اۆتوكولىك برەندتەرى. فوتو: Reviews XP.

الەمنىڭ الدىنعى قاتارلى اۆتوكولىك وندىرۋشىلەرى وتكەن ءبىر جىلدىڭ قورىتىندىسىن شىعارۋدا. ءبىر جىل بۇرىنعى قورىتىندى دا جاپوننىڭ Toyota-سى نەمىستىڭ Volkswagen-ءىن ارتتا قالدىرىپ كەتىپ ەدى، قازىر نە بولدى؟ بيىلعى گيگانتتار رەيتينگىندە كىم كوش باستادى؟ بىرىكتىرىلگەن Renault-Nissan-Mitsubishi كوشباستاي الدى ما؟ وسىعان دەيىن  گيگانتتار ليدەرى امەريكالىق General Motors ءوز ورنىن ساقتاي الدى ما، جوق پا؟ بۇل سۇراقتاردىڭ جاۋابىن BBC-ءدىڭ ونلاين قىزمەتى ىزدەپ كوردى.

اتالعان سالاداعى «جىلىگىن شاعىپ، مايىن ىشكەن»، بىلىكتى مامان-ساراپشىلارىنىڭ كوبى كوشباسشىلىق باسىمدىلىقتى بىرىكتىرىلگەن Renault-Nissan-Mitsubishi توبىنا بەرىپ وتىر. فرانتسۋز بەن جاپون كومپانيالارىنىڭ بىرلەستىگىن 2017 جىلى Renault-Nissan-Mitsubishi دەپ وزگەرتكەن ەدى. بۇل بىرىككەن وندىرۋشىلەر اۆتوكولىكتىڭ بىرقاتار برەندتەرىنىڭ يەسى. ونىڭ ىشىندە Dacia, Datsun, Infiniti جانە Renault Samsung Motors قاتارلىلارى دا بار. ولاردىڭ بەرگەن مالىمەتىندە 2017 جىلى 10,61 ملن اۆتوكولىك جانە جۇك كولىكتەرىن جاساپ شىعارعان.

رەيتينگتى قورىتىندىلاۋ ساراپشىلارعا وڭاي بولمادى. سەبەبى، رەيتينگتى قاي تۇرعىدان جاساۋ تۋرالى تالاس كوپ. ايتالىق، Volkswagen بىلتىر ءبىر جىلدا 10,74 ملن دانا اۆتوكولىك ساتقان، ونىڭ ىشىندە اۋىر جۇك كولىكتەرى دە بار. ال امەريكالىق General Motors بولسا ءوز ەسەبىندە سپورتتىق كولىكتەردى دە جۇك كولىكتەرى قاتارلى ەسەپتەگەن. سينگاپۋر، مالايزيا، تايلاند ەلدەرىندە Toyota Hilux تە جۇك كولىگى قاتارىنا جاتقىزىلادى.

دەگەنمەن ەكسپەرتتەردىڭ كوبى بۇل جولى باسىم داۋىستى Renault-Nissan-Mitsubishi بىرلەستىگىنە بەرىپ وتىر.

حالىقارالىق اۆتوكولىك وندىرۋشىلەر ۇيىمى (OICA) دا ءوز ستاتيستيكالىق مالىمەتىن ۇسىنىپ وتىر. بۇل ۇيىم اۆتوكولىكتەردىڭ بارلىق تۇرلەرىنەن ستاتيستيكالىق مالىمەت جينايدى.

“The Qazaq Times ”