Avtokölik brendteri. Foto: Reviews XP.

Älemniñ aldınğı qatarlı avtokölik öndiruşileri ötken bir jıldıñ qorıtındısın şığaruda. Bir jıl bwrınğı qorıtındı da japonnıñ Toyota-sı nemistiñ Volkswagen-in artta qaldırıp ketip edi, qazir ne boldı? Biılğı giganttar reytinginde kim köş bastadı? Biriktirilgen Renault-Nissan-Mitsubishi köşbastay aldı ma? Osığan deyin  giganttar lideri amerikalıq General Motors öz ornın saqtay aldı ma, joq pa? Bwl swraqtardıñ jauabın BBC-diñ onlayn qızmeti izdep kördi.

Atalğan saladağı «jiligin şağıp, mayın işken», bilikti maman-sarapşılarınıñ köbi köşbasşılıq basımdılıqtı biriktirilgen Renault-Nissan-Mitsubishi tobına berip otır. Francuz ben japon kompaniyalarınıñ birlestigin 2017 jılı Renault-Nissan-Mitsubishi dep özgertken edi. Bwl birikken öndiruşiler avtoköliktiñ birqatar brendteriniñ iesi. Onıñ işinde Dacia, Datsun, Infiniti jäne Renault Samsung Motors qatarlıları da bar. Olardıñ bergen mälimetinde 2017 jılı 10,61 mln avtokölik jäne jük kölikterin jasap şığarğan.

Reytingti qorıtındılau sarapşılarğa oñay bolmadı. Sebebi, reytingti qay twrğıdan jasau turalı talas köp. Aytalıq, Volkswagen bıltır bir jılda 10,74 mln dana avtokölik satqan, onıñ işinde auır jük kölikteri de bar. Al amerikalıq General Motors bolsa öz esebinde sporttıq kölikterdi de jük kölikteri qatarlı eseptegen. Singapur, Malayziya, Tayland elderinde Toyota Hilux te jük köligi qatarına jatqızıladı.

Degenmen ekspertterdiñ köbi bwl jolı basım dauıstı Renault-Nissan-Mitsubishi birlestigine berip otır.

Halıqaralıq avtokölik öndiruşiler wyımı (OICA) da öz statistikalıq mälimetin wsınıp otır. Bwl wyım avtokölikterdiñ barlıq türlerinen statistikalıq mälimet jinaydı.

“The Qazaq Times ”