Päkistandağı Qıtay ökilderi. Foto: Reuters.

Islamabad aqparat közderiniñ habarına qarağanda, Qıtay Päkistannıñ Belujistan provinciyasındağı neşe ondağan milliard qwnğa ie infraqwrılımdıq jobalardı alu üşin aymaqtağı separatistik küştermen baylanıs ornatqan. Alayda bwl aytılğandardı  Qıtaydıñ resmi ökilderi teriske şığardı. Bwl turalı VOA aqparattıq saytı jazdı.

Financial Times basılımınıñ osı aptadağı habarına qarağanda, Beyjiñ tarabı separatistik küştermen tikeley baylanıs ornatqan jäne eki taraptıñ qarım-qatınas jasap kele jatqanına 5 jıldan asqan. Degenmen, basılımnıñ tilşisine jauap bergen Qıtaydıñ osı aymaqqa jauaptı resmi ökili öz sözinde: «Mwnday aqparattı mülde estigen emespin», – degen. Alayda, basılım bwl resmi twlğanıñ atın atap körsetpegen.

Belujistannıñ resmi ökilderi de bwl sözderdi joqqa şığardı. Dese de, separatisterdiñ özge basşıları bwl turalı pikir bildiruden bas tarttı.

Qıtay-Päkistan ekonomikalıq dälizi «Bir beldeu, bir jol» jobasınıñ ülken bir böligi. Bwl jobanıñ maqsatı Qıtaydıñ batısındağı Şınjañ arqılı Päkistandı twtastırıp, Ündi mwhitınan aynalıp ötetin halıqaralıq tasımal joldarınıñ şığını men uaqıtın azaytu. Däliz Şınjañnan Päkistannıñ Belujistan provinciyasına kirip, Arab teñizi jağalauındağı Guadar portına deyin jalğasadı.

Päkistannıñ ükimettik sayttarınıñ birinde: «Qıtay-Päkistan ekonomikalıq dälizi öñirlik baylanıs jelisiniñ jobası retinde de belgili. Bwl Päkistan ğana emes, Iran, Ündistan, Auğanstan jäne Ortalıq Aziya elderine de ıqpal etedi» dep jazğan.

Qıtay Päkistan Ekonomikalıq dälizi. Foto: Diplomacy Pakistan.

Degenmen, sarapşılardıñ pikirinşe, däliz Päkistannıñ soltüstik şığısınan kirip, eldiñ batısındağı Arab teñizine jetkenşe  köptegen provinciyalardı basıp ötedi. Sonıñ biri köp jıldan beri avtonomiya talap etip kele jatqan separatistik küşterdiñ baqılauındağı Belujistan provinciyası da bar. Bwl aymaqtağı separatister Päkistan biligimen köp jıldardan beri resurstardı bölisip kele jatqanı tağı bar. Olar Qıtay-Päkistan ekonomikalıq dälizine kümänmen qaraydı. Äri, bwl Päkistan biliginiñ provinciyadağı resurstardı jeke iemdenu üşin jasağanı dep qauiptenedi. Al, Päkistan biligi QPED-nıñ jergilikti bwqaralarğa da igilik alıp keletinin aytadı.

Endi AQŞ-tıñ Päkistanğa qaratqan közqarasına keler bolsaq, Uaşingtonnıñ Päkistanğa degen terrorizmge qarsı küresi aytarlıqtay deñgeyde emes deytin renişi bar. Tipti, jerindegi terrorlıq toptardı Auğanstan men Ündistanğa qarsı qoyıp, arandatu äreketine baradı dep kelgen. Oğan qosa Päkistanğa bölinetin barlıq kömekti toqtatqan. Degenmen, terrorizmge qarsı küresine demeu beru üşin, ötken ayda ğana  2 mlrd AQŞ dolları köleminde kömegin beretinin bildirgen.

“The Qazaq Times”