orındarınıñ üşten biri osında ornalasqan, olarda 137 mıñ student bilim aluda. Atı añızğa aynalğan jäne bärimiz jaqsı köretin «Medeu» mwz aydını bwrınğı dañqın qayta jañğırtıp, qaytadan auqımdı jarıstardıñ atmosferasın sezindiretin boladı. İle Alatauı bökterinde «Şımbwlaq» almastay jarqırap twradı. Universiada salamattı ömir saltınıñ rämizine aynaladı. Onıñ nätijesin wltımızdıñ densaulığın nığaytu jönindegi memlekettik bağdarlamalarmen salıstıruğa boladı, – dedi Qazaqstan Prezidenti.

Almatı arenadağı aşılu saltanatınan körinis.

Nwrswltan Nazarbaev jarıstı wyımdastıruğa qoldau körsetkeni üşin osı jahandıq merekeni äzirleuge atsalısqandardıñ bärine, sonıñ işinde üş mıñ volonterge, Halıqaralıq studenttik sport federaciyasına jäne onıñ prezidenti O.Matıcinge alğıs bildirdi.

Fotolar: akorda.kz

“The Qazaq Times”