Päkistan SİM basşısı qıtaylıq jwmısşılarğa jankeşti şabuıl jasağanın rastadı

Şildede Päkistandağı su bögeti qwrılısında jwmıs istep jatqan qıtaylıq 9 jwmısşı avtobus jarılısınan qaza tapqan bolatın. Qıtay tarabı Päkistandı oqiğanıñ män-jayın tolıq anıqtauğa şaqırğan. Keşe, 12 tamız Päkistan sırtqı ister ministri Şah Mehmud Kureşi jarılıstı maqsattı jankeşti şabuılı dep mälimdedi.

Päkistan SİM jetekşisi Kureşi Reuters agenttigine jarılısqa qatıstı mälimetter bergen. Ol mälimetinde tergeu nätijelerine säykes şabuılda Ündistan Ükimet kabineti hatşılığınıñ Zertteu jäne taldau bölimi (RAW) men Auğanstan Wlttıq qauipsizdik agenttiginiñ izderi bar dep körsetken. Bwnda atap otırğan Ündistan Ükimet kabineti hatşılığınıñ Zertteu jäne taldau bölimi Ündistannıñ sırtqı barlau agenttigi sanaladı.

Degenmen, Reuters-tiñ bwl turalı habarında Kureşidiñ Ündistan men Auğanstan arnayı qızmetine qatıstı naqtı derekterdi körsetpegenin aytadı. Soğan qosa Ündistan men Auğanstannıñ bwl mälimdemege qatıstı reakciyası turalı da mälimet berilmegen.

Päkistandağı avtobus jarılısı 14 şildede bolğan edi. Onda Kohistandağı su bögeti qwrılısında jwmıs istep jatqan qıtaylıq injenerler otırğan avtobusta jarılıs bolıp jalpı 13 adamnıñ ölimine sebep bolğan, qaza bolğandardıñ 9-ı Qıtay azamatı.

Päkistan policiyası aldımen jarılıstı avtobustıñ tehnikalıq aqaularınan boluı mümkin degen. Alayda, keyin oqiğa ornınan jarılğış zattardıñ qaldıqtarın tapqan bolatın. Päkistan jağı sol kezde de jarılıstıñ terakt bolu mümkindigin de joqqa şığarmağan edi.

Al, Qıtay jağı bwl oqiğanı birden «terakt» dep bağaladı, äri Päkistan ükimetin kinälilerdi jauapqa tartuğa şaqırdı. Tipti, jarılıstan 3 kün ötkennen keyin 15 adamnan twratın zertteu tobın Päkistandağı jarılıs bolğan jerge jibergen.

Ayta ketu kerek, Kohistandağı gidroelektr stanciyası Qıtay men Päkistan arasındağı ekonomikalıq däliz jobasınıñ bir böligi sanaladı. Al, jalpı qwnı 65 mlrd AQŞ dolları twratın Qıtay-Päkistan ekonomikalıq dälizi qazirgi Qıtay basşısı alğa tartqan «Bir beldeu, bir jol» strategiyalıq jobasınıñ mañızdı tarmağı. Bwl ekonomikalıq däliz Qıtaydıñ strategiyalıq damu josparında asa mañızğa ie. Eger AQŞ pen onıñ Ündi jäne Tınıq mwhittağı odaqtas, serikteri Qıtaydı osı teñiz joldarınan şekteytin bolsa, Beyjiñ Şıñjañ şekarasınan birden Parsı şığanağına jaqın teñizge şığıp ketudiñ asa qajetti dälizin Päkistan arqılı jüzege asıra aladı.

Sondıqtan da, Qıtay men onıñ mañızdı strategiyalıq odaqtası sanalatın Päkistan üşin birlesken jobalardıñ qauipsizdigi men aqausızdığı asa joğarı mänge ie. Al, 14 şildedegi jarılıs Päkistandağı Qıtaymen birlesken jobalarğa nemese Qıtay azamattarına jasalğan alğaşqı şabuıl emes. Bwğan deyin de Belujistan, Karaçi jerlerinde de osığan wqsas şabuıldar bolğan.

Alayda, Päkistan SİM jetekşisiniñ mälimdemesine qaramastan, Auğanstan men Ündistan tarabı şabuılğa qatıstı mälimdeme jasamadı. Eşbir terrorlıq wyım da şabuıldı öz moynına alğan joq.

The Qazaq Times