Auğanstan men Päkistannıñ dostığı Qıtayğa nege kerek boldı?

Seysenbi küni Qıtaydıñ SİM basşısı Uañ Iy mälimdeme jasap, Qıtay men Päkistan qwnı 57 mlrd AQŞ dolları twratın «Qıtay-Päkistan ekonomikalıq dälizin» (QPED) Auğanstanğa qaray keñeyte tüsetinderin ayttı. Bwl turalı BBC-diñ qıtay tilindegi qızmeti habarlağan edi.

Qazir Qıtay jaq Päkistan men Auğanstan arasındağı beybitşilik kelissözderin jüzege asıruğa qoldau tanıtıp otır. Sebebi, 1947 jılı Päkistan egemendik jariyalağannan beri Auğanstanmen arasında şielenis üzbey jalğasıp keledi. Auğanstan jaq Päkistandı Taliban lañkesterine qoldau berip otır dep ayıptaydı. Al, Islamabad biligi bwnı joqqa şığarıp, Kabulmen beybit qarım-qatınastı qalaytının, Auğanstannıñ beybit äri ornıqtılığın ümit etetinin jetkizgen.

Qıtay sırtqı ister ministri Uañ Iy Qıtay, Auğanstan jäne Päkistan üş eldiñ SİM basşılarınıñ otırısı kezinde: «Qıtay jaq Päkistannıñ damuğa mümkindik beretin artıqşılıqtarına qoldau körsetuge dayın. Aymaqtağı elderge QPED-tiñ oñdı äserlerin tolıq körsetip, «Bir beldeu, bir jol» arqılı körşiles elderdiñ ıntımaqtastığın nığayta tüskimiz keledi», – degen. Reuters agenttiginiñ habarında, Qıtaydıñ «Bir beldeu, bir jol» bağdarlaması arqılı Aziya men Europanıñ basqa elderimen baylanısın arttıra tüskisi keledi degen közqaras aytılğan.

Qalay bolsa da Qıtay ükimeti üşin Auğanstannıñ ornıqtılığı men tınıştığı, Islamabad pen Kabul biliginiñ tatulığın öz müddesi üşin bolsa da qalaydı. Sebebi, Qıtay biligi jüzege asırğalı otırğan «Bir beldeu, bir jol» bağdarlaması, QPED qatarlı el ekonomikasınıñ küre tamırları bwl aymaqtan ötip jatır. Oğan qosa, Qıtaydıñ Aziyadağı eñ ülken bäsekelesi Ündistan üşin Päkistan men Auğanstandı qasına tartu Qıtaydıñ köpten bergi strategiyası deuge de boladı.

“The Qazaq Times”