Foto: inform.kz

Bügin QR Prezidenti Qazaqstan halqına arnalğan "Törtinşi önerkäsiptik revolyuciya jağdayındağı damudıñ jaña mümkindikteri" attı kezekti joldauın jariyaladı. Joldauda ädettegidey Qazaqstan ekonomikası, qarjı sektorın "qayta jañğırtu", äleumettik jağdaydı retteu, bilim, densaulıq salası, jemqorlıq mäseleleri tağı bir märte aytılıp, jauaptılarğa tapsırmalar berildi. Biılğı joldauda bizdiñ közimizge erekşe tüskeni Prezidenttiñ jemqorlıqqa qatıstı keltirgen statistikası  boldı. YAğni soñğı üş jıl işinde Qazaqstanda  jemqorlıq üşin 2,5 mıñnan astam adam sottalğan eken. Al bwl az ba, köp pe? Prezidenttiñ 2011 jıldan bergi joldaularında aytılğan jemqorlıqqa qatıstı  derekterine şolu jasap kördik.

QR Prezidentiniñ 2011 jıldıñ 28 qañtarındağı "Bolaşaqtıñ irgesin birge qalaymız" attı joldauında "sıbaylas jemqorlıqpen bitispes küres jürip jatqanı" turalı aytıldı.

"Qazirgi tañda halıqaralıq sarap­şı­lardıñ bağası boyınşa Qazaq­stan­nıñ sıbaylas jemqorlıqqa qarsı zañnaması eñ tiimdilerdiñ biri dep tanılğan. Tek 2 jıldıñ işinde qılmıstıq jauapkerşilikke 40-tan astam res­pub­likalıq deñgeydegi jetekşi, oblıstıq jäne qalalıq auqımdağı 250-den astam lauazımdı twlğalar tartıldı, olardıñ arasında 39 äkim men olar­dıñ orınbasarları bar", - degen mälimet keltirildi Prezident joldauında.

Memleket basşısı Qorşağan ortanı qorğau, densaulıq saqtau ministrleriniñ, statistika jö­nindegi agenttik törayımınıñ, tö­ten­şe jağdaylar jäne qorğanıs vice-mi­nistr­leriniñ, «Qazaqstan temir jolı» kompa­niya­sı basqarma törağasınıñ, «Qaz­Mw­nay­Gaz», «Qazatomprom» kom­pa­niya­ları prezidentteriniñ üstinen qıl­mıs­tıq is qozğalıp, jauapkerşilikke tartılğanın mälimdedi.

"Üş jıldıñ işinde bizdiñ elimiz älem­dik antikorrupciyalıq reytingtegi körsetkişin birden 45 satığa jaq­sart­tı. Osı indeks boyınşa biz bükil TMD-da üzdik poziciyada twrmız", - degen Prezident joldauında.

2012 jıldıñ 27 qañtarındağı "Äleumettik-ekonomikalıq jañğırtu - Qazaqstan damuınıñ bastı bağıtı" joldauında Prezident "jañğırtudıñ mañızdı mäseleleriniñ biri - sıbaylas jemqorlıqqa qarsı şeşuşi küres" ekenin atap ötti.

Sonday-aq, Joldauda osı bağıtta jürgizilgen is-äreketterden memlekettik apparatta jemqorlıq deñgeyi edäuir qısqartılğanı jäne  bwl jöninde halıqaralıq sarapşılardıñ bağa bergeni turalı aytıldı.

Osılayşa, jemqorlıqpen küresudiñ jaña strategiyası äzirlenu kerektigi aytılıp, Ükimetke sıbaylas jemqorlıqqa qarsı kürdeli bağdarlamanı üş aydıñ işinde dayındauğa jäne wsınuğa tapsırma berildi.

Alayda tapsırma berilip, jemqorlıqpen küres jürgizilip kele jatqanmen, bwl mäsele Prezidenttiñ kelesi Joldauında da aytılmay qalğan joq. 2012 jıldıñ 14 jeltoqsanındağı "Qazaqstan-2050" Strategiyası - qalıptasqan memlekettiñ jaña sayasi bağıtı" attı joldauında Prezident "Memleket pen qoğam jemqorlıqqa qarsı küresetin bir küş boluğa tiis" ekenin eske saldı.

"Jemqorlıq – jay qwqıq bwzuşılıq emes. Ol memlekettiñ tiimdiligine degen senimdi setinetedi jäne wlttıq qauipsizdikke töngen  tikeley qater bolıp sanaladı. Biz tüpki maqsatımız – jemqorlıqtı qwbılıs retinde joyu üşin jemqorlıqqa qarsı zañnamalardı jetildiru arqılı jemqorlıqpen küresti qattı küşeytuimiz kerek", - degen edi Prezident kezekti joldauında.

2014 jıldıñ 17 qañtarındağı "Qazaqstan jolı – 2050: Bir maqsat, bir müdde, bir bolaşaq" attı joldauında Prezident "asa mañızdı mindetterdiñ biri  – sıbaylas jemqorlıqqa qarsı jaña strategiyanı qalıptastıru jäne iske asırudı jalğastıru" ekenin tağı bir märte atap ötti.

Al 2014 jılğı 11 qaraşaşadağı "Nwrlı jol – bolaşaqqa bastar jol" joldauı men  2015 jıldıñ 30 qaraşasındağı "Qazaqstan jaña jahandıq naqtı ahualda: ösim, reformalar, damu" attı joldauda jemqorlıq mäselesi söz bolğan joq. Esesine osı eki jılda Qazaqstanda eñ şulı jemqorlıq dauları bastaldı. Respublika tarihında ekinşi ret prem'er-ministr "jemqorlıqqa qatısı bar" degen ayıppen sotqa tartıldı. Bwdan bölek Pavlodar oblısınıñ bwrınğı äkimi men Tabiği monopoliyalardı retteu agenttiginiñ eks-törağası "jemqorlıq dauına" ilindi.

Prezident Nwrswltan Nazarbaev 2017 jılğı 31 qañtarındağı "Qazaqstannıñ üşinşi jañğıruı: jahandıq bäsekege qabilettilik" joldauında: "Biz eldegi sıbaylas jemqorlıq deñgeyin tömendetu bağıtında eleuli qadamdar jasadıq. Alayda, bastı nazar köbine sıbaylas jemqorlıqtıñ saldarlarımen küresuge audarılıp otır.

Sıbaylas jemqorlıqtıñ sebepteri men alğışarttarın anıqtap, olardı joyu jwmısın küşeytu qajet", - dep mälimdedi.

Al osı jılğı joldauda soñğı üş jılda "jemqorlıq dauımen" sottalğandar turalı naqtı mälimet keltirildi.

"Jemqorlıqtıñ aldın aluğa bağıttalğan küres jalğasa beredi. Köp jwmıs istelip jatır. Soñğı 3 jılda ğana joğarı lauazımdı şeneunikter men memlekettik kompaniyalardıñ basşıların qosa alğanda, jemqorlıq üşin 2,5 mıñnan astam adam sottaldı. Osı uaqıt işinde olardıñ 17 milliard teñge köleminde keltirgen zalalı öteldi", - dep mälimdedi Prezident öziniñ joldauında.

Mine, bwl Qazaqstannıñ 7 jıl işindegi "jemqorlıq dauınıñ" körsetkişi. Basqa statistikanı bılay qoyıp, Prezident joldauındağı derekterdi eskersek, 2009- 2011 jıl aralığında elimizde 300-ge juıq adam jemqorlıq isimen sottalsa, 2014-2017 jıldar aralığında sottalğandar sanı 2,5 mıñ adamnan asıp otır. Ärine eki uaqıt arasında bir jıl ayırmaşılıq bar. Biraq bayqağanımızday, 2011 jılmen salıstırğanda 2017 jıldı qosa alğanda soñğı üş jılda jemqorlıq deñgeyi 6-7 esege öskenin köremiz. YAğni jemqorlıqpen küres jwmıstarı küşeygen sayın oğan jol beretinder sanı da artıp bara jatqanday.

 “The Qazaq Times”