21 jeltoqsan küni Mwhtar Äuezov atındağı Qazaq Memlekettik akademiyalıq drama teatrı Tokioda «Aqtastağı Ahiko» spektaklin japon körermenderiniñ nazarına wsındı.

«Aqtastağı Ahiko» spektakline deyin aldımen teatr muzeyinen orın alğan qwndı jədigerlerimiz ben wlttıq qwndılıqtarımızdı tanıtatın körme wyımdastırıldı. Qoyılım basında söz alğan teatr direktorı Erlan Biläl twñğış ret Qazaq drama teatrınıñ Japoniyada ötken prem'erası Memlekettik bağdarlamanıñ "Jahandağı zamanaui qazaqstandıq mädeniet" jobası boyınşa jüzege asırılıp otırğanın ayttı.

«Aqtastağı Axiko» qoyılımın tamaşalauğa Tokio twrğındarımen qatar Japon parlamenti ligasınıñ törağası Takeo Kavamura, Japon mädeniet qorınan Yosuke Kukusabe sındı memlekettik qayratkerler de bar. Tipti qazaq teatr önerin tamaşalauğa Japoniyanıñ köne qalası Osukadan da bir top koreylik körermender arnayı kelgen. Belgili teatr sınşısı Nakamura Yoşixiro men tanımal aktrisa äri xalıqaralıq dostıqtı damıtu ortalığınıñ ökili YUko Takiguçi qoyılımğa joğarı bağa berdi.

Nakamura Yoşixiro: «Meniñ eñ birinşi bayqağanım, dramaturg Japoniyanı öte jaqsı biledi eken jäne drama jazu barısında köp zertteuler jasap, jüregimen tebirene otırıp jazğan eken. Ekinşiden, Ana rölin somdağan aktrisa – anağa ğana tän meyirimi men jıluın şaşu arqılı obrazdı asa ülken, qasietti deñgeyge kötergen. Osı künge deyin men altı mıñğa juıq spektakl' körgen ekenmin, sonıñ işinde bwl dramadan alğan äserim erekşe. Tüsingenim -  adamdar wltqa, näsilge bölingenmen, jürektegi meyirim bireu, jäne onda şekara joq. Mağan bwl spektakl'di köru üşin audarma qajet emes edi, bükil adamzat basına tüsken mwnday problemanı jürekpen sezinesiñ», - dep ayttı.

Japoniya mädeniet qorı atınan bağa bergen Yosuk Kukusabe Ahiko rölin somdağan Dulığa Aqmoldanı, Ana rölindegi Danagül Temirswltanovanıñ şeberlikterine tänti bolğanın jetkizdi. Sonımen qatar bwl dramanıñ bükil adamzat tarihındağı qara tañba – konclager' taqırıbın qozğau arqılı qazaq nemese japon wltı deñgeyinen şığıp, adamzattıq auqımdı bağındırğanın mälimdedi. «Bwl tragediya qaytalanbas üşin osınday körkem dünieler arqılı ärqaysımızdıñ esimizge sol bir swrapıl künderdi salıp otırğan läzim» dedi ol.

Al Halıqaralıq dostıqtı damıtu ortalığınıñ ökili jäne Japoniyadağı tanımal aktrisa YUko Takiguçi bolsa, spektakl' barısında köz jasın bir sät te tıya almağanın ayttı. Ol teatrımızdıñ aktrisası Danagül Temirswltanovağa ülken qwrmetpen raxmet ayttı. Aqtamaq ana obrazı oğan erekşe äser etken eken.  «Ana retinde sizge mwnday kürdeli, tragediyalı obrazdı somdau qiın bolğan joq pa?» dep swradı ol. Danagül Temirswltanova: «Onday jağdaydı eşbir ananıñ basına bermesin. Analar eşqaşan jılamasın, onday qasiretti jıldar qaytıp oralmasın. Meniñ maqsatım – körermenderdi osı oy-baylamğa jeteleu», - dep jauap berdi. Qarlag zertteuşisi, professor Nwrlan Dulatbekov mırza «Aqaydıñ Qaseni obrazı arqılı qazaq halqınıñ wlı ruhın körsetip, älemge tanıtudı maqsat ettik» - dep atap ötti.

Qoyılım Tokioda anşlagpen ötti. Kelgen körermenderdiñ köpşiligi sahnada bolıp jatqan oqiğa tereñine süñgip, köz jastarına erik berumen boldı. Japondıqtar asa wstamdı, kez kelgen närseni salqınqandılıqpen qabıldaytın halıq, emociyaların bwlay aşıq şığaruı sirek kezdesetinin aytqan Qazaqstannıñ Japoniyadağı elşilik qızmetkerleri: «Bwl - sizder üşin, sizder ğana emes bükil qazaq halqı üşin jeñis, bizdiñ ortaq jeñisimiz» dedi. Al qoyılım soñında zaldan Ahiko Tecuranıñ özi şıqqanda körermen qwrmetinde şek bolmadı. Ol japon-qazaq tilinde körermenge raxmet ayttı. Osılayşa Axiko jäne onıñ ömirin el jüregine jetkizgen «Aqtastağı Axiko» qoyılımı büginde eki el arasındağı dostıqtıñ simvolına aynaldı.

Jalpı Qazdramteatr wsınğan «Aqtastağı Axiko» qoyılımına japondıqtardıñ qızığuşılığı zor. Onı bir ay bwrın jergilikti telearna, gazet, jurnaldarda jariyalanıp jatqan maqalalar kuä.

Japoniyağa sapar barısında Qazaq drama teatrı wjımı Japoniya mädeniet qorınıñ Basqarma törağası Ando Hiroyasu mırzamen kezdesip, bolaşaqta mädeniet, teatr salasında özara baylanıstı nığaytu jöninde uağdalastı. Sonımen qatar teatr sınşıları, Japoniyanıñ No, Kabuke, Suzuki sındı drama teatr ökilderimen de kezdesuler ötti. Saxalin äskeri twtqındarı men onıñ tuıstarımen kezdesuler ötti. Alda Japoniyanıñ beldi teatr sañlaqtarımen kezdesip, özara täjiribe almasu, olardıq şeberlik sınıptarına da qatısu josparlanıp otır. Sonımen qatar jeltoqsannıñ 25-inde «Wlı Dala Eli» attı Wlt ruhaniyatın wlıqtaytın koncerttik bağdarlama men «Aqtastağı Axiko» spektaklin japondıqtardıñ nazarına wsınılıp, teatr muzeyinen äkelingen wlttıq jädigerler körmesi wyımdastırıladı.

 Aygerim Ağıltaeva

“The Qazaq Times”